MATIU 19

1Nan Yensa abaneenumi eregey yati mo’omu ceb, nápurumi di kapanak kati Galili, man ajawumi bee di kapanak kati Yúdea di kapan kaaku kati falaf fati Yorudan. 2Di bajumi jameeŋ yati bukan yariiboomi, ban nasontenubomi káju’utumi. 3Kufarisa kuceen kujajaw man kuliikool ñátum di eceeŋ di kuwok di malinlo mambi kusofool, man kommi “Mante babaj élinga yábutoe yasene buruŋ man ániine akaten aseekool ñátum di manoosani?” 4Yensa nalaañeniimi, “Jitamburerut jiliiken mati kabiñoo di fúcitumaf Atijamit Atuukaau atuukumi bukan, ániine di anaare. 5Atijamit nammi, ‘Mati mo’omu ániine aate épur di ampaool di iñaayool, man abil kunampoor di aseekool, man koo kugabaak koote ebil kukaan ákon’? 6Ñaa koo lee kugabaak bare ákonau. Moo kaane wan Atijamit anampenumi tákon, takum an apuun bee kápajuluwo.” 7Di kuceeŋoomi, “Kama ñaa wau kaane Muusa nájaatikenolaami man an asen letara yati ebaney búyabaab, man akaten aseekool?” 8Yensa naaniimi, “Mati esayey yati úyegetuul Muusa asenuumi buruŋ bee kakaten kuseekuul, bare noo di fúcitumaf kaaneenut mo’omu. 9Ínje eem di ereguul, ampi akatenumi aseekool, leejaat nasofoosof tap di ániine aceen, ban ayabumi aseek aceen, oo áraadia.” 10Kuriibaool di koonoomi, “Kaanjaat mo’omu moo eenomi mukaanaam mammi di ániinaau di aseekool, moo eenomi káyaboaataak kúkoyume.” 11Bare Yensa nalaañeniimi, “Lee anoosani aŋoolenumi álaul man akaan wan isankenumiñaa, manteer kan Atijamit asenumi kálaulak uke ceb. 12Babaj bukaaku kuŋoolenut kuyab mati koo kuwoliwol di mo mba mati baceeke. Bukaaku leekuyab mati kumammaŋ bee kamiiceelaet mati jáyiaj jati bukinab bajakaab. Anoosani aŋoolenumi álaul, nálaul ko.” 13Kuñiil kuceen di kújeetumulimi bee di Yensa, mambi aremben uñenool di bukoo bee elaw. Bare kuriibaool di kumakiimi. 14Bare Yensa nammi, “Jikat man kuñiilak kubil bee di ínje, takum jífireniil! Mati Atijamit panayab buke di jáyiaj jati bukinab bajakaab.” 15Ban narembenumi uñenool di bukoo aban najaw. 16Bajeembaj ániine aceen ajawulo bee di Yensa man ammi, “Aliikitenaau, wajake wei neete ekaan man íriiŋ eyab eroŋey yati bándoorey?” 17Yensa nalaañenoomi, “Wau kaane noom di eceeŋom mati waa eenomi wajake? Babaj an ákon ceb aambomi ajakumi. Umaŋujaat panuyab eroŋey yati bándoorey, nukaan wan sílingaas sati Muusa siceeŋumi.” 18Naceeŋoomi, “Sei?” Yensa nammi, “Takum ubuj an, Takum usang aseek mba ániine ati an, Takum úkuut, Takum ulepoor. 19Lébien ampai di iñaayi. Noote emaŋ alaoori nan man umaŋumi fúkoi eeno.” 20Ápuraau ániinaau nammi, “Níkaanunkaanum ekaaney wan sílingaas usu búrom siregumi. Uceen wei neete ekaan ibenen wawuujuto?” 21Yensa naanoomi, “Umaŋujaat man úliroor úriiŋ bee eyab eroŋey yati bándoorey, jaw, noomen wan ukilumi, caab sígodi sikila kabajutumi, ban moo panubaj fubaj di bukinab bajakaab. Bil, riibenom.” 22Nan ápuraau ániinaau ajammi mo’omu najawumi ban náboteniooromi mati oo abaja áamak. 23Yensa nammi kuriibaool, “Ínje eem di ereguul malegenam, moo táañie man abaja anoken di jáyiaj jati bukinab bajakaab. 24Ínje eem di ereguul inki, kanokenak kati eñonkomma di jíluaj jati écikuma kufaŋe man kuhiilie kanokenak kati abaja di jáyiaj jati Atijamit.” 25Nan kuriibaool kujammi mo’omu di wáaloiimi, di aaney, “Kama ñaa ai aŋoolene apak?” 26Yensa najikeriimi tem man aaniimi, “Wan anau aŋoolenutumi akaan di funoonool, woo búrom Atijamit naŋooleŋŋoolen akaan.” 27Peter nalaañenoomi, “Jiker, wúli nukatulokat wanoosani wóololi bálamuk man uriibeni. Kama waa noote eyab?” 28Yensa nalaañenumi, “Ínje eem di ereguul, nampi Añiilau ati anau aatumi kalako di ejunkutey yálirooraay yoola yati jíyiaj di dúniyaay yábileuumi. Muyuul kúriiŋenaom uñeney di kugabaak poop panjilako sijunkut sati jáyiaj, kagamenak kiilak uñeney di kugabaak kati Isirael. 29Ban anoosani akatumi bálamuk siluupool, mba kútumbeool, mba kúliinool, mba ampaool mba iñaayool, mba kuñoolool, mba ulaakool, mati oo ariibaom, panayab bacaam báriiŋe ceme di wan akatubomi, ban nayab poop eroŋey yati bándoorey. 30Bare kajuupoe káfaculomi iñeme pankukaan kúlamuka man kajuupoe kálamukomi iñeme, pankukaan kúfacula.

will be added

X\