MATIU 27

1Di bújomaraay pím, kúsimenaak kunifaanak kati Atijamit di Kúyahuudak kunifaanak di kumaloor inki mampi kusofumi bee mati ebujey yati Yensa. 2Di kukokenoomi kuruuool bee di bújonlenab bati Pilat, Anifaanau Ároomanau. 3Nan Yúdas ápurumi di oo, amanjumi mati Yensa kugamenoogamen mati aate ebuji, napotojumi ban nalaañenumi sígodiforaas kabananey di uñeney bee di kúsimenaak kunifaanak kati Atijamit di Kúyahuudak kuceenak kunifaanak. 4Ban nammi, “Ínje nikankaan majakut, mati nípupur ikaan man kusof anau akaanutumi waaf wajakut man acet.” Di kulaañenoomi, “Wúli, moo bútumoli bulee bo, moo búrookoi.” 5Yúdas nabetenumi sígodiforaas dóo fukobaf fáñiiaaf fati Atijamit, núpurumi di bo ban najawumi tiakammi fulatenaf di fatiyaay man abujooromi. 6Bare kúsimenaak kunifaanak kati Atijamit, di kumukenumi sígodiforaas di kommi, “Sílingaas soololaal sisenut man sígodiforaas use silako di funenaf fati fukobaf fáamakaf, mati sikankaan sasikoe mati an kúbujumumeso.” 7Di kumaloorumi man kootumi ekaaney di so, ban di kunommi kalaakak kati ateepaau ati ubikaw, bee ekaan fufok fati kujaaburuŋ. 8Moo kaane kuwonkewonk kalaakak kukila Kalaakak kati Fúsim hani bee funakaf fati jaat. 9Wan aboñaau Yeremaaya asankeneenumi úlirooliroor, di aaney, “Ban di kuŋarumi sígodiforaas kabananey di uñeney, san bukanak kati Isirael kúligumi bee ecaamey mati fúkaaf foola. 10Di kucaamiimi di sígodaas sikila bee enoom kalaakak kati ateepaau ati ubikaw, nan man Akiiyaau ájaatikenammi man ikaan eeno.” 11Yensa najummi di bújonlenab bati Pilat, anifaanau Ároomanau. Naceeŋumi Yensa, “Mante au eenomi Áyiau ati Kúyahuudak?” Yensa nalaañenoomi, “Au urege mo.” 12Bare nan kúsimeanaak kunifaanak di Kúyahuud kunifaan bukaaku kutaakenoomi wan akammi, bare alaañenutiil waaf. 13Pilat naanoomi, “Mante au ujamut room kataakenak kajuupoaak uku kan buku kurembenimi?” 14Bare Yensa alaañenutool hani wákon. Moo mukammi anifaanau Ároomanau di wáalo’oomi máamak. 15No’onu káaningak kanoosani kati Ewuujey yati Njalayiri kúriiŋujaat mukaanaam mati anifaanau ati mofam nakatenekaten an ákon di dán bukanak kukuleimi an jameeŋey emaŋumi. 16Di bajumi no’ona álaputa áamak, an kuwonkemi Baraba. 17Nan kujojumi tákon, Pilat naaniimi, “Ai jimaŋe man ikaten bee di muyuul, Baraba mba Yensa an kuwonkemi Apakenaau Áamakau?” 18Mati Pilat namammanj mati di kurungaak kati Kúyahuudak di kukammi man kusof Yensa kusenool moo kápurumul di búlatab. 19Benento, nan alakomi di ejunkutey yati bagamab, aseekool náboñuumi furim bee di oo man ammi, “Takum ukaan butumi di ániinaau akila ajoonumi. Mati jaat nibabaj sáaut sajakut mati oo sakammi búyegetom di bugaal máamak.” 20Kúsimenaak kunifaanak kati Atijamit di Kúyahuudak kunifaanak di kubuntoorumi bukanak di elaw Pilat man akaten Baraba man akaan kubuj Yensa. 21Anifaanau ati mofam nalaañumi aaniil, “Ai jimaŋumi di buku kugabaak man ikaten bee di muyuul?” Di kommi, “Baraba!” 22Pilat naaniimi, “Kama waa neete ekaan di Yensa an kuwonkemi Apakenaau Áamakau?” Koo búrom di kucibulomi, “Katool man afaaŋeni!” 23Pilat naceeŋumi, “Wau? Búlaput bei nakaane?” Bare di kufaŋumi man kucibuloore máamak, “Katool man afaaŋeni!” 24Nan Pilat ajukumi mati abajut buruŋ buceen bampi akaan, bare najukumi mati káguuloor kooku bo etooŋ kayito, naŋarumi mumelam man añaakulenumi fáculey yati jameeŋey yati bukanak, di aaney, “Ínje butumom bulee bo mati ecetey yati ániinaau ume, ñaa mo’omu búrookouul.” 25Bukanak búrom di kulaañenoomi, “Búrookaab bati ecetey yoola mbi bulako di wúli di poop kúñoololi!” 26Pilat nakatenumi Baraba bee di bukoo. Ban nakatenumi furim man kuŋar Yensa kutek máamak ban di kusenool man kufaaŋenool di ébaarey yati búpinab. 27Noo kutiikaak kati Pilat kújeetummi Yensa bee di eluupey yati anifaanau, ban di kujojenumi uyooŋaw wooliil wati kutiikaak fáculool. 28Di kúbulul kaloaak kati Yensa man kukaano’oomi kaloa káamak kakaayene éyem nan kati áyi. 29Di kunapumi úlind kaan nan bompoŋ bati áyi man kuloopenumi di fúkaaf foola, ban di kusenoomi egol di kañenool káridak. Di kulomi kúfima di bújonlenab boola mansi kúluuool, di aaney, “Atijamit akati di karulen ebaj fuyiif fabaake! Áyiau ati Kúyahuudak!” 30Di kulacenoomi, di kuyabumi egoley man kutekool fúkaaf foola. 31Nan kúnaruloomi kuban di kúbulul kaloaak koola man kukaano’oomi kaloaak koola fúkouko, ban di kújeetumoomi kufaaŋenool di ébaarey yati búpinab. 32Nan kulakomi épuruley bee téeŋey bati arungaiil, di kúkamboorumi di ániine aceen, an koonemi Simon ati Kurene. Di kumingenool man kúrookenool ébaarey yati Yensa. 33Di kúriiŋulomi bee tan koonemi Golugota (yan eenomi ‘Tanat tati Kakonkaam’). 34Too kutiikaak Kúroomanak kusenumi Yensa wayin yan kunaamoore di bubeeben bátalie, bare nan ajakenuyomi, nalatumi bee eraanuyo. 35Nan kufaaŋenoomi di ébaarey yati búpinab kuban, di kulakomi man kukaan bulukoor, man kucaaboorumi wañool. 36Di kulakomi tentaamey páf mansi kurulen kajikerool bo. 37Di fatiyenaay yati fúkaaf foola, kuciciikuto mo’ome waa kammi man kubujool, “Ume eenomi Yensa áyiau ati Kúyahuudak.” 38Di bajumi kúkuu kuceen kugaba kafaaŋenimi di oo, ákon báridool aamu bamayool. 39Kawuujutomi insi kúŋuk mansi kúnarulool. 40Di kommi, “Au ooneenumi bee efum fukobaf fáñiiaaf fati Akiiyaau wúp, ban nuteepulankenufo di kunak kúfeegiir, pakenooro! Kaanjaat au eenomi Añiilau ati Atijamit, wáloul di ébaarey yati búpinab.” 41Kúsimenaak kunifaanak kati Atijamit di kuliikitenaak kati sílingaas sati Atijamit poop di Kúyahuud kunifaan kuceen di kulako kánarulool man kommi, 42“Napakempaken bukaaku, aŋoolenut apakenooro. Lee oo Áyiau ati Isirael? Áwaloul iñeme di ébaarey yati búpinab, pánuyinen di oo. 43Oo nafiunfium di Atijamit ban nammi, ‘Ínje eenomi Añiilau ati Atijamit.’ Kaanjaat Atijamit namammaŋ bee kapakenool iñeme, apakenool man ujukaal iñeme!” 44Kúkuuak kafaaŋenoorimi tín tákon di oo koo poop insi kujelool mo’omu. 45No’onu kajuum balaraay yok bee mo wáriiŋe sirig sífeegiir tutularaay di rímmi túk fímenumi mof mukila búrom. 46Ban nan ríiŋumi sirig sífeegiir Yensa nacibulomi, “Eli, Eli, Lema Sabak-taani?” Yoo eenomi, “Atijamit úmboom, Atijamit úmboom, wau kaane nubetenom?” 47Bukan kuceen di kajuumutomi man koom di ejamey mo’omu di kommi, “Ániinaau umu oomu bo nawonke Eliya.” 48Ákon di bukoo nateyulomi galab aŋar jibur aboojenumi di binegar aban nakaanujomi di funuk man asenumi Yensa man acuut. 49Bare karinomi di kommi, “Jikobaal man ujukaal manteer Eliya panabil bee kapakenool!” 50Yensa nalaañ acibuloorumi, ban nañak lár. 51Kafulak káamakak káyinimi fatiyaay di síndeneey yati fukobaf fáñiiaaf di kujisomi fac titoorey, kápurum fatiya bee tentaam. Mofam di múliliŋenoorumi kukoobaak di kufumomi wúm. 52Kuyaakak poop di kúwambulimi, ban bukan kajuupoe kati Atijamit kaceteenumi di kuyitomi bee di eroŋey 53nan Yensa Atijamit áyitenuloomi di kacetumi. Di kúpurum di kuyaakak kooliil kujaw bee di ésukey yáamakey yálirooraay, boo bukan kajuupoe kujukiimi. 54Nan arungaau ati kutiikaak Kúroomanak di kutiikaak koola kalakomi kapooyak Yensa, di kujukumi káliliŋenak kati yentaamey di wanoosani wakammi, di kúkolimi máamak di kommi, “Malegen ume eenomi Añiilau ati Atijamit!” 55Di bajumi poop kuseek kajuupoe kariibooreenulomi di Yensa kápurumul Galili bee karambenool, kajummi lói man kommi di kajiker. 56Kuseek kukila kalakotomi, koo eenomi Mariyaama ati Magadalen, di Mariyaama Yankuba di Yosef iñaayiil, di poop aseekau ati Jebede. 57Nan ríiŋumi káliimaraay, di bajumi abaja áamak ápurulo Arimate, an koonemi Esufa, oo nakankaan poop ariiba ati Yensa no’ona. 58Najawumi bee di Pilat man alawoomi mati biiŋab bati Yensa. No’onu Pilat nakaten furim man kusenool bo. 59Esufa natebumi biiŋab aban, naguububomi di jíboocin. 60Nájeetumubomi ban nafintenubomi dóo di fuyaakool funkulaf facemeenimi di fúlankiinaf aban, nabakenumi fukooba fáamak alook di fúnokenumaaf fati fuyaakaf, ban nápurubomi. 61Mariyaama ati Magadalen di Mariyaama aamu koo noo to, man kulakoe kujonkoorufomi. 62Di furabooraf, foo eenomi funakaf fati kálebienak, kúsimenaak kunifaanak kati Atijamit di Kufarisaak kuceenak kujojumi di bújonlenab bati Pilat. 63Di kommi, “Anifaanau, wúli nuwoolowoolo man agaajooraau akila aregeenumi nan alakomi dúniyaay: ‘Kunak kúfeegiir fácul, pániyitenuli di kacetumi.’ 64Moo kaane sen buruŋ man kupooy fuyaakool manteer bee kunak kúfeegiir, takum kuriibaool kujaw kúkuut biiŋool, ban di kureg bukanak, nayitouloyito di kacetumi. Ban fugaajooraf fúlamukaaf panfufaŋ man fújakaatie fútiyaaraf. 65Pilat nalaañiimi, “Jiŋar kupooya kápuye man jijaw jipooyufo jak nan man jiŋoolenumi eeno.” 66Di kujawumi kulookulanken lit fukoobaaf fácilimbenimi ban di kukaan fúmanjum mbi kumanj kaanjaat bagorene fúnokenumaaf fati fo ban di kujuumenuto kupooya man kupooy jak.

will be added

X\