MATIU 17

1Nan bajumi wáriiŋe funoom fákon Yensa naŋarumi Peter di Yankuba, Yohan Yankuba atiool, man arungiimi kuremboor di fatiyena yati fúlankiin. 2Yensa funkool di fulaañoorumi di fúculey yati kuriibaool, buulool poop di boonomi nan bala’ab bawuŋe pasasas, di poop wañool uñiliñil ufiit pal. 3Yaŋ too galab boo kuriibaak kúfeegiirak di kujukumi Muusa di Eliya kati noo kulakomi kámikak di Yensa. 4Peter nammi Yensa, “Arungaau, jajak máamak man wúli ommi taate! Umaŋujaat panijuumen múguut múfeegiir taate, jákon bee di au, jákon bee di aboñaau Muusa, di jákon bee di aboñaau Eliya.” 5Bare nan Peter alakomi kasankenak mo’omu ceb, furola fafiite fawuŋe máamak di fúyiniil, ñaa furim fápurumulomi dóo di furolaaf man fommi, “Ume eenomi Añoolom ati búsusom, an moola músuumammi, jijamool!” 6Nan kuriibaool kujamufomi, di kúkolimi biyok kulo kúfima. 7Bare Yensa nabilumi man anagiimi tac tac man ammi, “Jiyito, takum jíkoli.” 8Nan kutebenumi lóog, di kujukut hani an bare Yensa cebool bajuume to. 9Nan Yensa di kuriibaool kulakomi káwaloulak di fúlankiinaf, Yensa namakiimi, “Takum jireg hani an ákon di wan jijukumiñaa di sáaut, bee nampi Atijamit ayitenulomi Añiilau ati anau di kacetumi.” 10Kuriibaool di kuceeŋoomi, “Lee kuliikitenaak kati sílingaas koonesoon Eliya aate etooŋ álaañul bala’a Apakenaau Áamakau?” 11Yensa nalaañeniimi, “Eliya malegen panabil man ajonjooren bukanak búrom kati Atijamit. 12Bare ínje eem di ereguul mati Eliya nabibil aban, bare bukanak kúlaulutool, ban di kukammi bee di oo wayeiimi. Ban lee piyo pankukaan man Añiilau ati anau kúsuutukenool.” 13Kuriibaool di kúlaulumi wan Yensa ammi di kasanken mati Yaaya Átiigulenaau. 14Nan Yensa di kuriibaool kulaañulomi di fúlankiinaf, di kúkamboorumi di jameeŋey. Ániine najawulomi bee di Yensa man ákuntaajen fáculool nammi, 15“Arungaau, baj káboteni di añiilau úmboom, mati kásumut kati kajek koom di oo jákaati máamak. Naloelo di sambunas, mba di mumelam. 16Níŋarulooŋar bee di kuriibai, bare kuŋoolenut kutilulool.” 17Yensa nalaañenumi, “Wáay muyuul sibaŋoot, kakaanutumi kufiumaay! Bee nei neete kapiyo di muyuul? Bee nei neete kamuuten di muyuul? Jéetumulom añiilau bee taate iñeme.” 18Yensa namandoorumi bágunab, bágunab búpurumi di oo tootooto, yaŋ too galab ápuraau nakoyumi jaj. 19Kuriibaool di kubilumi bee di Yensa sicebiil di aaney, “Wau kaane wúli uŋoolenut ucesoorubo?” 20Yensa naaniimi, “Mati kafiumak kooluul kutiititiiti. Ínje eem di ereguul, jibajujaat kafiumak kare’e nan jikool jati masitad, panjiŋoolen jireg fúlankiinaf ufe, ‘Jaw taate bee uta,’ ban panfujaw. Waaf ulee bo wampi jiyetut jikaan.” 21Bare uru bájoeriit manteer riiboor di kúlawak di balatab. 22Funak fákon nan Yensa di kuriibaool búromiil kulakomi ejoj tákon di Galili, Yensa naaniimi, “Añiilau ati anau koote esofool kusen di uñenaw wati bukan. 23Pankubujool, bare di kunak kúfeegiir Atijamit pánayitenulool di kacetumi.” Di táañi’iimi máamak. 24Nan Yensa di kuriibaool kúriiŋulomi Kapaanaum, di bajumi kulagaak kati basaafab kati di fukobaf fáamakaf, di kubilumi bee di Peter di kuceeŋiimi, “Mante aliikitenauul nacaamecaam basaafab bati fukobaf fáamakaf room?” 25Peter nalaañeniimi, “Éey.” Nan alaañumi bóot, Yensa natooŋumi asanken di oo, di aaney, “Simon, waa nusofumi? Di bukan kei kúyi kuyabe basaafab bati dúniyaay? Mante kuyabubo di kacinumi mofam mba di kujaaburuŋiil?” 26Peter nalaañenoomi, “Di kujaaburuŋiil,” Yensa naanoomi, “Kama bukaniil kupapak di ecaam basaaf. 27Moo manoosani, wúli umaŋut bee elat bukoo, jaw bee di falaf buut, ŋar ewoley étiyaarey yasofimi ban úŋaabulujaat butumab booliyo pánutookudo égodi esater. Uŋaruyo man ucaamiil basaafab bee mati au di ínje.”

will be added

X\