MATIU 24

1Nan Yensa ápurumi di fukobaf fáamakaf ban nalakomi ejaay, kuriiba kuceen di kúlofuloomi, man kuñuuroomi man kúyiisool fukobaf fáamakaf. 2Bare nalaañeniimi man ammi, “Uru ran jijukumiñaa, lee roo? Ínje eem di ereguul malegenam, pambaj hani fukooba fákon leefulako to faate karembenoor di fupaal fo.” 3Di múlamukaam, nan Yensa alakomi di Furembooraf fati Uwoliiw, kuboñaool di kubilumi bee di oo koo sicebiil, di kuceeŋoomi, “Régoli, noonei uru búrom eete kabajo, ban fúmanjum fei noote ejuk mati élaañuley yooli di ebaney yati dúniyaay?” 4Yensa nalaañeniimi, “Jíkaanum máamak takum jimaŋ man an abuntuul. 5Mati bukan kajuupoe pánkujawumul di kareesom, di aaney, ‘Ínje eenomi Apakenaau Áamakau, ínje eenomi Apakenaau Áamakau,’ ban pankubunt bukan kajuupoe man kújim. 6Panjijam mati kutiik di kákuumoorak kati kutiik bare takum jíkoli. Mati waafaw uwe woote emond ubajo, bare ebaney yati dúniyaay ériiŋoorut. 7Mof pammutiiken mupaalumo mof, ban jáyi panjitiiken jipaalujo jáyi, ban pambaj bacaar báamak di káliliŋenoor kati yentaam káamak banoosani: 8Bare mo’omu búrom mukankaan nan jariey yatooŋemi bala’a aseek aroŋ añiil. 9“Mo’omu mubajojaat panjisofi, panjiteki ban di panjibuji. Bukanak kati dúniyaay búrom pankulatuul mati muyuul kuriibaom. 10Kuriibaom kajuupoe pankulaañ bálamuk mati kafiumak kooliil ban pánkupuroor man kusenoor di poop pankulatoor. 11Ban kuboña kubunta kajuupoe pankuyito man kubunt bukan kajuupoe man kújim. 12Mati bújakaataab pambubeneno, kamaŋoorak kati bukan kajuupoe pánkulaamo. 13Bare ampi amuutenumi bee mo di fúbanumaf, oo panabaj epak. 14Bukanak kootumi káriiŋen furimaf fajakaaf ufe fati jáyiaj jati Atijamit banoosani di dúniyaay búrom nan káyiisen bee di kati mofam búrom, ban ñaa ebaney yati dúniyaay páneriiŋ. 15“Panjijuk ‘Waafaw wajiteniaaw’ wan aboñaau Daniel asankeneenumi no’ona! Woo panujuumeni di fulakaaf fáñiiaaf (jikat man kuliina mbi kúlaul). 16Ñaa kammi di kapanak kati Yúdea koote etey bee di kúlankiinak. 17An ammi di kasondak kati eluupey, takum anoken eluupool bee eŋar wambarool. 18An ammi di kalaakool takum álaañul man aŋar kaloaool káamakak. 19Di kunakak ko’oku, búyiikab bulako di kuseekak kaakumi úrookaaw di kuseekak kammi di karaafenak! 20Jilaw Atijamit mambi funakaf fati etey fúbajoaati titoorey yati fujamaraay mba di funakaf fati kálebienak. 21Mati búyiik báamak baatumi kabajoak butamburerut bubajo baanomi nan mo’omu kabiñoo di fúcitumaf fati dúniyaay bee mo iñeme, ban bootut kabajorer jáng. 22Atijamit átemienutujaat kunakak kati búyiikab, hani an letaŋoolen aroŋ. Bare mati bukanak kamukenimi koola, kunak kukila pánkutemi. 23Ampi areguumi mo’omu, ‘Jijiker, Apakenaau Áamakau oome!’ mba ‘Ooma!’ takum jifium. 24Mati kupakena káamak kubunta di kuboña kubunta pánkuyitoul ban di kúyiisen kúmanjum di wajamurerutimi man kubunt kuŋoolenjaat hani kan Atijamit amukenumi. 25Jíyenten, nireguureg no’ona. 26Ñaa koonuujaat, ‘Jijiker, oo ooma di baŋaanab,’ takum jípur bee bo. Koonuujaat, ‘Jijiker, oo ooma dáara di kumoorak,’ takum jíyineniil. 27Mati élaañuley yati Añiilau ati anau, yoo panekaan nan kaliboorak kápurumeuumi ban búrabumemi ban di kufijijen bee ban bújonumemi nanoosani. 28Nan man sígutum siraakemi eeno, moo múyiisenyiisen mati biiŋ boom bo. 29“Nampi kunakak uku kati búyiikab kubanumi, bala’ab pámburimen túk, ban jileeŋaj leejiwuŋen, bootab pámbuloul di kátula, ban wánkumaw wammi di fatiya pánuliliŋeni. 30Ñaa fúmanjumaf fati Añiilau ati anau panfuraj di fatiya, ban bukan kati kasankenookasanken búrom di dúniyaay pánkuciiŋit. Di élaañuley yati Añiilau ati anau di kurola kati fatiya, bukanak pankujuk kánkumak koola káamakak di mawuŋam máamakam mabajumi di Atijamit di móro. 31Nampi kábiil káamak kulitenimi, Añiilau ati anau panaboñ simaleekaas soola bee di ufeefaw ubakiiraw wati dúniyaay, man sijojen bukanak kan Atijamit amukenumi kápurumul banoosani. 32“Jíliikenum búpunduunab. Nampi bulakomi ereebey ceb muyuul di jimanj mati súm fujamaf fulofulolof. 33Moo poop, nampi jijukumi uru búrom, di jimanj mati élaañuley yoola elofulolof ñaj. 34Ínje eem di ereguul malegenam, mati bukanak kati iñeme leekucet uru búrom babajout. 35Dúniyaay di bukinab bajakaab pánsijim, bare kurimom léekujimurer. 36“Bare an amanjut mati funak fukila di nanan nikila. Hani simaleeka mba Añiilau amanjut, bare Ampaau ceb. 37Nampi élaañuley yati Añiilau ati anau panokoor nan wabajoeenumi di kunakak kati Nuha. 38Mati no’ona bala’a mumelam máamakam mubilumi, bukanak kulakoeenlako furi di baraan, di kayaboor, bee nan funakaf fukila fan Nuha ájupomi di busaanaab báamakab. 39Bukanak kumanjut waatumi kabajo bee mo nan mumelam máamakam mubilumi muyoomeniimi búrom. Mo’omu mootumi ekaaney nampi Añiilau ati anau alaañulomi. 40Kúniine kugaba pankulako burok di kalaak, ákon panaŋari man aamu akati to. 41Kuseek kugaba pankulako etamp tákon, ákon panaŋari man aamu akati to. 42Moo kaane, jíkaanum mati jimanjut funak fei Akiiyauul aatumi bee ebiley. 43Bare jimanj mo’ome, ati eluupey amanjeenujaat nei ákuuau aateenumi ebiley di fukaf, moo pánakaanumeen ban letakatenool man afum eluupool. 44Muyuul joote kajonjoor nanoosani. Mati Añiilau ati anau pánalaañul nan jileemi di kawoonoor mati ebiley yoola. 45“Kama ai eenomi amiiceelau afiumaay ban nalinlo? Lee oo an arungaool akatumi búrookaab bati eseney furiaf bee kumiiceelak bukaaku nan ceeŋumi? 46Amiiceelau akila jakoojak nampi arungaool alaañulomi bee síndo’ool pánatookul nakaan burokool. 47Ínje eem di ereguul, arungaau panakaten amiiceelau akila man ateb búrokaab bati fubajool búrom. 48Bare kaanjaat amiiceelau akila ájakaatimi naanooromi, ‘Arungaom létalaañaaliul,’ 49ban nataatumi etekey kupaalool kumiiceel bukaaku, ban nalako furi di eraan, nákali di kupaalool. 50Arungaau ati amiiceelau akila pánalaañul funak fákon di nanan nan amiiceelau o’omu asofutumi mati élaañuley yoola. 51Arungaool panatekool jákaati ban nanaamoorool di bukanak kati mamisam, ban káciiŋit di katooñoor kommi.

will be added

X\