MATIU 5

1Funak fákon nan Yensa ajukumi jameeŋey, naremboorumi bee di fúlankiinaf. Nan áriiŋubomi alako, kuriibaool di kubilumi bee di oo. 2Nataatumi kaliikiteniil, di aaney: 3“Kágolumumi Atijamit ceb jakiijak, mati bukoo kati di jáyiaj jati bukinab bajakaab. 4“Kammi di búlokab jakiijak, mati koo koote kabebeni úyeget. 5“Kawalenooromi kúkoiil jakiijak, mati dúniyaay búrom panekaan yati bukoo. 6“Kan emaŋey yooliil eenomi man kufaŋ man kukaane majoonam man Atijamit aceeŋumi jakiijak, mati pankuyajen tep. 7“Kabonketumi bukaaku jakiijak, mati pankubonketi. 8“Kan úyegetiil útienumi jakiijak, mati pankujuk Atijamit. 9“Kakammi kufokaak sambunas jakiijak, mati pankuwonki kuñiil kati Atijamit. 10“Kásuutukenimi mati koo kukankaan majoonam man Atijamit aceeŋumi jakiijak, mati Atijamit panayabiil di jáyiaj jati bukinab bajakaab. 11“Muyuul jakuujak nan bukanak kujeluul ban di kúsuutukenuul, di kutaakenuul di kagaajoor kanoosani, mati muyuul kuriibaom. 12Jimaayoor ban di súumuul, mati panjiyab bacaamuul báamak di bukinab bajakaab. Mati moo mákonam kúsuutukeneenumi kuboñaak kati Atijamit kati no’ona bala’a muyuul. 13“Muyuul musis bee di bukanak búrom di dúniyaay. Bare kafirak koolimo kúpurujaat buu moote efir inki? Musisam ume mubeteni ceb ban di mutoboji tentaam. 14“Muyuul mawuŋam mati dúniyaay. Ésukey yateepimi di fatiyena yati furemboor leteyofo jáng. 15An letayaben éwuŋenuma ban naŋar katekel áfimenuyo, bare panaganduyo di fúganduma, tan yoote kawuŋen bukanak búrom kammi di kalimbisak. 16Moo mákonam, mawuŋam mooluul moote kawuŋen di bújonlenab bati bukanak, mambi kujuk mukaanauul majakaam, ban di kusal Ampauul ammi di bukinab bajakaab. 17Yensa narulenumi kaliikitenak naaniimi, “Takum jisof mati ínje nijawulojaw bee kakajen sílingaas sati Muusa mba kaliikitenak kati kuboñaak. Ínje ijawulout bee kakajenuso bare bee kálirenuso. 18Ínje eem di ereguul malegenam, bee nampi tentaam di fatiya síjimmi, hani jiciika, mba hani bagorer léebujimurer di sílingaas sanoosani. Wanoosani waciikimi di so pánuliroor. 19Ampi añoosumi hani wákon di wafaŋumi man utiitie di sílingaas use aban naliikiten bukaaku man kuñoosumo, oo panfaŋ man atiitie di jáyiaj jati bukinab bajakaab. Bare ampi akammi wan sílingaas siregumi ban naliikiten bukaaku man kukaanumo, oo panfaŋ man ákalaae di jáyiaj jati bukinab bajakaab. 20Ínje eem di ereguul, majoonam mooluul mufaŋutujaat ewuuj kuliikitenaak kati sílingaas di Kufarisaak, leejinokender di jáyiaj jati bukinab bajakaab. 21“Muyuul jimammanj mati kufannaaniŋuul koonikoon, ‘Takum ubuj an. Ampi abujumi an pánajeetumi bee di fugamenaf man kugamenool.’ 22Bare ínje eem di ereguul mati ampi añuumulumi di apaalool ariiba aceen pánajeetumi bee di fugamenaf man kugamenool. Ampi ajelumi apaalool ariiba aceen aanool, ‘Au lee waaf!’ pánajeetumi bee di fugamenaf man kugamenool. Ampi apaalool ariiba aceen aanool, ‘Au égot!’ oo pambialeebi bee di sambunas sáceteriitumi. 23Ñaa óomijaat di esen kawulak kooli di fúsimenaf di fukobaf fáamakaf fati Atijamit, too nuwoolo mati waaf woom di titooruul di apaali ariiba aceen, 24moo nukat kawulak kooli too di fácul fúsimenaf. Jaw bee di akila manti jibonketoor, mbi kiti úlaañul man usen kawulak kooli bee di Atijamit. 25Ulakojaat ejaay di aloboori bee di bagam, uraagal man jijamoor, takum aloboori aruui bati agamenaau. Leejaat mo, o’omu panaseni apooya man akuli dán bukanak kukuleimi. 26Ínje eem di ereguul malegenam, létupururerul bee nampi ucaamumi jaj wan agamenaau acaamenimi. 27“Muyuul jijanjam koonikoon, ‘Takum usang aseek mba ániine ati an.’ 28Bare ínje eem di ereguul mati ániine anoosani ajikerumi aseek aceen ban namaŋ di búyegetool man kufinto, oo súm nasangoosang aban di búyegetool. 29Kaanjaat jícili jírid jikaani man ukaan majakut, lóokul jo ubeten. Mo’omu múkoyume eniili búrom kabeteniak di sambunas sáceteriitumi. 30Ban kaanjaat kañeni kúrid kukaani man ukaan majakut miinko ubeten, mo’omu múkoyume eniiley yooli búrom kabeteniak di sambunas sáceteriitumi. 31“Kooneiil poop, ‘Ampi akatenumi aseekool, naate eciik letara yati kakatenak.’ 32Bare ínje eem di ereguul mati ániine anoosani akatenjaat aseekool, rino nasofoosof tap di ániine aceen, nukaanookaan áraadia ayabojaat ániine aceen. Ampi ayabumi aseek abanumi búyabaab oo áraadia. 33Yensa nammi, “Muyuul jijanjam inki mati kufannaaniŋuul koonikoon, ‘Takum ulepoor, bare oote ekaan di bújonlenab bati Atijamit wan úbaatumumi.’ 34Bare ínje eem di ereguul, takum jibaat jáng, ñátum di bukinab bajakaab, mati boo ejunkutey yati Atijamit, 35mba ñátum di dúniyaay, mati yoo fútobojuma fati úkamunaw wati Atijamit, mba ñátum di Yerusalem, mati yoo ésukey yáamakey yati Áyiau Áamakau. 36Ban takum ubaat hani di fúkoi, mati ubajut hani kánkum kati ekaan man kal kákon kufinet mba di kulaen. 37Oon, ‘Éey’ yooli ekaan ‘Éey’ mba ‘A’a’ yooli ekaan ‘A’a’. Waaf wawuujutomi wo’owu wati Seetaanaay. 38“Muyuul jijanjam mati kooneiil, ‘Jícil pánjicaamum jícil, káñiiŋ pánkucaamum káñiiŋ.’ 39Bare ínje eem di ereguul, takum ugalen an ájakaatie. An atancijaat karaab, senool kaaku poop man atanci. 40An amaŋujaat bee éjeetum au bee bagamab mati kaloai, katool man aŋaruko ban nusenool kuceen kákoyume man aŋar poop. 41An amingenijaat man jijaw ékilomeetar yákon, jaw di oo síkilomeetar sigaba. 42An alawimi senool. Takum ulat amaŋumi kamaageni. 43“Muyuul jijanjam mati kooneiil, ‘Noote emaŋ alaoori, ban nulat alatoori.’ 44Bare ínje eem di ereguul, jimaŋ kulatooruul ban jilaw wajakaaw bee di kásuutukeneuumi poop. 45Moo mambi jikaan kuñiil kati Atijamit Ampauul ammi di bukinab bajakaab. Mati oo akaanemi man bala’ab buyah bee di kajakaak di kajakutak kure’en cererer, ban poop akaanemi man emitey elub bee di kajoonaak di kajoonutak. 46Jimaŋujaat kamaŋuumi ceb, buu panjiŋoolen jibaj kasal? Hani kulaga basaaf kukaanekaan moo mákonam! 47Jisaafoorujaat di kan jipaalaayimi ceb, wei joom di ekaan wákoyume bukaaku? Hani kamanjutumi Atijamit kukaanekaan moo mákonam. 48Muyuul joote káliroor nan man Ampaolaal Atijamit ammi di bukinab bajakaab áliroorumi eeno.

will be added

X\