MATIU 18

1Nanan nikila kuriibaak kati Yensa di kubilumi bee di oo, di kuceeŋoomi, “Ai afaŋumi kákalaa di jáyiaj jati bukinab bajakaab?” 2Yensa náwonkuumi añiil ajuumen di bújoleniil. 3Nammi, “Ínje eem di ereguul malegenam, leejaat mukaanauul mútiiwootiiwoor nan mati kuñiil, leejinokender di jáyiaj jati bukinab bajakaab. 4Moo kaane, ampi awalenooromi aano nan añiilau ume, oo afaŋumi kákalaa di jáyiaj jati bukinab bajakaab. 5“Ampi awalenumi an nan añiilau ume ñátum di kareesom, oo ínje nawalene. 6Bare ampi akammi man ákon di káyinenumi di ínje nan kuñiil man akaan majakut, kóyume man aleebi di falaf bakoker fukooba fúnegenuma di ekondoorool. 7“Búyiik bulako di bukanak kati dúniyaay mati man kuyinkooremi majakutam! Kayinkoor léekubajaati kaate ekaan bukan man kukaan majakut, bare búyiikab pambulako di an akila áŋareuukomi! 8Kaanjaat kañeni mba kákamuni kukaani man ukaan majakut, miinko pat ban nubeten. Kóyume man unoken di eroŋey yati bándoorey bámongoe mba babakoe, eniili yooken uñenaw mba úkamunaw ugabaaw ban nubeteni di sambunas sáceteriitumi. 9Kaanjaat jícili jikaani man ukaan majakut, lóokul jo ubeten man ucin di eroŋey yati bándoorey, moo múkoyume eniili eeken kúcilak kugabaak ban di kabeteni di sambunas sáceteriitumi. 10“Mbi jíkaanum takum jiheelen ákon di kafiummi di ínje nan kuñiilak buke. Ínje eem di ereguul mati di bukinab bajakaab simaleekaas sooliil sapooyeiimi, soo nanoosani sibabaj bakooŋab bati kanoken di bújonlenab bati Ampaom ammi di bukinab bajakaab. 11Mati burokab bati Añiilau ati anau boo eenomi bee kapaken bukanak kájimmi. 12Waa jisofumi man jikaan? Ániine abaje sisaha sooni ceme, kaanjaat yákon di éjim? Mante letakatubo saasu ban sommi di kafenak, man ajaw añes yákoney yájimimi bee nampi ajukuloyomi? 13Nampi araŋenuloyomi, ínje eem di ereguul malegenam, oo panafaŋ man amaayoore máamak mati yákoney wuuj mati sooni bukan kubakiirak di bútinkeney di sibakiiras sájimurerutumi jáng. 14Moo mákonam, Ampaom Atijamit ammi di bukinab bajakaab amaŋut man ákon di kafiummi di oo nan kuñiilak buke ájim bee bándoorey. 15“Apaali ariiba alojaat di au, jaw bee di oo man umanjenool man akammi jakut, au di oo sigabauul. Áyentenijaat, nukaanookaan man jikaan dákon inki. 16Bare áyentenutijaat, uwonk kupaali kuriiba kugaba mba kúfeegiir man kukaan kúyiisena kaate emaat, mambi furim fanoofani fúliŋeni titooruul. 17Oo alatujaat káyenteniilak, núyiisen moo kati fujojaf fati Yensa. Alatujaat káyenteniilak hani kati fo, di jisofool oo nan kákoberiitumi Atijamit mba kulaga basaaf. 18Ínje eem di ereguul malegenam, wampi úfirenumi baabe di dúniyaay woote káfireni di bukinab bajakaab, ban wampi umaŋumi baabe di dúniyaay woote emaŋi di bukinab bajakaab. 19Ínje eem di ereguul, kaanjaat kugaba di muyuul kujamoorujaat mati waaf man kulaw baabe di dúniyaay, Ampaom ammi di bukinab bajakaab, panayiiŋuuwo. 20Mati tan bukan kugaba mba kúfeegiir kujojumi man kulaw di kareesom, ínje oomu to di bukoo.” 21Peter nalofumi Yensa naceeŋoomi, “Arungaau, ñooni buu neete kabonket apaalom ariiba alomi di ínje? Mante ñooni futok di ñagaba panyaj room?” 22Yensa nalaañenoomi, “Lee au ootut kabonketool ñooni futok di ñagaba ceb, bare au oote kabonketool ñooni bukan kúfeegiir di uñen di futok di ñagaba. 23“Moo kaane, jáyiaj jati bukinab bajakaab joonojoono nan áyi amaŋumi bee kámeelo butum buu kumiiceelool kumaagenool. 24Nan atooŋumi kámeeloak mo ceb, di kújeetumuumi amaageenumi sígodi sitalant sooni síwili uñen. 25Mati aŋoolenut acaam kanewak kati áyiaool, ñaa áyiau nasen buruŋ man kunoomen ániinaau, di aseekool, di kuñoolool nan kumiiceel, di poop wan akilumi búrom mambi acaam kanewak. 26Mati mo’omu, amiiceelau nalomi kúfima di úkamunaw wati áyiau nalawumi, ‘Áyiau, baj kamuuten di ínje, panicaami wan imaageenumi búrom.’ 27Áyiau ati amiiceelau akila nábotenioomi, ñaa nabonketoomi kanewak koola ban nakatenool ajaw. 28Bare amiiceelau ákonau akila, nan alakomi épurey di eluupey yati áyiau ceb, di kúkamboorumi di aceen di kupaalool kumiiceelak an amaageenumi sígodi sidenaari sooni ceme, nakuluj kumerool, naanool, ‘Caamom wan umaageenumi ínje!’ 29Apaalool amiiceelau nalomi kúfima di úkamunool man alawumi, ‘Baj kamuuten di ínje, panicaami.’ 30Bare nalatumi kamuutenak, ban nájeetumoomi tiasen kukulool dán bukanak kukuleimi bee nampi acammi kanewak jaj. 31Nan kupaalool kumiiceel kuceenak kujukumi wabajoeenumi, di táañi’iimi máamak. Di kujawumi man kuregumi áyiaiil wabajoeenumi búrom. 32Áyiau náwonkuumi amiiceelau an áyiau abonketeenumi kanewak koola búrom naanoomi, ‘Au amiiceelau ájakaatiaau, nibonketibonket kanewak kooli búrom mati man ulawammi. 33Mante au ooteenut ebaj kabonket room di apaali amiiceelau nan man ínje ibajeenumi kabonketak di au?’ 34Áyiau di bólioomi biyok asen buruŋ man kusofool kusen karokemi dán bukanak kukuleimi man kúsuutukenool bee nampi acammi kanewak búrom. 35Moo Atijamit Ampaom ammi di bukinab bajakaab panakammi bee di muyuul, jibonketutujaat kupaaluul kuriibaak kápurumul di úyegetuul.”

will be added

X\