MATIU 23

1Nan mo’omu múpurutomi Yensa nammi jameeŋey yati bukanak di kuriibaool, 2“Kuliikitenaak kati sílingaas di Kufarisaak kusankenesanken ñátum di fujuumaf fati Muusa. 3Moo muyuul joote ekaan wampi kureguumi, bare takum jikaan nan man kukaanemi eeno. Mati kuliikiteneuuliikiten wampi jikammi bare koo di kúkoiil kúkaaneriit wo jáng. 4Bukoo kurookenerooken búrooko bálebie bee di bukaaku, boo bútebab bátaañiaab bee eteb moo, bare bukoo di kúkoiil kúmaŋeriit karambeniil hani jayiinkun man kuteb bútebab bukila. 5Kukaanekaan mukaanaiil búrom mambi bukanak kujukiil. Mati kujoonenejoonen muceesam mooliil maakumi furimaf fati Atijamit múkalaa ban balisab booliil bubaak di mo. 6Kumaŋemaŋ mansi kulako fulakaaf fafaŋumi man fúlebienie di wáaning di kulakaak kafaŋumi man kujake di kukobak. 7Kumaŋemaŋ mansi bukanak kusaafiil di kunoomenak, ban di kumaŋ mansi bukanak kuwonkiil kuliikitenaiil. 8Bare hani ákon di muyuul aatut ewonki aliikitena mati muyuul aliikitena ákon ceb jibaje, mati muyuul búrom batiaay. 9Ban hani ákon di muyuul jootut ewonk an ampauul baabe di dúniyaay, mati muyuul Ampa ákon ceb jibaje ammi di bukinab bajakaab. 10Di poop hani ákon di muyuul aatut ewonki arunga. Mati muyuul arunga ákon ceb jibaje, Apakenaau Áamakau. 11Afaŋumi man ákalaae di muyuul, oo aate ekaan arokauul. 12Bare ampi atebenooromi Atijamit panawalenool tentaam, ampi awalenooromi Atijamit panatebenool fatiyaay. 13Yensa narulenumi kasanken man aaniimi, “Búyiikab bulako di muyuul kuliikitenaak kati sílingaas di Kufarisa! Muyuul mamisam! Mati muyuul jiwambenumi fúlamutaf fati jáyiaj jati bukinab bajakaab fúculey yati bukanak. Di poop mati muyuul di kúkouul jilatumi kanokenak dó di jífirenumi kaliikumi bee kanokenak dó! 14Búyiikab bulako di muyuul, kuliikitenaak kati sílingaas di Kufarisa bukaaku, muyuul mamisam! Mati muyuul jiguuñeguuñ waaf wati kuseek kati kújima, ban di jimaŋemaŋ bee éyiis ceb kalawemi baak. Moo kaane pánjiyabul kúnagak kafaŋumi man kúkalaae! 15Búyiikab bulako di muyuul kuliikitenaak kati sílingaas di Kufarisa! Muyuul mamisam! Mati jijawoojawoor jítip fal bee fal di mofam búrom man jítiiw búyeget bati an man ajaw asof buruŋuul, ñaa nan asofubomi di jikaanool man abaj kútek di sambunas sáceteriitumi ñooni ñagaba manteer wuuj kooluul. 16“Búyiikab bulako di muyuul! Mati muyuul jikankaan nan kúpuuma kaam di karuuoor! Muyuul joone, ‘Ampi abaatumi ñátum di fukobaf fáñiiaaf, kabaatak koola leekusofool. Bare an abaatumi ñátum di wambaraw wajoonenimi ñátum di sánaay yándomi dóo di fukobaf fáñiiaaf, kabaatak koola pankusofool.’ 17Muyuul sígot sájukeriitumi! Wei ufaŋumi man ubaje fúkaw, mante sánaay mba fukobaf fáñiiaaf fati Akiiyaau fakammi man sánaay éliroor? 18Muyuul jommi, ‘Ampi abaatumi ñátum di fúsimenaf, kabaatak koola leekusofool. Bare ampi abaatumi ñátum di kawulak kammi to di fúsimenaf, kabaatak koola pankusofool.’ 19Muyuul kaanoñaa nan bukan kápuume! Wei ufaŋumi man ubaje fúkaw, mante kawulak di fúsimenaf, mba fúsimenaf fakammi man kawulak kúliroor? 20Moo kaane ampi abaatumi ñátum di fúsimenaf, oo nababaat ñátum di fo di poop ñátum di kawulak kanoosani kasenimi to bee di Atijamit. 21Ban ampi abaatumi ñátum di fukobaf fáñiiaaf, oo poop nababaat ñátum di fo di poop ñátum di Atijamit ácinudomi. 22Ban ampi abaatumi ñátum di bukinab bajakaab, oo nababaat ñátum di ejunkutey yati Atijamit di poop ñátum di Atijamit alakomi di yo. 23“Búyiikab bulako di muyuul kuliikitenaak kati sílingaas di Kufarisa! Muyuul mamisam! Mati jípurenepuren jakaay yati naana, yati diil di yati kumin yan jitujumi. Bare muyuul jimaŋut jisof kaliikitenak kafaŋumi man kubaje fúkaw di sílingaas búrom, kaanomi nan majoonam, káboteniak, di poop kafiumak, ure jooteenumi ekaan bamoosut waawu. 24Muyuul jikankaan nan kápuume kaam di karuuoor! Muyuul éjiin ébira yalomi di muraanauul bare di jimer eñonkomma! 25“Búyiikab bulako di muyuul kuliikitenaak kati sílingaas di Kufarisa! Muyuul mamisam! Mati jiposepos di jitilul téeŋeraay yati éraanumaay di ebooley ériumaay, bare di jimeeŋenusomi di muria di muraana man jibajumi kápurumul di kamingenak di máfeketam nan man eenomi di úyegetuul. 26Muyuul Kufarisa kápuumiñaa! Jitooŋ jipos di jitilul síndeneey yati éraanumaay di ebooley ériumaay, kammojaat téeŋeraay yooliyo poop panetiluli. 27“Búyiikab bulako di muyuul kuliikitenaak kati sílingaas di Kufarisa! Muyuul mamisam! Mati muyuul joonojoono nan kuyaak kanaanenimi lasa tíen lec, téeŋeraay yooliko ejoŋoojoŋoor máamak, bare síndeneey ememmeeŋ di wool wati kacete di wanoosani wasikoe dóo wommi. 28Moo mákonam muyuul joonojoono nan bukan kajoone di fácul bukaaku, bare síndeneey yooluul jimemmeeŋ di mamisam di májakaataam. 29“Búyiikab bulako di muyuul kuliikitenaak kati sílingaas di Kufarisa! Muyuul mamisam! Mati jiteepeteep kuyaakak kajakaak kati kuboñaak di kajoonumi ban di jikarenukomi máamak. 30Ban di joone, ‘Kaaneenjaat wúli numaateemmaat no’ona di nanan nati kúfannaaniŋoli, wúli letunaamooreen di ebujey kuboñaak.’ 31Bare nan man kasankenak kooluul ko’oku kúyiisenumi eeno, mati muyuul eenomi úwoloorumaw wati kabujeenumi kuboñaak. 32Ñaa jirulen jifabel wan kufannaaniŋuul kutooŋeenumi nan piyaay. 33Muyuul siyela! Muyuul ulun! Buu joote epak di sambunas sáceteriitumi? 34Mati mo’omu jijanten jak, malegen paniboñuul kuboña, di bukan kalinloe, di kuliikitenaak kati buruŋab bati Atijamit. Panjibuj kuceen, panjifaaŋen bukaaku di ébaarey yati búpinab, ban panjitek bukaaku jákaati di kukobak kooluul ban di jicesooriil ésuk bee di ésuk. 35Moo kaane kútekak kati ebujey yati bukanak kakaanutumi waaf wajakut pánkoomi di muyuul, káŋarum no’ona man táatumulomi di ebujey yati Abel bee di ebujey yati Jakaria, añiilau ati Barakia an muyuul jibujumi too di titoorey yati fukobaf fáñiiaaf fati Akiiyaau di fúsimenaf. 36Ínje eem di ereguul malegenam! Kútekak kati mukaanaam umu búrom pánkoomi di bukanak kati jaat. 37“Wáay ínje! Yerusalem, Yerusalem! Yabujemi kuboñaak, yabujemi aleebumi sikooba kan Atijamit áboñeulimi! Ñoomasoon nimaŋeene kajojen tákon bukanak kooliyo di ínje nan man eyilool éfimenemi muciiwuyo eeno, bare jímaŋeriit. 38Atijamit akaan eluupuul elako tíikaar. 39Ínje eem di ereguul, leejilaañ jijukom, bee nampi jommi, ‘Kásuumaayak kati Atijamit kooku di ampi ajawulomi, oo eenomi ajawulomi di kareesak kati Akiiyaau.’”

will be added

X\