MATIU 15

1Kufarisa kuceen di kuliikitena kati sílingaas kúpurumulo Yerusalem bee di Yensa di kommi, 2“Kama wau kaane kuriibai di kuñoosumi esofey mukaanaam mati kufannaaniŋolaal kújaatikenolaami? Jijiker, kuñaakulenut nan man buruŋab boololaal buceeŋiimi bala’a kuri.” 3Yensa nalaañeniimi, “Wau kaane muyuul di jiñoosumi wan sílingaas sati Atijamit siceeŋolaami ñátum di kariibenak kati mukaanaam mati kufannaaniŋuul? 4Mati Atijamit nájaatikenolaajaatiken man ammi, ‘Lébien ampai di iñaayi,’ ban ‘Ampi álebienutumi ampaool mba iñaayool, oo aate ebuji pak.’ 5Bare joone mati kaanjaat ampi aregumi ampaool mba iñaayool, ‘Wan ooteenumi ebaj kápurumul di ínje woo wasenimi bee di Atijamit, oo ceeŋut bee kálebien ampaool.’ 6Di mo’omu, jimoosumi esofey wan sílingaas sati Atijamit siregumi ñátum di kariibenak kati mukaanaam mati kufannaaniŋuul. 7Muyuul mamisam! Kama man aboñaau Yesaaya nakooŋeenkooŋ nan áriiŋeneenumi mati muyuul: 8‘Bukanak buke kúlebienanlebien ñátum di utumiil, bare úyegetiil ulee di ínje. 9Kamiiceelaetomak kooliil koo kubajut fúkaw, mati kuliikiteneliikiten bukaaku man kukaan sílingaas sati bukanak kaan nan súmboom.’” 10Yensa nawonkumi bukanak bee di oo man aaniimi, “Jíyenten man jílaul. 11Lee wanokenemi di butumab bati anau woo usikeneoomi, bare wápureuumi di anau, woo usikeneoomi.” 12Ñaa kuriibaak di kubilumi man kuceeŋoomi, “Mante numammanj wan ureguñaa úsuumut Kufarisaak room?” 13Yensa nalaañeniimi, “Mulukiinam manoosani man Atijamit Ampaom ammi di bukinab bajakaab alukutumomi pámmurupi. 14Jikatiil bo, mati koo kukankaan nan kúpuuma kaam di karuuoor. Ápuuma aamu aruujaat apaalool ápuuma aamu, koo poopiil pankulo di busun jálaŋ.” 15Bare Peter naceeŋumi Yensa, “Bátuloli wan kúregak uke kufelumi.” 16Yensa naceeŋoomi, “Muyuul, kuriibaom jílauloorut hani bee iñeme. 17Leejijuk mati wampi wanokenemi di butumab bati anau woo uje’emi di farool, múlamukaam, nalanjowo? 18Bare wápureuumi di butumab bati anau woo úyiisenemi wammi di búyegetool, woo usikeneoomi. 19Mati kápurumul di búyegetool síwoonoor sájakaatie sípureuumi sati bee ebuj an, basang di aseek mba ániine ati an, kaseeketak di kániine’etak, jákuut, elaañ di anau ñátum di kalepoor di kasuulen. 20Uwu usikenumi anau, bare furiaf bañaakulenut nan man buruŋab booliil buceeŋumi, moo musikenut anau.” 21Yensa oo di kuriibaool kúpurutomi kujaw bee di mofam mati Turo di Sidon. 22Yaŋ too galab aseek ati Kanaan alakobomi kapan kukila nabilumi bee di oo man acibulomi, “Wáay Arungaau, Añiilau ati Dauda, bóteniom! Mati añoolom anaaraau bágun bookool máamak.” 23Bare alaañenutool furim. Kuriibaool di kubilumi bee di oo man kulawoomi, di aaney, “Cesoorool ajaw, mati oo oomu nariiboore di wulaal mansi napababoor.” 24Nalaañenumi, “Atijamit náboñulamboñ bee kapaken bukanak kati Isirael ceb, koo kukankaan nan sisaha sájime sabajutumi amata.” 25Bare aseekau nabilumi ákuntaajenumi fáculool nammi, “Arungaau, rambenom.” 26Yensa nalaañenoomi, “Senut man an aŋar muri mati kuñiilak, asenumo múkurukam man murimo.” 27Aseekau nammi, “Éey, arungaau, bare hani múkurukam murieri burinenab bati ata mo.” 28Yensa naanoomi, “Aseekau, au nubabaj kafium káamak! Atijamit panakaan wan umaŋumi.” Yaŋ too galab añoolool anaaraau nakoyumi. 29Yensa nápurubomi man awuujumi kafintak kati kapanenaak kati falaf fati Galili. Boo naremboorumi fúlankiinaf aban, nalakotomi. 30Di bajumi jameeŋ yati bukan yariibenoomi, di kújeetumuumi kabakomi, kámongomi, kájukeriitumi, kásankeneriitumi, kabajumi úsumut uceen kajuupoe di kújeetumiil fáculool, ban nasonteniimi. 31Bukanak di wáaloiimi mati wan kujukumi kásankeneriitumi di kusanken, kámongomi di kabakomi di kuyito kujaw, kájukeriitumi di kujuk. Di kulakomi esaley Atijamit ati Isirael máamak mati mákalaam moola. 32Yensa nawonkumi kuriibaool nammi, “Ínje nibabaj kabonket bee di jameeŋey yati bukanak. Buke kulakolako kariiben wulaal wáriiŋe kunak kúfeegiir, ban iñeme kubajut wampi kuri. Ínje letikatiil man kujaw bacaarab di bóro, takum kutundo di buruŋab.” 33Kuriibaool di kuceeŋoomi, “Boobei nootaami ebaj muri mayaje baabe di baŋaanab mampi jameeŋey yare’e mo’omu erimi manteer epooñ?” 34Yensa naceeŋiimi, “Kúmbuur kooni buu jibaje?” Di koonoomi, “Kooni futok di kugaba, di muwol mupinaay.” 35Yensa nájaatikenumi jameeŋey man elako tentaamey. 36Naŋarumi kúmbuurak kooni futokey di kugabaak di siwolas, nasalumi mati muriaam aban, natingukomi ban nasenukomi kuriibaak, man kucaabumi di jameeŋey yati bukanak. 37Di kurimi manteer kupooñ kurinen, ñaa kuriibaool di kumukenumi warinomi manteer kumeeŋen utekel futok di ugaba. 38Karimi kúrindiiŋ kúniinaak kawuuje síwili sibakiir, kunaaraak di kuñiilak balee to. 39Mo’omu múpurutomi Yensa nakammi jameeŋey eyiisoor, nájupomi di busaana man átipumi bee mofam mati Magadan.

will be added

X\