MATIU 4

1Búyegetab Bátienaab di bukammi man Yensa ajaw bee di baŋaanab mambi Seetaanaay eyinkool. 2Nalakobomi balatab kunak bukan kugaba fukaf di bala’ab, bacaarab di busofoomi máamak. 3Seetaanaay di érajuloomi man yoonoomi, “Kaanjaat au Añiilau ati Atijamit, jáatiken kukoobaak uke man kulaañ muria.” 4Bare nalaañenuyomi, “Ciikiciik, ‘Anau aatut éroŋum di muriaay ceb, bare di furim fanoosani fápurumulomi di Atijamit.’” 5Seetaanaay di éjeetumoomi bee di ésukey yáamakey yálirooraay, ban di erembenoomi di donkaasey yati kasondak kati fukobaf fáamakaf, 6man yoonoomi, “Kaanjaat au Añiilau ati Atijamit, baal bee tentaam! Mati ciikiciik, ‘Atijamit panareg simaleekaool man sipooyi. Ban pansipebi di uñenaw wooliso, takum kákamuni kunag túc di ekooba.’” 7Yensa nalaañenuyomi, “Inki ciikiciik, ‘Ootut eyink Akiiyaau Atijamit ooli.’” 8Seetaanaay di éjeetummi Yensa inki bee di fúlankiin fateboe, ban di éyiisenoomi jáyi janoosani jammi di dúniyaay búrom di mákalaam moolijo. 9Di yoonoomi, “Uju búrom paniseni man urungujo, úkuntaajenjaat fáculom man umiiceelaetom.” 10Yensa naanuyomi, “Tóro di ínje, Seetaanaay! Mati ciikiciik, ‘Oote kákuntaajen man umiiceelaet Akiiyaau Atijamit ooli ban numiiceelaetool oo cebool.’” 11Seetaanaay di ekatoomi bálamuk, simaleeka di sijawulomi man sicookoorool man áliŋ. 12Nan Yensa ajammi mati Yaaya kusofeenoosof kukul, no’onu nápurubomi alaañumi bee kapanak kati Galili. 13Bare nápurumi Nasaret, ban najawumi acin di Kapaanaum yapanomi di falaf, di mofam mati fiilaf fati Sabulon di fati Nefutali. 14Mo’omu mukaanikaan mambi wan aboñaau Yesaaya asankeneenumi woote káliroor man ammi, 15“Mofam mati Sabulon di Nefutali, buruŋab bajawumi bee falaf, di kátipa kaaku kati falaf fati Yorudan, Galili, ban Kakaanutumi Kúyahuudak kucinumi! 16Bukanak kammi di érimey kujujuk mawuŋ mákalaae. Ban mati bukanak kammi di érimey yati ecetey, mawuŋam mukila murajuloraj.” 17Káŋarum nanan nikila, Yensa natooŋumi bee káriiŋen furimaf fajakaaf, di aaney, “Jítiiwoor jikat bálamuk majakutuul, mati jáyiaj jati bukinab bajakaab jilofulolof!” 18Funak fákon nan Yensa alakomi kajaatoorak di kafintak kati falaf fati Galili, najukumi kutiaay kooni kugaba. Simon, an kuwonkemi Peter, di atiool Anduru kalakoe jaleeb di falaf, mati koo kuleeba. 19Yensa naaniimi, “Jiriibenom, muyuul nan man jisofemi siwolas panikaanuul kuwonkena bukan.” 20Yaŋ too galab di kubetenulobomi kuŋabiil palab man kuriiboomi. 21Nan ápurutomi man awuujumi bee fáculey, najukubomi kutiaay kuceen kooni kugaba, Yankuba di atiool Yohan, Jebede kuñoolool. Kulakoeenlako di ampaiil Jebede di busaanaab, man kommi di kágolulak kuŋabiil, ban Yensa nawonkiimi man kuriibool. 22Yaŋ di kukatulomi busaanaab di ampaiil, man kuriiboomi. 23Yensa najawumi aŋomoor banoosani kapanak kati Galili, nalakomi kaliikitenak di kukobak kooliil ban di káriiŋen furimaf fajakaaf mati jáyiaj jati Atijamit. Nalakomi poop kasontenak bukanak kaakumi úsumutaw di kaakumi újuusaaw. 24Kajamoak koola di kuyiisoorumi nañ banoosani di mofam mati Siria. Bukanak di kújeetumulo’oomi kusontaak búrom, kan úsumut wanaamutumi usofumi di jari yanoosani, di kan úgunaw wookumi, di poop kan kajekak kubetemi, di kabakomi, man akoyeniimi búrom. 25Jameeŋ yati bukan eriibenoomi kápurumul di Galili di Dekapolis, di Yerusalem, di Yúdea, di kátipaak kati falaf fati Yorudan.

will be added

X\