MATIU 21

1Nan Yensa di kuriibaool kulofenumi Yerusalem, di kúriiŋumi ésukey yati Betufage di Furembooraf fati Uwoliiw. Yensa naboñumi kuriibaool kugaba man kulo fácul. 2Naaniimi, “Jijaw bee di ésukey yan jijonkooraañaa, ban panjitook eroha yakoki di jiñooliyo bajuume di yo. Jífeluuso man jíjeetumul bee di ínje. 3An aceeŋujaat waaf bee di muyuul, joonool, ‘Akiiyaau amaŋuso,’ ban panakaten galab man jíjeetumul so.” 4Mo’omu mukankaan mambi wan aboñaau aregeenumi furimaf fati Atijamit woote káliroor, di foone, 5“Jireg bukanak kati Sion, Jijiker, áyiau ooluul ábileuuñaa bee di muyuul, oo an awalenooroe, ban oomu di bálamuk bati eroha, yoo eenomi jiroha.” 6Kuriibaak kugabaak kujawumi kukaan nan man Yensa ájaatikeniimi. 7Di kújeetumulomi erohaay di jiñooliyo ban di kuleefumi uloaiil wáamakaw di bálamukab booliso, man Yensa aremboorumi man álakoumuwomi. 8Kajuupoe di jameeŋ yati bukan di kufetumi uloaiil wáamakaw di buruŋab, bukaaku di kúfaluumi etojey yati úbaar mansi kunenuwo fáculool. 9Jameeŋey yalo’oomi fácul di yáriibenuloomi bálamuk di kucibuloorumi, “Kasalak kooku di Atijamit mati Añiilau ati Dauda! Kásuumaayak kati Atijamit kooku di ampi ajawulomi, oo eenomi Áyiau ajawulomi di kareesak kati Akiiyaau! Kasalak kooku di Atijamit ammi di bukinab bajakaab!” 10Nan Yensa anokenumi Yerusalem, bukanak búrom kammi di ésukey yáamakey ekila di kufumoulomi wálabab, di kuceeŋumi, “Kama, umu aima?” 11Jameeŋey yati bukanak di yommi, “Umu aboñaau Yensa ápurumulomi Nasaret yati Galili.” 12Yensa nanokenumi di fukobaf fáamakaf fati Atijamit ban nácesoorul kalakomi funoomaf di kayooŋenak dó. Nafarumi bibibil sitaabulas sati kúruŋulaak kati sígodaas di sijunkutas sati kanoomenemi úlaabaan. 13Naaniimi, “Ciikiciik, ‘Eluupom panekaani fulaw,’ bare muyuul jikankaan yo fulako fati kúkuu.” 14Kájukeriitumi di kabakomi kubilumi bee di oo, nasonteniimi boo di fukobaf fáamakaf. 15Kúsimenaak kunifaanak kati Atijamit di kuliikitenaak kati sílingaas kujukumi wajamurerutimi wan Yensa alakomi ekaaney, di kuñiilak kándomi di kucibuloorumi dóo di fukobaf, “Kasalak kooku di Atijamit mati Añiilau ati Dauda!” Bare di kuñuumulumi máamak, 16di kuceeŋumi Yensa, “Mante nujanjam wan kuñiilak kommi di eregey?” Yensa nalaañeniimi, “Éey, malegen mante jiliikenderut wan furimaf fati Atijamit furegumi, ‘Ñátum di kurimak kati kuñiilak di muñiilam au nukankaan kasal káliroore bee di fúkoi’?” 17Nan ápurumi di bukoo man alaañumi bee Betani, ban amoorumi. 18Fati kajomaf di bújomaraay, nan Yensa alakomi elaañey bee Yerusalem, bacaarab di busofoomi. 19Nan alakomi ejaay najukumi búpunduun bammi di kápibenaak kati buruŋab. Najawumi bee to, ban atookut dó muria manteer etojey ceb, namandoorubomi, “Letuwolurer inki.” Yaŋ too galab búbaarab di bulalabenumi. 20Nan kuriibaool kujukumomi di wáaloiimi, di kuceeŋumi Yensa, “Wau kaane man búbaarab bulalaben galab mo’omu?” 21Yensa nalaañeniimi, “Ínje eem di ereguul malegenam, jifiumujaat Atijamit ban jibajut úyeget ugaba mati kánkumak koola, leejire to di wakaanimi búpunduunab, bare handeneen panjoon fúlankiinaf ufe, ‘Kábulo’ooro jaw úlo’ooro falaf,’ panfuyiiŋuul. 22Jifiumujaat Atijamit, wampi jilawumi di kúlawak, panjiyabuwo.” 23Nan Yensa alaañumi bee di fukobaf fáamakaf man alakomi kaliikitenak, kúsimenaak kunifaanak kati Atijamit di Kúyahuud kunifaan bukaaku di kubilumi bee di Yensa man kuceeŋoomi, “Di fujuum fei noom di ekaaney uru? Ai aseni fujuumaf ufe”? 24Yensa nalaañeniimi, “Ínje poop paniceeŋuul kúceeŋ kákon pat. Jilaañenanjaat, ñaa ínje poop panireguul di fujuum fei níkaanumumi mukaanaam ume. 25Man Yaaya átiigulenumi bukanak, ai asenoomi fujuum fukila mante Atijamit, mba bukan?” Mati mo’omu di kalakomi kamaloor di kúkoiil, di kommi, “Oonaajaat Atijamit asenoomi fo, panaceeŋolaal wau kaane jíyinenutool. 26Bare oonaajaat bukan kusenoomi fo, núkoliaakoli jameeŋey yati bukanak, mati yoo búrom efiunfium Yaaya oo aboña ati Atijamit.” 27Di kulaañenumi Yensa, “Wúli umanjut.” Yensa nammi, “Iyoo! Kama ínje letireguul ai asenaam fujuumaf ufe man ikaan uru.” 28“Muyuul buu jisofumi mati kúregak uke? Bajeembaj ániine abaje kuñiil kúniine kugaba, ñaa najawumi bee di añoolool átiyaarau, naanoomi, ‘Añoolom, jaw man urok di kafatak kati ureseŋaw jaat.’ 29Nalaañenumi, ‘A’a, letijaw,’ bare fáculey nawoonoorumi ban najaw tiarok. 30Ániinaau najawumi tiaregumi añoolool álamukaau moo mákonam. Oo nalaañenumi, ‘Baa, panijaw,’ bare ajawutubo. 31Ai di buku kugabaak akammi wan ampaool amaŋumi?” Di kommi, “Átiyaarau.” Yensa naaniimi, “Ínje eem di ereguul malegen, mati kulagaak basaafab di kuseekak kayenetemi pankulo fáculuul man kunoken di jáyiaj jati Atijamit. 32Mati Yaaya Átiigulenaau nabibil man áyiisuumi buruŋab bati majoonam bampi jisofumi, ban muyuul jíyinenutool, bare kulagaak basaafab di kuseekak káyenetemi di kúyinenoomi. Ban hani nan jijukumi wabajomi mo’omuñaa, di jilatumi kátiiwoor jikat mukaanauul majakut man jíyinenool. 33“Jíyenten kúregak uke. Bajeembaj akilumi kafat asuwene ureseŋ di kafatool, nájongenukomi jak, ban nawokumi fuñaafen fati kureseŋ aban, nawokenumi jiremb jípooyuma dó. Nabilenukomi kuwaña kuceen ban najawumi kajaaburuŋ di mof muceen. 34Nan muriaam maalumi, naboñumi kumiiceelool kuceenak bee di kuwañaak kabilenikomi bee éyabul bucaabool bati muriaam di kafatak. 35Ban kuwañaak kabilenikomi di kúloummi kumiiceelool man kutekumi ákon, di kubujumi aamu, ban di kuleebumi aamu kubuj ñátum di bálankiin. 36Nalaañumi aboñ kumiiceel kuceen, kawuuje bukaaku, bare di kukaaniimi moo mákonam. 37Di múlamukaam, akilumi kafatak naboñumi añoolool ániine bee di bukoo, di aaney, ‘Pánkulebien añoolom.’ 38Bare nan kuwañaak kabilenikomi kujukumi añiilau ceb, di kuregoorumi, ‘Ume oo aatumi bee ekiley bulaañab. Jibil, ubujaalool dak, mambi ukilaal ko.’ 39Di kuradagenoomi taac kubetenool téeŋey yati kafatak ban di kubujootomi dak. 40Nampi akilumi kafatak alaañulomi, waa panakaan bee di kuwañaak kukila kabilenimi kafatool?” 41Kúsimenaak kunifaanak kati Atijamit di Kúyahuud kunifaan bukaaku di kulaañenoomi, “Panabuj kájakaatimi jákaati aban, nabilenuko kuwaña kuceen kampi kasenoomi bucaabab boola bati muriaam kéelookeel.” 42Yensa naceeŋiimi, “Mante jiliikenderut di furimaf ufu fati Atijamit? ‘Fukoobaaf fo’ofu fan kuteepaak kulateenumi, foo fulaañumi fulako di égooleney yasofumi líŋ kukukak kati eluupey. Mo’omu moo búkaanumab bati Akiiyaau, meeŋolaameeŋ di kúcilolaal.’ 43Mati mo’omu ínje eem di ereguul, jáyiaj jati Atijamit pánjibotuli di muyuul ban panjiseni bukan kati mofam kamaŋumi man kukaan man ceeŋumi eeno.” 44Ampi alomi di fukooba fukila panfutujerool jarak. Bare foo fulojaat di an akila, panfunokosool nakas. 45Nan kúsimenaak kunifaanak kati Atijamit di Kufarisaak kujammi kúregak koola, di kumanjumi mati bukoo nalobumi. 46Nan kuñesumi buruŋ bampi kúsofumoomi, di kúkolimi jameeŋey yati bukanak, mati yoo esofoosof nan aboña.

will be added

X\