MATIU 16

1Funak fákon Kufarisaak di Kusadusiak kuceenak di kujawulomi di kuliikumi eyinkooley di áyiisiil fúmanjum man kufium mati kánkumool di Atijamit kújawumulo. 2Nalaañeniimi, “Nampi bala’ab bulakomi ejoney, joonesoon, ‘Balay pambuwuŋen, mati kátula kúyenyem.’ 3Ban di bújomaraay, joonesoon, ‘Panelub jaat, mati kátula kúyenyem ban di kuralaak kujuupojuupo ban emitey émigemmigen máamak.’ Jimammanj waatumi kabajoak ñátum di kajikerak kuralaak, bare jiŋoolenut káfasul kúmanjumak mati nanan une! 4Muyuul bukanak kájakaatimi ban kalatumi Atijamit jilawomi man íyiisenuul fúmanjum fákon. Bare ínje létiyiisenuul manteer rino fákon ceb, foo eenomi fati aboñaau Yunusa.” Nan asankenumi mo’omu aban nawuujumi buruŋool. 5Nan kuriibaak kati Yensa kútipumi bee di kátipaak kaaku kati falaf, kújimeenjim kájeetumak kati hani mbúur. 6Yensa naaniimi, “Jíkaanum múliitenumaam mati Kufarisaak di Kusadusiak.” 7Kuriibaool di kumaloorumi titooriil wan Yensa aregumi man kumaloorumi, “Wulaal újeetumutaal mbúur.” 8Yensa namanjumi wan koonoorumi nammi, “Wáay muyuul kan kafiumak di ínje kutiitiñaa, wau kaane di joom di kamaloor titooruul mati jibajut mbúur? 9Mante jílauloorut hani bee mo iñeme? Mante jiwoolout mati bukanak kawuuje síwili futok buku, ínje íkuumeneeniimi ñátum di kúmbuurak kooni futokey di kugabaak? Barierab kuban, utekel wooni buu jimeeŋenumi di warinomi? 10Mante jiwoolout mati bukanak kawuuje síwili sibakiir buku, ínje íkuumeneeniimi ñátum di kúmbuurak kooni futokey di kugabaak? Barierab kuban, utekel wooni buu jimeeŋeneenumi di warinomi? 11Mante jílaulut hani bee iñeme mati ínje iregut mbúur di fúkouyo. Jíkaanum mati múliitenumaam mati Kufarisaak di Kusadusiak.” 12Múlamukaam, kuriibaool di kúlaulumi mati Yensa aregutiil mati kákaanumak kati múliitenumaam mati mbúur bare naregiil mati kákaanumak kati kaliikitenak kati Kufarisaak di Kusadusiak. 13Nan Yensa ajawumi kapanak kati Kasaaria Filipo ban naceeŋumi kuriibaool, “Ai bukanak kurege, oo Añiilau ati anau?” 14Di kulaañenumi, “Bukaaku koone au Yaaya Átiigulenaau, bukaaku koone aboñaau Eliya, bukaaku koone aboñaau Yeremaaya mba bukaaku ákon di kuboñaak kati naaniŋ.” 15Yensa naceeŋiimi, “Bare ai jirege oo ínje?” 16Simon Peter nalaañenoomi, “Au eenomi Apakenaau Áamakau, Añiilau ati Atijamit aroŋaau.” 17Yensa nalaañenoomi, “Simon añiilau ati Yohan, jakijak! Mati mo’omu let an amanjeni, bare moo Ampaom ammi di bukinab bajakaab amanjeni. 18Ínje panibeti kareesak Peter, kan eenomi fukooba. Nampi fujojaf fati kuriibaom fubajomi, au panukammi fukoobaaf fúlakenumaaf, ban wánkumaw búrom wati ecetey letuŋoolen ukajenderufo. 19Paniseni síkulumaas sati jáyiaj jati bukinab bajakaab. Wampi úfirenumi baabe di dúniyaay woote káfireni di bukinab bajakaab, ban wampi umaŋumi baabe di dúniyaay, woote emaŋi di bukinab bajakaab.” 20Aban namakumi kuriibaool mati takum kureg hani an ákon, mati oo Apakenaau Áamakau. 21Kabiñoo nanan nikila Yensa natooŋumi eregey tíen kuriibaool mati aate ejaw bee Yerusalem, ban naate egaal di waaf wajuupoe wákoolenie di Kúyahuudak kunifaanak, di kúsimenaak kunifaanak kati Atijamit, di kuliikitenaak kati sílingaas. Ban poop bukan kuceen koote ebujool, ban di funakaf fúfeegintenaf Atijamit pánayitenulool di kacetumi.” 22Bare Peter nasofoomi di kañenak man kupano maa, di aaney, “Akiiyaau, moo leeŋoolen kaan. Emitey ekaan Atijamit, are’eten moo lói!” 23Bare Yensa najonlenumi di Peter, man amakoomi, “Tóro di ínje, au Seetaani! Mati au akajena di buruŋab búmboom. Bawoonoorerab booli bati anau bare lee bati Atijamit.” 24Yensa nammi kuriibaool, “Ampi amaŋumi ekaan ariibaom naate ekat bálamuk moola ban naate etebooro ébaarey yati búpinab ban nariibenom. 25Mati ampi amaŋumi kapaken eroŋey yoola oo letabajuyo, bare ampi amaŋutumi kapaken eroŋey yoola mati oo ariibaom panabajuyo. 26Mati kásuum kei anau aate ebaj, kaanjaat nababaj dúniyaay búrom ban nábajaati yuutey yoola? Mba waa anau panaŋoolen atitumi di yuutool fúkouyo? 27Mati Añiilau ati anau pánalaañul di simaleekaool di mákalaam man Ampaool asenoomi, ban panacaam anoosani mati wan akammi. 28Ínje eem di ereguul malegenam mati muyuul kuceen kammi taate man jijuume, leejicet bajukut ebiley yati Añiilau ati anau di jáyiaj jati Atijamit.”

will be added

X\