MATIU 22

1Yensa narulenumi di kaliikiten ñátum di kúreg kaaku man ammi, 2“Jáyiaj jati bukinab bajakaab joonojoono nan áyi aregumi kumiiceelool man kujonjoor fuyabaf fati añoolool ániine, 3naboñumi kumiiceelool bee di bukanak kabemeenimi bee di fuyabaf man aregiil kubil. Bare koo di kulatumi ebiley. 4Nalaañumi aboñ kumiiceel kuceen bee di kabemeenimi man kuregiil, ‘Fuyabaf fucookooricookoor fuban, kúmuunaak di múmuunaam maruukaam múmboom báraamule. Wanoosani ujonjoorijonjoor uban. Jibil bee di fuyabaf!’ 5Bare koo di kumoosumi bukoo ban di kujawumi burokiil, aamu najawumi bee di kalaakool, aamu najawumi bee ban ammi kayooŋenak. 6Bukaaku di kúloummi kumiiceelool di kutekiimi jákaati, manteer kubujiimi. 7Áyiau nañuumulumi máamak, ban naboñumi kutiikaool man kubujumi kubujaak kukila ban di kureemenumi ésukey yáamakey yooliil jaj. 8No’onu nammi kumiiceelool, ‘Fuyabaf fucookooricookoor fuban, bare kabemeenimi kuyajut ebil. 9Iñeme jijaw bee di úwaalooraw wati uruŋaw wáamakaw wati ésukey jíbemul kan jiŋoolenumi jibem bee di fuyabaf.’ 10Ñaa kumiiceelool kukila di kúpurutomi bee di uruŋaw man kuwonkulomi anoosani an kúkamboorumi, bukan kajake mba kajakut, kalimbisak tan fuyabaf fommi di kumeeŋumi tep bukanak kábemulimi. 11“Bareñaa nan áyiau anokenulomi di kalimbisak kukila bee ejukey kujaaburuŋak, nájukuromi ániine ákon akaanoutumi kaloaak káamakak kati fuyabaf. 12Naceeŋoomi, ‘Apaalom, au buu nunokenulo taate bakaanout kaloaak káamakak kati fuyab?’ Bare ániinaau natuntenumi sii. 13Áyiau nammi kurambenaak kati fuyabaf koola, ‘Jísingool ban di jileebool téeŋey di érimey. Ban búlok di katooñoor ceb kommi.’ 14Mati Atijamit nawonkenewonken kajuupoe, bare kupinaay kumukeni ceb.” 15Fáculey jayiinkun Kufarisaak kuceenak di kujawumi man kumaloorumi man kuñesumi kúceeŋ di kuwok di manlinlo mampi kuŋoolenumi kusof Yensa. 16Ban kuboñumi kuriibaiil kuceenak di kuriibaak kuceenak kati Herod bee di Yensa. Ñaa nan kúriiŋumi di koonoomi, “Aliikitenaau, wúli numammanj mati au malegenam nusankenemi, ban nuliikiteneliikiten wan Atijamit amaŋumi man bukanak kukaan malegenam. Mati au újawumeriit di kawoonoorak kati an di poop újikereriit fujuumaf fati an. 17Régoli ñaa waa nusofumi? Mante sílingaas soololaal sisenolaasen buruŋ bati esen basaafab bee di jáyiaj jati Áyiau Áamakau ati Róoma, mba sisenut?” 18Bare Yensa, namanjumi bújakaataab bati malinlaam mooliil, nammi, “Muyuul mamisam, wau joom di eñesey mampi jisofumi ínje ceb? 19Jíyiisom égodaay yan jícaamumemi basaafab.” Di kúyiisool égodi edenaari yákon. 20Ban Yensa naceeŋiimi, “Ai buulool di karees kei koom to?” 21Di kulaañenoomi, “Kati Áyiau Áamakau.” Yensa naaniimi, “Moo, kama ñaa, kalaañen poop bee di Atijamit wan akilumi.” 22Nan kujammomi, di wáaloiimi. Di kukatoomi bálamuk kujawumi taac. 23Di funakaf fákonaf Kusadusi kuceen di kubilumi bee di Yensa, di kommi mati bajut káyitoulak di kacetumi. Di kuceeŋoomi kúceeŋ kákon, 24di kommi, “Aliikitenaau, aboñaau Muusa naane, ‘Ániine abaje atiaay, acetujaat akatubo aseekool ban abajut añiil, atiool aate kálaañenul aseekau man koote ebaj kuñiil bee di ájimmi.’ 25Bajeembaj kutiaay kooni futok di kugaba titoorolaal. Átiyaarau nayabumi aseek ban nacet, babajut añiil aseekool nalaañumi ayabo di atiool. 26Di moo mákonam mukammi di agabuntenau di áfeegintenau yok bee di atokenau di agabuntenau. 27Di múlamukaam, aseekau nacetumi. 28Nampi Atijamit ayitenulomi bukanak di ecetey, ai di kúniinaak futokey di kugabaak panakilool man akaan aseekool? Mati koo poopiil kuyabeenooyab.” 29Yensa nalaañeniimi, “Muyuul jilolo, mati jimanjut furimaf fati Atijamit, di poop kánkumak kati Atijamit. 30Mati nampi Atijamit ayitenulomi kacetumi, leekuyaboor. Bukoo pankoono nan simaleeka di bukinab bajakaab. 31Bare iñeme, mati kapanak kati káyitoulak di kacetumi, mante muyuul jiliikenderut wan furimaf fati Atijamit fureguumi? Atijamit nammi, 32‘Ínje eenomi Atijamit an Iburehima, di Siyaaka, di Yankuba kumiiceelaetumi.’ Atijamit eenomi lee ati kacetumi, bare ati karoŋumi ceb.” 33Nan jameeŋey yati bukanak ejammomi, di wáaloiimi mati kaliikitenak koola. 34Bare nan Kufarisaak kujammi mati Yensa natontonk Kusadusiak ñátum di man alaañeniimi, koo di kujojoorumi tákon. 35Ákon di bukoo, amanja áamak ati sílingaas, nayinkool ñátum di kúceeŋ nawok di malinlo. 36Naceeŋoomi, “Aliikitenaau, élingaay yei efaŋumi man ebaj fúkaw di sílingaas?” 37Yensa nalaañenoomi, “‘Noote emaŋ Akiiyaau Atijamit ooli di ésigiri búrom, di yuuti búrom, di búyegeti búrom.’ 38Yo’oyu yoo eenomi étiyaarey ban yafaŋumi kákalaa di sílingaas búrom. 39Egabunteney yoo ekankaan nan ekila, ‘Noote emaŋ alaoori nan man umaŋumi fúkoi eeno.’ 40Sílingaas sati Muusa di síbukaas sati kuboñaak sijummi di fúlakenumaaf fati sílingaas usu sigabaas.” 41Nan Kufarisa kuceen kujojoorumi tákon, Yensa naceeŋiimi kúceeŋ kákon, 42“Waa jisofumi mati Apakenaau Áamakau? Búbajum bíine bati ai?” Di kulaañenoomi, “Añiilau ati Dauda.” 43Yensa naceeŋiimi, “Kama ñaa wau kaane nan Búyegetab Bátienaab bumeeŋumi Dauda, nawonkemi Apakenaau Áamakau Akiiyaool? Mati Dauda nammi, 44‘Atijamit Akiiyaolaal narereg Akiiyaom, Lako di báridom, bee nampi ikammi kulatoori fútobojumaaf fati úkamuni’? 45Kaanjaat Dauda nawonkeoowonk Akiiyaau, kama ñaa buu naŋoolene akaan búbajumool bíine eeno?” 46Bajut ampi aŋoolen alaañenool furim, di poop kápurum di funak fukila, bajut ampi apeeto bee eceeŋool kúceeŋak di ewok di malinlo.

will be added

X\