MATIU 2

1Di kunakak kati Herod alakoeenumi áyiau, noo Yensa awolimi di Betelehem yati Yúdea. Kúniine kumanja kuceen kati bootab kápurumulo ban bala’ab búrabumemi bee di ésukey yáamakey yati Yerusalem, di kuceeŋumi, 2“Añiilau awolimi oomei aatumi bee ekaaney áyiau ati Kúyahuudak? Mati wúli nujujuk yootey yápurulo yáyiisene ewoliey yoola ban bala’ab búrabumemi, moo nújawumulomi bee kákuntaajen man umiiceelaetool.” 3Nan áyiau Herod ajammi mo’omu, di táañioomi máamak, naamoorumi poop bukan kajuupoe kati Yerusalem. 4Nawonkulomi kúsimenaak kunifaanak kati Atijamit di kuliikitenaak kati sílingaas tákon man aceeŋiimi, “Boobei Apakenaau Áamakau aatumi bee ewoliey?” 5Di koonoomi, “Di Betelehem yati Yúdea. Mati mo’omu aboñaau aciikumi eeno: 6Atijamit nammi, ‘Wáay Betelehem yati Yúdea, ésukey yooluul yákon di sísuk safaŋumi man sibaje fúkaw sati Yúdea. Mati kápurumul di muyuul an aate ekaan arunga man apooy bukanak kúmboom Kuisiraelak.’” 7Herod nawonkumi kumanjaak kati bootab ñátum di kutunt ban naceeŋiil kúceeŋ man amanj noonei yootey érajuliimi. 8Ban naboñiimi bee di Betelehem, di aaney, “Jijaw ban di jiñes jak mati añiilau. Nampi jijukoomi jimanjenom mambi ijaw poop íkuntaajen man imiiceelaetool.” 9Nan kujameenumi wan áyiau Herod aregiimi, di kujawumi buruŋiil. Jijiker, yootey yákoney yan kujukeenumi ban bala’ab búrabumemi eyabiimi fácul, bee mo tiejummi tan añiilau ammi. 10Nan kujukumi yootey, di kulakomi kamaayoor máamak. 11Nan kunokenumi kalimbisak di kujukumi añiilau di iñaayool Mariyaama, di kúkuntaajen man kumiiceelaetumi añiilau. Ñaa di kúwambulumi sijonkonkoroŋas sati muwulaam mabaje fúkaw máamak ban di kusenumomi añiilau mati sáni, di libano, di sumurun 12Ñaa di kulaañumi bee mofam mooliil ñátum buruŋ buceen, mati Atijamit nagameniigamen ñátum di sáaut mati takum kubooko bee bati Herod. 13Nan kumanjaak kulaañumi bóot, maleeka yati Akiiyaau di erajulomi Esufa di sáaut man yoonoomi, “Yito, ŋar añiilau di iñaayool, man jitey bee di mofam mati Misira. Jilako bo bee nampi iregimi jípurul bo, mati Herod oomu bo bee eñesey añiilau ban namaŋ bee ebujool.” 14Di fukaf fukila Esufa nayitomi, naŋarumi añiilau di iñaayool, man kujawumi bee mofam mati Misira, 15ban di kulakobomi bee nan Herod acete. Mo’omu moo mukaanikaan wan Akiiyaau aregeenumi mati aboñaau ubajobajo: “Niwonwonk añiilau úmboom kápurumul di mofam mati Misira.” 16Herod di rioomi matatat nan amanjumi kumanjaak kati bootab kubuntoobunt. Nasenumi buruŋ kutiika man kubuj kuñiilak kúniinaak búrom kammi Betelehem di kapanak kukila. Kubujumi kuñiilak kabajumi simit sigaba bee tentaam. Mo’omu mukaanikaan riiboor di wan ajameenumi di kumanjaak di nanan nan kujukeenumi yootey. 17Wan aboñaau Yeremaaya aregeenumi úlirooliroor: 18“Bukanak di kujammi an aceen náruruuren di ésukey yati Raama, búyiloor di kagamoor, Rakel ammi di búweelab muñoolool, oo amaŋut an apankool, mati koo búrom kucecet.” 19Nan Herod acetumi ceb, maleeka yati Akiiyaau di erajulomi Esufa di sáaut di mofam mati Misira, man yoonoomi, 20“Yito, ŋar añiilau di iñaayool, ban di jilaañ bee di mofam mati Isirael, mati kalakoeenumi eñesey bee ebujey yati añiilau kucecet.” 21Esufa nayitomi, naŋarumi añiilau di iñaayool, ban di kulaañumi bee mofam mati Isirael. 22Bare nan ajammi mati Akela aŋarumi ejunkutey yati ampaool Herod di kapanak kati Yúdea, nákolimi bee elaañ bee bo. Ñaa nagamenigamen inki di sáaut siceen, nalaañumi bee kapanak kati Galili. 23Ban di kujawumi kucinumi di ésukey yati Nasaret. Mo’omu moo mukammi wan kuboñaak kuregeenumi mati Apakenaau Áamakau mambi úliroor, “Oo aate ewonki ati Nasaret.”

will be added

X\