MATIU 7

1“Takum jigamen an, Atijamit poop letagamenuul. 2Mati mampi jigamenumi an, moo mákonam Atijamit panagamenuumi, ban káliikumaak kan jíliikumumi man jigamen bukaaku, Atijamit pánagamenumuul di káliikumaak kákonak. 3Wau kaane nujuk jinukaj jammi di jícilaj jati aceen, ban ujukut fúbaaraf fammi di jícili? 4Mba buu panuŋoolen uregool, ‘Kob man ípuren jinukaj jammi di jícili,’ nan ubajumi fúbaaraf fammi di jícili? 5Au mamisam, utaat úpuren fúbaaraf fammi di jícili, mambi uŋoolen ujuk jak man úpuren jinukaj jammi di jícilool. 6“Takum jisen waaf wáliroore wati Atijamit bee di siyen, mati pansibookouul man sirumuul. Takum jileeb pemaay yooluul fácul sikumba, takum sitantampoor yo. 7“Jilaw, panjibaj. Jiñes, panjijuk. Jikongen, kábabumaak pánkuwambulouul. 8Mati ampi alawumi, panabaj. Ampi añesumi, panajuk. Ban kábabumaak pánawambuli bee di ampi akongenukomi. 9Ai di muyuul kumpaak, añoolool alawoojaat mbúur, nasenool ekooba? 10Mba alawoojaat ewol, nasenool eyela? 11Nan man muyuul kájakaatimi jimanjumi mampi jisenumi wajake kuñooluul, Ampauul Atijamit ati di bukinab bajakaab buu panafaŋ man amanje man asen wajake bee di kalawoomi! 12Jikaan bukanak wan jimaŋumi man kukaanuul. Mati mo’omu moo sílingaas sati Muusa di wan kuboñaak kuceenak kuregumi. 13“Nókenum fúlamutaf fagogaaf, mati fúlamutaf fawuŋaaf ban fúsuum éjawum, foo fújeetumemi bee di ecetey, kajuupoe dóo kújawumemi. 14Bare fúlamutaf fugogog ban di fútaañi éjawum, foo fújeetumemi bee di eroŋey, ban kupinaay ceb dóo kújawumemi. 15“Jíkaanum mati kuboña kubunta kabilemi bee di muyuul man kukaanalenooremi bukan kákajeneriit nan sisaha, bare bukan kakajene nan símunduŋo. 16Pánjimanjumiil di búkaanumiil. Mante kutujetuj kureseŋ di utanja, mba kufiig di úlind? 17Búbaar banoosani bajake buwolemi búwolum bajake, bare búbaar bajakut buwolemi búwolum bajakut. 18Búbaar bajake búwoleneriit búwolum bajakut, ban poop búbaar bajakut búwoleneriit búwolum bajake. 19Búbaar banoosani báwoleriitumi jak, bupiteipit buleebi di sambunas. 20Moo pánjimanjummi kuboñaak kubuntaak di búkaanumiil. 21“Lee anoosani awonkemi ínje, ‘Arungaau, Arungaau,’ aate kanoken di bukinab bajakaab, bare ampi akammi emaŋey yati Ampaom Atijamit ammi bukinab bajakaab. 22Nampi funakaf fati bagamab fúriiŋumi kajuupoe pankuwonkom, ‘Arungaau, Arungaau! Lee wúli úriiŋenumi furimaf fati Atijamit ñátum di kareesi, ban ucesoorumi úgun di kan wookumi ñátum di kareesi, ban ninsi nukammi wajamurerutimi ñátum di kareesi?’ 23Bare panilaañeniil, ‘Imanjurerutuul. Jítoro di ínje, muyuul kájakaatiñaa!’ 24“Ampi ajamemi kurimom aban nakaanuko, panakaan nan ániine alinloe ateepumi eluupool di fukooba. 25Emitey di elubumi, falaf di fumeeŋumi, mumelam máamakam muteyulomi, ban fárusaf fáamakaf di funagulomi eluupey ekila, bare elout mati eluupey ejuumenijuumen di fukooba. 26Ampi ajamemi kurimom ban ákaaneriituko, panakaan nan égot yateepumi eluupuyo di kaluusak. 27Emitey di elubumi, mumelam máamakam muteyulomi, ban fárusaf fáamakaf di funagulomi eluupey ekila, ñaa di elomi wám eyiisoorumi nañ.” 28Nan Yensa abanumi kurimak uke, jameeŋey yalakotomi di wáaloiimi mati kaliikitenak koola. 29Mati naliikiteniiliikiten nan an abajumi fujuum nan arunga, ban aanout nan kuliikitenaak kooliil kati sílingaas.

will be added

X\