MATIU 20

1“Mati jáyiaj jati bukinab bajakaab joonojoono nan ániine ati kafat kati ureseŋ ápurumi di bújomaraay pím bee éñesuley kuroka mbi acaamiil. 2Di kujamoorumi di kurokaak kuban mati panacaamiil bacaamab égodi edenaari yákon di funak fákon ban naboñiimi man kujaw bee di kafatak koola kati ureseŋaw. 3Nan bajumi wáriiŋe sirig futok di sibakiir, natookumi kuroka kuceen poop man kujuume kulee di burok waaf di funoomenaf. 4Naaniimi, ‘Muyuul jijaw poop jirok di kafatak kati ureseŋaw, man icaamuul wanoosani wan ceeŋumi.’ Ñaa koo di kujawumi. 5Di nanan nati wáriiŋe sirig uñen di sigaba di poop wáriiŋe sirig sífeegiir tutularaay poop, nalaañumi inki man áwonkul kuroka kuceen mo’omu. 6Di wáriiŋe sirig futok poop nápurumi inki bee di funoomenaf ban natookubomi kúniine kuceen bajuume. Naceeŋiimi, ‘Wau kaane di jijuum taate jilee di burok hani waaf?’ 7Di kulaañenoomi, ‘Mati hani an ákon áŋarutoli burok.’ Naaniimi, ‘Jijaw man jirok poop di kafatak kati ureseŋaw.’ 8Nan káliimak kúriiŋumi, ati kafatak kati ureseŋaw nammi arokaool áfaculaau, ‘Wónkul kurokaak man ucaamiil, mbi útooŋul écaamuley kálamukomi kubil burokab, manteer bee di katooŋumi kubil.’ 9Nan kurokaak kabilumi burokab di nanan nati wáriiŋe sirigas futokey di kubilumi, man acaamiimi anoosani ayab égodi edenaari yákon. 10Nan katooŋumi burokab kubilumi, di kusofumi manteer koo pankuyab bacaam baate ewuuj bati kúlamukomi di burokab. Bare nacaamiimi poop anoosani égodi edenaari yákon. 11Nan kuyabumi bacaamab booliil kuban, di kúkuumoorumi bee di ati kafatak, 12man kommi, ‘Kurokaak kukila koo erig yákon ceb kuroke, bare núcaamolimi re cererer man wúli katebumi káboliak kati bala’ab di bugaalab di funakaf búrom.’ 13Ati kafatak nalaañenumi bukoo, ‘Apaalom, ínje ikaanut wajoonut di au. Lee au bacaamab ban ujamooraami boo eenomi égodi edenaari yákon ceb? 14Uŋar bacaamab booli, jaw. Ínje imaŋe man icaam arokaau álamukomi o’omu di burokab jire’en di au. 15Mante ínje ibajut bakooŋ di ekaan wan imaŋumi di sígodaas súmboom room? Mante nubabaj búlat di ínje wan ikammi jak?’” 16Yensa nawuŋenumi, “Kúfaculaak pankukaan kúlamuka man kúlamukaak pankukaan kúfacula.” 17Nan Yensa di kúriiŋenaool uñeney di kugabaak kulakomi ejaay bee Yerusalem, nawonkiimi sicebiil bee di oo, nan kulakomi ejaay di buruŋab naaniimi, 18“Jijiker, wulaal bukooke bee ejaw bee Yerusalem. Añiilau ati anau aate esofi man aseni kúsimenaak kunifaanak kati Atijamit di kuliikitena kati sílingaas. Pankuregool aate ebuji, 19ban di kusenool Kakaanutumi Kúyahuudak pankujelool, pankutekool ban pankufaaŋenool man kubujool di ébaarey yati búpinab. Di funakaf fúfeegintenaf Atijamit pánayitenumulool inki di kacetumi.” 20Nan mo’omu múpurutomi iñaayaau ati kuñiilak kúniinaak kati Jebede nabilumi bee di Yensa di kuñoolool kúniinaak kugabaak, nákuntaajenumi man akobool fáculool man alawoomi mati waaf. 21Yensa naceeŋoomi, “Waa numaŋe?” Nalaañenoomi, “Regom mati kuñiilak kugabaom mambi kulako di au, aamu di báridi, aamu di bamayi nampi ulakomi di ejunkutey yati áyi di jáyiaj jooli.” 22Bare Yensa nalaañeniimi, “Muyuul jimanjut wan jilawemi di wo! Mante jiŋooleŋŋoolen jiraan di éraanumaay yati mátaañiaam yan ínje eetumi bee eraaney?” Di kulaañenoomi, “Wúli nuŋooleŋŋoolen.” 23Yensa naaniimi, “Panjiraan di éraanumaay yúmboom, bare ibajut bakooŋ bati kamuken ampi alako di báridom mba di bamayom. Ampaom najonjoojonjoor aban man kootumi kalako.” 24Nan kúriiŋenaool kooni uñeney kujammi mati moo, di bóli’iimi wút di kúniinaak buku kugabaak. 25Bare Yensa náwonkuliimi man aaniimi, “Muyuul jimammanj mati kúyi kamanjutumi Atijamit kurungumi bukaniil di wanoosani, di poop kurungaiil kákalaae kubabaj kánkum pánkuyiisenuko wan koote ekaan di bukoo. 26Lee mo’omu mootumi bee ekaaney di muyuul. Bare ampi amaŋumi bee ekaan an áamak titooruul oo aate ekaan arokauul, 27ban ampi amaŋumi bee ekaan áfacula titooruul oo aate ekaan amiiceeluul. 28Moo nokoorumi nan Añiilau ati anau oo ájawumulout man bukan kumiiceelaetool bare man amiiceelaet bukan. Ban man asen eroŋey yoola man acet bee kapaken bukan kajuupoe.” 29Nan Yensa di kuriibaool kulakomi épurey Yeriko, jameeŋ yati bukan di elako kariibenool. 30Di bajumi kúpuuma kugaba kalakoe di kápibenaak kati buruŋab. Nan kujammi mati Yensa alakomi ewuujey di buruŋ bukila, di kucibuloorumi, “Baj káboteni di wúli, Añiilau ati Dauda!” 31Jameeŋey di etonkiimi man kutunten, bare koo di kufaŋumi man kucibuloore, “Arungaau, Añiilau ati Dauda, baj káboteni di wúli.” 32Yensa najummi júr, ban náwonkuliimi naceeŋiimi, “Waa jimaŋe man ikaanuul?” 33Di kulaañenoomi, “Arungaau, káanoli man ujuk.” 34Yensa nabajumi káboteni di kukila nagorumi kúciliil ceb di kúwambulomi di kulaañ kujukumi fiit, di kubilumi kukaan kuriibaool.

will be added

X\