MATIU 25

1“Jáyiaj jati bukinab bajakaab joonojoono nan mo’omu. Di bajumi kujaŋa kooni uñen kaŋarumi síwuŋenumaiil ban di kúpurumi bee kayaño ati fuyabaf. 2Kujaŋa kooni futok di bukoo kulinlout, ban futokey yaayu kalinloe. 3Mati nan kalinloutak kuŋarumi síwuŋenumaiil, kújeetumut karasiin yiceen di yóro, 4bare kalinlaak di kuŋarumi síwuŋenumaiil di karasiin yiceen di yóro. 5Ati fuyabaf áriiŋaaliulout, di wuujuto kaaniil búromiil kaŋot di kúmoorimi. 6Bareñaa nan ríiŋumi di titoorey yati fukaf di kujammi kacibuloorak, ‘Ati fuyabaf oomu nábileul! Jípurul jijaw bee kañayo’oolak.’ 7Ñaa kujaŋaak kukila búromiil di kuyitomi man kújeekenumi síwuŋenumaiil. 8Ban kalinloutak di kommi kalinloaak, ‘Jíwunoli karasiiney yooluul, mati síwuŋenumaoli karasiin ebamban.’ 9Bare kalinlaak di kulaañeniimi, ‘Ukammojaat, karasiiney leeyaj bee di wúli ban poop leeyaj bee di muyuul. Jijaw bee kanoomeneyomi man jínoomul bee di kúkouul moo faŋ man jake.’ 10Kalinloutak koo di kúpurulomi kujaw bee énoomuley karasiin ceb, ati fuyabaf náriiŋuumi. Kalinlaak kajonjoorumi di kunokenoorumi di ati fuyabaf síñakon bee di fuyabaf kuban, kábabumaak di kuwambenimi. 11Bálamuk jayiinkun kalinloutak di kúriiŋuumi poop, di kucibulomi, “Arungaau, arungaau, wámbuloli kábabumaak.” 12Bare nalaañeniimi, ‘Ínje eem di ereguul malegenam, imanjutuul.’ 13Moo kaane, jíkaanum mati jimanjut funakaf mba nanan nati élaañuley yúmboom. 14“Jáyiaj jati bukinab bajakaab joonojoono nan mo’omu. Di bajumi ániine aate ejaw kajaaburuŋ, náwonkuumi kumiiceelool man akatenumi búrookaab bati fubajool. 15Nasenumi anoosani wampi aŋoolenumi. Ákon nasenoomi sígodi sitalant sooni futok, aamu sigaba, áfeegintenau yákon riiboor. Ban najawumi kajaaburuŋ. 16Ákon ayabeenumi sígodaas sitalantas sooni futokey najawumi galab arokensomi. Ban nabajumi búrembenab bati sitalantas sooni futok. 17Moo mákonam aamu ayabeenumi sígodaas sitalantas sooni sigaba narokenusomi poop nabajumi búrembenab bati sigaba poop. 18Aamu ayabeenumi égodaay etalantey najawumi tiawokumi busun man ayof égodaay yati arungaool. 19Nan piyomi arungaau ati kumiiceelak kukila nalaañulomi di kajaaburuŋ ban namaŋ bee emanj man kurokenumi sígodaas soola eeno. 20Ayabeenumi sitalantas futokey nájeetumuumi sitalantas sooni futok sati búrembenab, di aaney, ‘Arungaom, au sitalantas sooni futokey nusene ínje. Jiker, nibabaj búrembenab bati sooni futok.’ 21Arungaool naanoomi, ‘Nukankaan jak, au amiiceel alegen ban afiumaay. Mati núrindiiŋ kafium di waaf wasiinkun, panikaten búrookaab bati waaf wáamak. Nókenul man ubaj kásuumaak kati arungai.’ 22Ban aamu abajeenumi sitalantas sigabaas poop nabilumi, di aaney, ‘Arungaom, au sitalantas sigaba nusene ínje. Jiker, ínje nibabaj búrembenab bati sitalantas sigaba poop.’ 23Arungaool naanoomi, ‘Nukankaan jak, au amiiceel alegenoe ban afiumaay. Mati núrindiiŋ kafium di wasiinkun, panikateni búrookaab bati waaf wáamak. Nókenul man ubaj kásuumaak kati arungai.’ 24Ayabeenumi etalantey yákoney poop nabilumi, di aaney, ‘Arungaom, ínje nimammanj mati au an átaañie, nukankaan nan an ajalemi wan alukutumi, ban najojenemi ban ayiisikenutumi bálut. 25Ñaa ínje níkolieenkoli, nijawumi iwokumi busunab man iyofuyomi. Jiker, yo’oye yan usenammi.’ 26Bare arungaool nalaañenoomi, ‘Au amiiceel ájakaatie ban nálaamoe! Au numanjeemmanj mati ínje nikankaan nan an ajalemi muri man alukutumi, ban najojenejojenumo ayiisikenutumi bálut? 27Au ooteene kamaageneen etalantey yúmboom kamaagemi man kurok. Kaaneemmojaat, nan ilaañulomi paniyabeneene búremben di yo. 28Ñaa jíbotul etalantey yákoney di oo, man jisen abajumi sooni uñeney. 29Mati ampi abajumi Atijamit panabenenool, bare ampi abajutumi, hani jasiinkuney di wan asofumi woo naake, Atijamit pánabotuuwo di kañenool. 30Ban nabetenumi amiiceelau umu alegenoutau téeŋey di érimey, ban káciiŋit di katooñoor kommi.’ 31“Nampi Añiilau ati anau alaañulomi di mákalaam moola nan áyi di simaleekaool búrom, panalako di ejunkutey yálirooraay yati jáyiaj joola.” 32Bukanak búrom kati dúniyaay pankujojenoor tákon di bújonlenool. Ban pánapajul bukanak bukaaku di bukaaku, nan man amataau ápajulemi sisahaas di sijaameenas eeno. 33Pananen sisahaas di báridool, bare sijaameenas di bamayool. 34Ñaa áyiau panaan kalakomi di báridool, ‘Wóoy muyuul kan Ampaom Atijamit asenumi kásuumaayak. Jibil man jooken jáyiaj jajonjoorimi mati muyuul káŋarum no’ona di butuukab bati dúniyaay. 35Nan icaaretumi di jisenammi wampi iri, nan baraanab busofammi di jisenammi wampi iraan, nan ikammi ajaaburuŋ di jiwalenammi jak, 36nan mutugenam musofammi di jisenammi wampi ikaano, nan íju’utumi di jibilumi man jijukammi, nan ilakomi dán bukanak kukuleimi di jibilumi jijukammi.’ 37Ñaa kajoonaak pankulaañenool, ‘Akiiyaau, noonei nujuki man ucaarete ban nuseni wampi uri, mba noonei nujuki baraan man busofi ban nuseni wampi uraan? 38Noonei nujuki man ukaane ajaaburuŋ man uwaleni jak, mba noonei nujuki mutugenam man musofi ban nuseni wampi ukaano? 39Noonei nujuki man úsumute mba dán bukanak kukuleimi ban nubil ujuki?’ 40Áyiau panalaañeniil, ‘Ínje eem di ereguul malegenam, nanoosani nan jikammomi an ákon di kuriibaom kasofutimi di waaf, moo ínje jikammi!’ 41Áyiau panaan kalakomi di bamayool, ‘Jítoro di ínje! Atijamit abet búyiik di muyuul. Jijaw di sambunas sáceteriitumi sajoonenimi mati Seetaanaay di simaleekaas sooliyo. 42Mati nan icaaretumi jisenutom wampi iri, nan baraanab busofammi jisenutom wampi iraan, 43nan ikammi ajaaburuŋ jiwalenutom, nan mutugenam musofammi jisenutom wampi ikaano, nan íju’utumi jisontenutom, nan kukulammi jibilut jijukom.’ 44Koo pankulaañen poop, ‘Akiiyaau, noonei nujuki man ucaarete, mba baraan di busofi, mba nukaan ajaaburuŋ, mba mutugen di musofi, mba núsumut, mba di kukuli dán bukanak kukuleimi, ban wúli umaŋut urambeni room?’ 45Áyiau panalaañeniil, ‘Ínje eem di ereguul malegenam, nanoosani nan jikaanutumi an ákon di kuriibaom kasofutimi di waaf, moo ínje jikaanutumi.’ 46Bukanak buke pankucesoori bee ban kútekak kúbaneriitumi, bare kajoonaak pankuyab eroŋey yati bándoorey.”

will be added

X\