MATIU 6

1Yensa nammi, “Jíkaanum! Nampi jilakomi kamiiceelaet Atijamit di fáculey yati bukanak, takum jíyiisenooro mambi kujuk wan jikaanemi. Mati leejibaj bacaamab di Ampauul ammi di bukinab bajakaab. 2“Nampi ulakomi eseney waaf an abajutumi, takum utebenelenooro man bukanak kumanj, nan man bukanak kati mamisam kukaanemi eeno di kukobak di uruŋaw mambi kuñes karees. Ínje eem di ereguul malegenam mati koo kuyayab bacaamiil kuban. 3Bare nampi ulakomi esen waaf abajutumi, takum umaŋ man kañeni kumayak kumanj wan kañeni kúridak kusenumi. 4Moo pankaan waaf wakaane kutunt. Ampai ajukemi wakaanimi di kutunt panacaami yaj. 5“Nampi jilakomi elawey, jootut elaw nan bukanak kati mamisam. Mati kumaŋemaŋ bee ejuum di kukobak di uruŋaw man kulaw mambi bukanak kujukiil. Ínje eem di ereguul malegenam, koo kuyayab bacaamiil kuban. 6Bare nampi ulakomi elawey, noken au cebi bee di fumooraf fooli, wambenooro ban nulaw Ampai Atijamit ájukeriitimi. Ampai Atijamit ajukemi wan ukammi di kutunt, panacaami yaj. 7“Nampi jilakomi elawey, takum jiyesasoor nan man bukanak kamanjutumi Atijamit kukaanemi eeno. Mati kusofesof elawey yati kayesasooriil ekaanemi man Atijamit ayab kúlawiil. 8Takum joono nan kukila, mati Ampauul Atijamit namammanj wan ceeŋumi man jibaj bala’a jilawool. 9Jilaw maa: Ámpaoli ammi di bukinab bajakaab, mbi kareesi kúlebieni. 10Mbi kunakak kati jáyiaj jooli kúriiŋul, mbi emaŋey yooli ekaani, di dúniyaay nan man yommi di bukinab bajakaab. 11Wúnoli wampi uri funakoofunak. 12Bonket majakutam móololi, mati wúli di kúko’oli ubonketemi kalomi di wúli. 13Ban rúngoli takum Seetaanaay eŋoolen éyinkoli, bare pákenoli di yo. 14Mati jibonketujaat kalomi di muyuul, moo Ampauul Atijamit poop ammi di bukinab bajakaab panabonketuul. 15Bare jibonketutujaat kalomi di muyuul, moo Ampauul Atijamit poop letabonketuul. 16“Nampi jilakomi balatab, takum jiyinennoor bóteni, nan man bukanak kati mamisam kukaanemi eeno, mati kúfeleriit wuuliil mambi bukan kujukiil. Ínje eem di ereguul malegenam mati kuyayab bacaamiil kuban. 17Bare nampi ulakomi balatab, nujoonen fúkaaf fooli jak ban núbuulo. 18Moo bukaaku leekumanj mati au balat noom di bo, rino Ampai Atijamit ájukeriitumi. Ampai Atijamit, ajukemi wakaanimi di kutunt, oo panacaami yaj. 19“Takum jiraagal eyof fubajuul bee mati kúkouul baabe di dúniyaay, boo bulol di komoŋ dootumi kakajenufo jaj, di poop boo kúkuu kufumufo man kúkuut. 20Bare jiyof fubajuul bee mati kúkouul di bukinab bajakaab boo lee bulol mba komoŋ yoote kakajenufo di poop boo lee kúkuu di kufumufo man kúkuut. 21Mati ban fuyofuul fommi, boo úyegetuul panulako poop. 22“Kúcilak éwuŋenumaay yati eniiley. Kúcili kújujaat eniili búrom panewuŋ. 23Bare kúcili kúju’utujaat, eniili búrom pánerimen. Mawuŋam mammi di au mubilujaat múrim, moo pankaan érim yárimene mútutut! 24“An letaŋoolen amiiceelaet kurunga kugaba. Mati panalat aamu man amaŋ aamu, mba pánalebien aamu man aheelen aamu. Leejiŋoolen jimiiceelaet Atijamit di sígodi síñakon. 25“Moo kaane ínje eem di ereguul, takum jikaan síwoonooruul mati eroŋey, wan joote eri di eraan man jiroŋ, mba wan joote kakoko. Lee eroŋ efaŋe muria, mba lee eniil efaŋe wañ? 26Jijiker bánaakayitaab fatiya búwañeriit: búlukeriit di bújaleriit. Búbajeriit ulampan bare Atijamit Ampaolaal ammi di bukinab bajakaab ákuumenebomi. Lee muyuul jíkoyume bo? 27Ai di muyuul panaŋoolen akaan fuyiifool fubaak hani jayiinkun ñátum di ekaan síwoonoorool mati yo? 28Wau kaane di joom di ekaan síwoonooruul mati wañ? Jijiker úrumpenaw wati mafosam di karambaak man uliileñaa eeno. Úrokeriit mba úliireriit wañ. 29Bare ínje eem di ereguul mati hani áyiau Suleimaan di fúbajooro majakam mati wañool múriiŋut mati hani bákon di úrumpenaw uwu man woonomi eeno. 30Atijamit akarenumi mafosam maliileñaa di karamba jaat wañ wajake bare kajom pammureemeni. Kammojaat, mante Atijamit letakarenuul wañ wuuj mo? Muyuul kan kafiumak kutiitiñaa! 31Moo kaane takum jikaan síwoonooruul, di aaney, ‘Waa panuriaal?’ mba ‘Waa panuraanaal?’ mba ‘Waa panukaanoaal?’ 32Mati kamanjutumi Atijamit kuñesooremi uwu búrom. Ampaolaal Atijamit ammi di bukinab bajakaab namammanj mati joote ebaj uru búrom. 33Bare jitooŋ jiñes jáyiaj jati Atijamit di majoonam moola, kammojaat uru búrom panabenenuul poop. 34“Moo kaane takum jikaan síwoonooruul mati kajom, moo moolimo múbuto. Ceeŋut man jikaan síwoonooruul waatumi bee kabajoak funakoofunak.

will be added

X\