MATIU 26

1Nan Yensa abaneenumi kaliikitenak koola, nammi kuriibaool, 2“Nan man jimanjumi eeno mati kunak kugaba fácul káaningak kati Ewuujey yati Njalayiri pánkuriiŋul, ban Añiilau ati anau pankusofool kusen kulatoorool man kufaaŋenool di ébaarey yati búpinab.” 3Nanan nákonan kúsimenaak kunifaanak kati Atijamit di Kúyahuud kunifaan kuceen di kujojumi tákon di síndeey yati ásimenaau áamakau ati Atijamit, an kuwonkemi Kayafas. 4Di kuñesumi buruŋ mampi kusofumi Yensa ñátum kutunt man kubujool. 5Bare di kommi, “Takum ukaanaal mo di nanan nati káaningak uke, kaanutumojaat pankuyiten káguuloor.” 6Yensa nalakoeenumi di ésukey yati Betani di síndeey yati Simon, ániine an kafaañak kusofeenumi. 7Nan kulakomi káliimenak, aseek aceen nanokenulomi di jiraafa jati alabasuta jabajumi mumelam maputemi súum jan butumujo burioe máamak, náyuenumomi di fúkaaf fati Yensa. 8Nan kuriibaool kujukumomi, di bóli’iimi máamak, di kommi, “Jijiker, man akajenumiñaa? 9Mati mumelam ume mooteene kanoomeneeni butum báamak, ban sígodi sikila pansiseneeni kabajutumi” 10Bare Yensa namanjumi wan kusankenumi nalaañeniimi, “Waa kaane di joom di kagaalen aseekau? Nakankaan mukaana majake di ínje. 11Muyuul panjibaj kabajutumi nanoosani, bare leejibajom nanoosani. 12Man áyueññaa mumelam maputemi súum di ínje moo bee kajonjoorom kafokak kúmboom. 13Iñeme ínje eem di ereguul malegenam, banoosani bampi bukanak kúriiŋenumi furimaf fajakaaf ufe fati Atijamit bee di kati dúniyaay búrom, pankuregen wan aseekau umu akammi man bukanak kuwoolo mati oo.” 14Yúdas Isikariot, ákon di kúriiŋenaak uñeney di kugabaak kati Yensa, najawumi bee di kúsimenaak kunifaanak kati Atijamit. 15Man ammi, “Irambenuujaat man jisof Yensa, waa joote esenom?” Di kuliikumi sígodifori sooni kabanan di uñen ban di kucaamoomi so. 16Ban káŋarum to Yúdas nalakomi eñes buruŋ bampi ápurumi akaan kusof Yensa. 17Di funakaf fútiyaaraf fati karuukenak kati káaningak kati Mbúur Yabajutumi Múliitenuma, kuriibaak kati Yensa di kubilumi bee di oo, di aaney, “Boobei numaŋumi man ujaw ucookoori furiaf fati káaningak kati Ewuujey yati Njalayiri?” 18Nalaañeniimi, “Jijaw bee di ésukey yáamakey tijoon an aceen, ‘Aliikitenaau naane, nanan noola nírindiiŋ. Oo di kuriibaool pankuruuken káaningak kati Ewuujey yati Njalayiri di eluupi.’” 19Ñaa kuriibaool di kukammi nan man Yensa aregiimi eeno, man kucookoorumi furiaf fati káaningak kati Ewuujey yati Njalayiri. 20Nan ríiŋumi káliimaraay, Yensa di kúriiŋenaool uñeney di kugabaak di kulakomi tákon furiaf. 21Nan kulakomi furiaf, naaniimi, “Ínje eem di ereguul malegenam, ákon di muyuul pánapur di ínje.” 22Di táañi’iimi máamak, di kutaatumi eceeŋooley ákon-akon, “Arungaau, mante ínje room?” 23Nalaañenumi, “Ákon di muyuul an uriooremi di ínje di ebooley yákoney, oo aatumi bee épurey di ínje. 24Añiilau ati anau, panalet nan man ciikimi moola eeno. Bare búyiikab bulako di aatumi bee ekaaney man kusofom. Pánkoyumeen an akila awoleenutijaat!” 25Yúdas, aatumi épurey di Yensa fáculey, poop naceeŋumi, “Aliikitenaau, mante ínje room?” Yensa naanoomi, “Au urege mo.” 26Nan kulakomi furiaf káliimenak, Yensa naŋarumi fúmbuur, nasalumi aban, namiinufomi asen kuriibaak, di aaney, “Jiyab jiri. Ure eniilom.” 27Naŋarumi éraanuma, nasalumi aban naseniimi, di aaney, “Jiyab jiraan, búromuul. 28Ure fúsimom, ñátum di fo Atijamit nakaan kasofoorak koola di muyuul. Pánfuyui, man bukan kajuupoe majakutiil mubonketi. 29Ínje eem di ereguul, ínje letilaañ iraander wayin bee nampi funakaf fukila fúriiŋumi fampi ínje di muyuul ootaami eraan wayin yunkul di jáyiaj jati Ampaom Atijamit.” 30Yensa di kuriibaool di kúcimmi kácim kati esaley yati Atijamit, ban di kúpurutomi kujaw bee Furembooraf fati Uwoliiw. 31Yensa naaniimi, “Di fukaf fo’ofu fati jaat, muyuul búrom panjilaañ bálamuk mati ínje. Mati ciikiciik mati, ‘Panibuj amataau, ban kayooŋak kati sisahaas pankuyiisoori nañ.’ 32Bare nampi Atijamit áyitenulammi bee eroŋey, paniyabuul fácul bee Galili.” 33Peter naregoomi, “Handeneen bukoo búrom pankulaañ bálamuk mati au, ínje letilaañ bálamuk jáng.” 34Yensa nalaañenoomi, “Ínje eem di ereguul malegenam. Fukaf fo’ofu fati jaat, bala’a kéenak kulit, panuñoosom ñooni ñáfeegiir mati umanjutom.” 35Peter naanoomi, “Handeneen au oote ecet di ínje, letiñoosi.” Kúriiŋenaool karinomi moo mákonam kuregoomi eeno. 36Yensa di kuriibaool di kujawoorumi bee tanat tati Gesemani, nammi kuriibaool, “Jilako taate, man ínje ijaw bee uba man ilaw bo.” 37Naŋarumi Peter di kuñiilak kugabaak kati Jebede man kuriiboorumi, no’onu di tooŋoomi káboteni man táañioomi máamak. 38Naaniimi, “Yuutom egagaal máamak, jeheemeen bee ecet. Jilako taate, man jikooñaam.” 39Napummi tet ceb nalomi kúfima tentaam ban nalawumi, “Ampaom, kaanjaat paŋŋoolen kaan, ure’eten éraanumaay uye yati búyiikab di ínje. Hani moo takum wan imaŋumi mbi ukaan, bare wan umaŋumi mbi ukaan.” 40Nalaañulomi bee di kuriibaool, tiatookiimi kámooraak yím. Nammi Peter, “Kama, jiŋoolenut jíkaanum di ínje wáriiŋe erig yákon room? 41Jíyilo man jilaw Atijamit takum Seetaanaay eŋoolen étiiwuul. Mati búyegetab malegen bubebeb, bare eniiley élaamolaamo.” 42Nalaañumi ápur kagabuntenak man alawumi, “Ampaom, kaanjaat leeŋoolen kaan man íraanaati éraanumaay uye yati búyiikab di ínje, wan umaŋumi mbi ukaan.” 43Nalaañulomi inki nátookuliimi man kúmoorie, mati kúcilak kooliil kúlebilebi. 44Ñaa nakatiimi bálamuk, nalaañumi káfeegintenak man alawumi kúlawak kákonak. 45Nalaañumi bee di kuriibaool man aaniimi, “Muyuul, hani bee iñeme jooju kámoori mba kayoolo? Jijiker, nanan nírindiiŋ. Añiilau ati anau pánkupur di oo ban di kukaan man kusofom kusen di kañenak kati kukaana majakut. 46Jiyito, man uja’aal. Jijiker, aatumi épurey di ínje akaan man kusofom náriiŋuloriiŋ.” 47Nan Yensa aamimi kasankenak, Yúdas, ákon di kúriiŋenaool uñeney di kugabaak, náriiŋulotomi di jameeŋ yáamak yaakenulo muliba mabaake di simooŋ. Bukoo kúsimenaak kunifaanak kati Atijamit di Kúyahuudak kunifaanak kuceen kuboñumi man kusof Yensa. 48Iñeme Yensa ápuraool Yúdas naregeeniireg mati fúmanjum, di aaney, “Ampi icuufumi di jimanj oo, jisofool.” 49Ñaa Yúdas najoonenumi taac bee di Yensa, nammi, “Aliikitenaau, isaafi kásuumaay!” aban nacuufoomi. 50Yensa nammi, “Apaalom, waa nubile taate?” di kubilumi kutookoomi ban di kúbiipooroomi bíp man kusofoomi. 51Ákon di kalakomi di Yensa náfoonulumi jilibaaj jabaakaaj joola man acanumi kawosak kati ákon di kumiiceelak kati ásimenaau áamakau ati Atijamit. 52Yensa naanoomi, “Laañen jilibaaj jabaakaaj jooli di kafoonak. Mati anoosani áfoonulumi jiliba bee mati futiik, namanj mati pánacetum di jiliba. 53Mante au nusosof mati letiŋoolen ilaw Ampaom, yaŋ man áboñul taate uyooŋ wawuuje uñen di ugaba wati simaleeka sitiika? 54Bare kammojaat, buu pan furimaf fati Atijamit fúliroor, fasankenumi mati mo’omu moote kabajo?” 55Nanan nikila Yensa nammi jameeŋey, “Mante ínje ákuu, an jibile bee esofomey di muliba mabaake di simooŋ? Balayoobalay, nilakoeenlako kaliikiten muyuul dóo di fukobaf fáamakaf, ban jisofutom noo. 56Bare mo’omu búrom mukankaan mambi wan kuboñaak kuciikumi di furimaf fati Atijamit úliroor.” No’onu kuriibaool búrom di kúpurumi di oo man kuteyumi kufasoor. 57Bukanak kasofeenumi Yensa di kújeetumoomi bee di síndeey yati ásimenaau áamakau ati Atijamit, an koonemi Kayafas, ban kuliikitenaak kati sílingaas di kunifaanak kati bukanak kujojumi. 58Bare Peter nariiboomi bálamuk lói bo biyok alofen titoorey yati fankaf fati síndeey yati ásimenaau áamakau ati Atijamit. Nájawudomi alako tákon di kupooyaak bee ejuk waatumi bee kabajoak. 59Kúsimenaak kunifaanak kati Atijamit di kugamenaak kati fugamenaf fáamakaf búrom di kujojumi tákon kuñesumi kalepoor mati Yensa, mambi kubaj buruŋ bati ebujool. 60Handeneen kúyiisena kubunta kajuupoe man kubilumi kúyiisen kurim kati kalepoor mati oo, bare kuŋoolenut kuñes an nan man kumaŋumi eeno. Di múlamukaam, kúniine kugaba kamaate kápurulo kujuum fáculiil 61man koone, “Ániinaau o’omu nammi, panaŋoolen akajen fukobaf fáñiiaaf fati Akiiyaau ban nalaañ ateepufo aban di kunak kúfeegiir.” 62Ñaa ásimenaau áamakau ati Atijamit nayitomi ajuum júd man ammi, “Mante ubajut kalaañen room? Wo’owu waa kúniinaak buke kommi di kasankenak kati kataaken mati au?” 63Bare Yensa aregut hani furim. Ásimenaau áamakau ati Atijamit naanoomi, “Ínje ibaateni di kareesak kati Atijamit aroŋaau, régoli kaanjaat au eenomi Apakenaau Áamakau, Añiilau ati Atijamit.” 64Yensa nalaañenoomi, “Muyuul jirege mo. Bare ínje eem di ereguul, fáculey panjijuk Añiilau ati anau balakoe di kañenak káridak kati Atijamit ati Kánkum, man aam di káwaloul di kurolaak kati fatiya!” 65Ásimenaau áamakau ati Atijamit nacacumi uloaool wáamakaw aban nammi, “Oo asankenumiñaa ñíi! Wau kaane man uñesaal kúyiisena kuceen! Wulaal di kuko’olaal nujamaajam kasankenak koola ñíi! 66Waa jiwoonoorumi kama?” Di kucibulomi, “Oo aate ebuji.” 67Di kulacenumi di buulool ban di kutekumi, bukaaku di kutancool, 68man kooneñaa, “Au aboñaau, Apakenaau Áamakau! Régoli ai ateki?” 69Nan Peter alakomi téeŋeraay di titoorey yati fankaf fati síndeey yati ásimenaau áamakau ati Atijamit. Amiiceel ajaŋa aceen ati ásimenaau áamakau ati Atijamit, nabilumi bee di oo man aanoomi, “Au poop oomueen di Yensa ati Galili.” 70Bare Peter nañoosumomi di fáculiil búrom, “Ínje imanjut wan usankeneñaa di wo.” 71Di múlamukaam, nápurubomi bee too di fúlamutaf, ajaŋa aceen ajukoomi, nammi bukaaku kammi bajuumerab, “Ániinaau o’omu oomueen di Yensa ati Nasaret.” 72Peter nalaañumi añoos aban nabaat, “Ínje imanjut ániinaau umu.” 73Nan piyout mo’omu bukaaku kammi bajuumerab kulofumi Peter di koonoomi, “Di malegenam, au poop ákon di bukoo, mati hani basankenerab booli burereg mo.” 74Bare Peter nabaatumi kabaat, “Ínje imanjut ániinaau umu.” Mo’omu nasankenumi aban ceb, kéen di kulitumi. 75Peter nawoolomi wan Yensa aregeenoomi: “Bala’a kéenak kulit, panuñoos ñooni ñáfeegiir mati umanjutom.” Nápurumi bee téeŋeraay man áruurenumi manteer alikij.

will be added

X\