MATIU 3

1Di kunakak kukila Yaaya Átiigulenaau nabilumi áriiŋen furimaf fati Atijamit di baŋaanab bati Yúdea. 2Nammi, “Jítiiwoor jikat bálamuk majakutuul, mati jáyiaj jati bukinab bajakaab jilofulolof.” 3Yaaya oo aboñaau Yesaaya alakoeenumi kasanken moola no’ona nan ammi, “Furimaf fati an facibuloulomi di baŋaanab: Jijoonen buruŋab bee mati Akiiyaau, jílus buruŋ bajoone tul bee mati oo.” 4Yaaya nakaanokaano wañ wajoonenimi ñátum di bufal bati eñonkomma aban, napiinoorumi ñátum di kabaŋ. Furiaf foola foo eenomi fábangund di múkum. 5Kati Yerusalem, kati Yúdea, di poop kati upanaw walofumi Yorudan bukan kajuupoe kúpurulomi kujaw bee di oo. 6Di kufelumi úyegetiil man kuregumi wan kukammi noo wajakutaw ban Yaaya nátiiguleniimi di falaf fati Yorudan. 7Bare nan ajukumi Kufarisa di Kusadusi kajuupoe di kubil mati kátiigulak, naaniimi, “Muyuul úlun! Ai agamenuul man jipak di kútekak kan Atijamit aate bee esenuul? 8Jikaan mukaanaam maamu maate káyiisen mati jítiiwootiiwoor jikat bálamuk majakutam, 9ban takum jisofooro man joonooro, ‘Wúli úwoloorumaw wati Iburehima.’ Ínje eem di ereguul mati Atijamit naŋooleŋŋoolen áruŋul kukoobaak uku man abaakenko akaan úwoloorumaw wati Iburehima. 10Hani bee iñeme fúniiraf foofu man funeni bee epit kumuumak kati úbaaraw. Búbaar banoosani búwoleriitumi jak, pambupiti bubeteni di sambunas. 11“Nítiigulenuumi ñátum mumel bee káyiisen jítiiwootiiwoor jikat majakutuul, bare aatumi ebiley bálamukom oo afaŋaam kánkum, usamataool ínje iŋotut eteb. Pánatiigulenuul ñátum Búyegetab Bátienaab di sambun. 12Káyonkulumaool di kañenool bee kápajul éfuley di muriam. Abanjaat pananen muriam di bulampanool, bare éfuley panareemenuyo di sambunas sáceteriitumi.” 13Yensa nápurulopur di Galili tiatook Yaaya di falaf fati Yorudan, mambi átiigulenool. 14Bare Yaaya amaŋutumi man átiigulenool. Nammi, “Au oote kátiigulenom, bare au nújo’ol bee di ínje!” 15Bare Yensa nalaañenoomi, “Kaan eenomiñaa iñeme, mati wulaal ootaale ekaan waafaw búrom wan Atijamit amaŋumi.” Yaaya nakammi wan Yensa alawoomi. 16Nan Yaaya átiigulenumi Yensa aban, oo di épuruley di mumelam ceb, bukinab bajakaab di búwambuli. Ban najukumi Búyegetab Bátienaab bati Atijamit búwaloulomi bulon di oo nan kálaabaan. 17Furim di fúpurumulomi di bukinab bajakaab man foone, “Ume eenomi Añoolom ati búsusom, an moola músuumammi máamak.”

will be added

X\