MATIU 14

1Nan Herod ajammi mati kajamoak kati Yensa, 2nammi kurokaool, “Ume Yaaya Átiigulenaau. Atijamit áyitenulool di kacetumi, moo kaane nabaj wánkumaw uwu man akaan wajamurerutimi wo’owu.” 3Mati no’ona Herod naboñeenumi kutiika kuceen man kusofoomi kukoken ban di kukuloomi dán bukanak kukuleimi. Nakankaan mo’omu mati Herodias, oo aseekau ati atiool Filip. 4Mati Yaaya ninsi naregeenooreg, “Sílingaas soololaal sisenut buruŋ man uŋar Herodias ukaan aseeki.” 5Herod no’ona namammaŋ bee kakaten furimool man kubujool, bare nákolikoli Kúyahuudak, mati bukanak kusosof Yaaya mati oo aboña ati Atijamit ooliil. 6Bare di funakaf fati karuukenak kati ebajiey yati Herod, añiilau anaaraau ati Herodias nabommi di fáculey yati kamaatumi búrom, násuumenumi Herod. 7Herod nabaatumi man áligoomi bee esenool wampi amaŋumi. 8Ñátum di kájaatikenak kati iñaayool nammi, “Senom taate too laj fúkaaf fati Yaaya di kapalaat.” 9Áyiau moo di mútaañioomi, bare mati man abaatumi wan áligumi di poop amaŋut bee kakajen wan abaatumi di báligab di bújolenab bati kujaaburuŋool, nasenumi buruŋ atiika apooya man akammo. 10Ban naboñoomi man kumiinumi fúkaaf fati Yaaya oo dóo dán bukanak kukuleimi. 11Ban kújeetumi fúkaaf foola di kusenufomi jijaŋaaj ban nájeetufomi tan iñaayool ammi. 12Yaaya kuriibaool di kubilumi kuteb biiŋab bati Yaaya kufok. Di kujawumi kureg Yensa wan kubajumi. 13Nan Yensa ajammi wabajomi mati Yaaya aban, oo di kuriibaool kújupomi di busaanaab man kútipumi bee ban tunoore mambi Yensa aŋoolen alakobo cebool. Bareñaa bukanak nan kujamoomi, koo búrom di kúpuruumi di sísukas sooliil kuŋooben bee tan Yensa ammi man kuriibenoomi. 14Nan Yensa awaloulomi di busaanaab, najukumi jameeŋey. Di kaanoomi káboteni káamak mati bukoo, ban ñaa nasontenumi káju’utumi. 15Nan bala’ab bulakomi kátinkaak, kuriibool di kubilumi bee di oo man kommi, “Baabe ban tunooreñaa sii, súm bala’ab pambujon. Jikaten jameeŋey yati bukanak man ejaw bee di sísukas tíkunoomul di kúkoiil wampi kuri.” 16Yensa nammi, “Ceeŋut man kujaw, tíkuñesooroul muri, muyuul jiseniil wampi kuri.” 17Di koonoomi, “Wúli nubabaj kúmbuur kooni futok di siwol sigaba taate.” 18Yensa nammi, “Jísenulom ro taate.” 19Nájaatikenumi jameeŋey yati bukanak man kulako tentaam ban étuureey yommi. Ban naŋarumi kúmbuurak kooni futokey di siwolas sigabaas najiker fatiya, ban nasalumi bee mati muriaam. Ban natingukomi aban, nasenukomi di siwolas kuriibaak, man kucaabumomi di jameeŋey yati bukanak. 20Bukanak búromiil di kurimi manteer kupooñ tep. Kuriibaool di kumukenumi burinenab biyok kumeeŋenumi utekel wooni uñen di ugaba di warinomi. 21Karimi kúrindiiŋ kúniinaak kawuuje síwili futok kunaaraak di kuñiilak balee to. 22Nan mo’omu múpurutomi ceb, Yensa nakammi man kuriibaool kújupo di busaanaab man kuyab fáculool bee di kátipaak kaaku ban kúpurumulomi, man oo afasiken bukanak. 23Yensa nakammi man bukanak kufasoor kuban, naremboorumi cebool bee di fúlankiinaf bee elaw bo. Nan káliimaraak kúriiŋumi, nalakobomi cebool. 24Bare di nanan nikila busaanaab ban kuriibaool kommi man súm búloie dóo di falaf, ban poop lonkosey di enagubomi. Ban járusey yooyu di epenteniil. 25Nan ríiŋumi di waradabaw, Yensa nabilumi bee di bukoo ejaay di mumelam bámigut. 26Nan kuriibaak kúŋandenuloomi, di kuwonlenoorumi wág, di aaney, “Umu ápurapur!” Di kúrigoorumi di kákoli di móro. 27Bare yaŋ too galab nasankeniimi, “Jibeben súutuul, ínje. Takum jíkoli!” 28Peter nalaañenumi, “Arungaau, kaanjaat au, jáatikenom man ibil di mumelam bee di au.” 29Yensa nammi, “Bil.” Peter ápurumi di busaanaab ban natooŋumi ejaay di mumelam bee tan Yensa ammi. 30Bare nan Peter ajukumi mati lonkosey ékalaakalaa, nákolimi ban natooŋumi émig, nacibuloorumi, “Arungaau, pakenom!” 31Yaŋ too galab Yensa nañuurumi tiasofumi kañenool man ápurenuloomi aban naanoomi, “Wáay, au an kafiumak kutiitiñaa mo’omu. Wau kaane nubaj úyeget ugaba?” 32Nan kújupomi di busaanaab, lonkosey di ekatumi tootooto. 33Kalakomi dóo di busaanaab di kúkuntaajen man kumiiceelaetool, di aaney, “Di malegenam au eenomi Añiilau ati Atijamit!” 34Nan Yensa di kuriibaool kútipumi, di kúriiŋumi mofam mati Gennesaret. 35Bukanak kati bo di kumanjumi oo eenomi Yensa, di kuboñ bukan kuceen man kúriiŋenumi moola kapanak kukila búrom. Ban kújeetumulojeetum káju’utumi búrom bee di oo. 36Di kulawoomi mambi abonket akat man kusontaak kugor balisab bati kaloaool ceb ban anoosani agorumi kaloaool nakoyumi.

will be added

X\