MATIU 13

1Funakaf fukila fákonaf, Yensa nápurumi di eluupey man ajawumi alako kaliikitenak di kapanak kati kafintak. 2Di bajumi jameeŋ yati bukan yaje’e etookool bo, yakammi man ájupomi di busaana man alako dó. Man jameeŋey búrom ejummi di kafintak. 3Natooŋumi kaliikiteniil wajuupoe ñátum di kúreg: “Bajeembaj awaña aceen ápurulomi bee eluk bálut. 4Nan aleebubomi di kalaakak koola, baabu di bulomi di kapanak kati buruŋab, bánaakayitaab di buforubomi. 5Baabu di bulomi di fukooba, ban mof mujuupout, di bucumulomi galab, mati mofam kásankiak koolimo kuyajut. 6Bare nan bala’ab buyahulomi fijijij di buraayenumi bucetumi mati kufaarak kúsankiut. 7Baabu di bulomi di úlind wajuupoe, di uliilumi man ugooyenubomi. 8Bare baabu di bulomi di mof matoope ban di buliilumi, élut yanoosani yalagetumi ebabaj sílut sawuuje ceme, mba bukan kúfeegiir, mba kabanan di uñen wuuj wan alukumi. 9Abajumi uwos újamuma, najam!” 10Kuriibaool di kubilumi man kuceeŋumi, “Wau kaane nusanken bee di bukoo ñátum di kúreg ceb?” 11Yensa nalaañeniimi, “Muyuul Atijamit nakaanuukaan man jílaul malegenam mayofoaam mati jáyiaj jati bukinab bajakaab, bare bukoo Atijamit asenutumo. 12Ampi abajumi waaf, Atijamit panabenenool wuuj. Bare ampi abajutumi, Atijamit pánabotul hani wayiinkunaw wan abajumi. 13Moo kaane ínje nisankeniil ñátum di kúreg, mati koo kajiker ban leekujuk, koo ejam ban léekulaul. 14Malegen di bukoo wan aboñaau Yesaaya áriiŋeneenumi di furimaf fati Atijamit úlirooliroor di fommi: ‘Muyuul malegen panjijam bare léejilaulurer, ban malegen panjijiker bare leejijukurer. 15Mati bukanak buke úyegetiil újameriit kaliikiten kanoosani, di kulat ejam, ban di kumoyen. Takum kúciliil kujuk di uwosiil ujam di poop úyegetiil úlaul man kúlaañul bee di ínje man ibonketiil.’ 16Yensa narulenumi di kasanken, “Bare muyuul jakuujak, mati kúciluul kujujuk, ban di uwosuul ujanjam. 17Ínje eem di ereguul malegenam, kuboña kajuupoe di bukan kajoone kumammaŋ bee ejuk wan jijukeñaa, ban kujukutuwo di poop kumammaŋ kujam wan jijameñaa, ban kujamutuwo. 18“Jíyenten ñaa mati kúregak kati awañaau. 19Anoosani ajamemi furimaf fati Atijamit mati jáyiaj joola ban álaulut, moo kankaan nan bálutab balomi di kapanak kati buruŋab. Seetaanaay di ebil épurenufo di úyegetiil. 20Bálutab balomi di fukooba, boo eenomi bukanak súumiisuum man kujam furimaf fati Atijamit, ban kuyabufo di kásuumaay galab. 21Bare fúnokeneriit lói di úyegetiil, ban léekuyinen piyo. Nampi búyiik mba kásuutuken kubilumi mati kafiumak kati furimaf fati Atijamit, di kulaañ bálamuk. 22Balutab balomi ban úlind wajuupoe, boo eenomi kajamemi furimaf fati Atijamit, bare síwoonooras, di fubajaf di kásuumaak kati eroŋey yooliil yati dúniyaay uye, doo búrom di gooyenumi, ban kuwolenut jak majakam di eroŋey yooliil. 23Bálutab balomi di mof matoope, boo eenomi kajamemi furimaf fati Atijamit ban di kúlaul fo. Buku pankukaan mukaanaam majakaam kankaan nan bálut baliilumi, ban élut yanoosani yalagetumi ebabaj sílut sawuuje ceme, mba bukan kúfeegiir, mba kabanan di uñen wuuj wan alukumi.” 24Yensa nalaañumi aregiil kúreg kuceen: “Jáyiaj jati bukinab bajakaab joonojoono nan awaña alukumi bálut bajake di kalaakak koola aban. 25Bare fukaf fukila nan anoosani afintomi, alatoorool nabilumi man álukuromi bakonkab bati banogab ban najawumi. 26Ñaa nan bálutab buliilumi manteer bumaŋ kapooñen, no’onu banogab poop buliilumi. 27Kumiiceelak kati awañaau akila di kubilumi bee di oo man kommi, ‘Arungaau, lee au bálut bajake nulukumiñaa di kalaakak kooli? Kama ñaa banogab bándomi boo boobei búpurumulo?’ 28Awañaau nalaañeniimi, ‘Alatoorom aceen akammiñaa mo’omu.’ Ñaa di kumiiceelool di kuceeŋoomi, ‘Mante numammaŋ man wúli ujaw tíurupubo room?’ 29Nalaañeniimi, ‘A’a, jikatubo mati nampi jilakomi érupey, tikere pámbijirupoor di bálut buceen poop. 30Jikatubo man siliiloor bee nampi ejaley ériiŋumi. Di nanan nikila, panireg kujalaak, man kúrup banogab ban di kukoken tákon man bureemeni, ban di kujal bálutab man kútebul bo man kukaan bo di bulampan.’” 31Yensa nalaañ aregiimi kúreg kuceen: “Jáyiaj jati bukinab bajakaab joonojoono nan jikool jati jíbaar jimasitad jan an aluke di kalaakak koola. 32Hani jikoolaj uju jifaŋe man jitiitie bakool baabu búrom, bare nampi jiliilumi joo bee efaŋ múbaar maamu búrom ban di jibil jikaan jíbaar man basuwaab bubil bulon dó, ban di búwuul dó mati bee ebajey bíinaat.” 33Yensa naregiimi poop kúreg kuceen inki: “Jáyiaj jati bukinab bajakaab joonojoono nan múliitenuma man aseek aceen aŋare áciigoorumi wáriiŋe síkilo kabanan di futok sati epor bee ebol mbúur aban nákando múliitenuma, bee nampi éliitenumi búrom.” 34Yensa naliikitenemi bukanak búromiil di kúreg. Malegen, asankenderut hani wákon leejaat ñátum kúreg. 35Nakankaan mo’omu mati wan aboñaau áriiŋenumi búrom woote káliroor: “Ínje panisanken di kúreg, paniregiil wayofimi káŋarum no’ona di butuukab bati dúniyaay.” 36Yensa nápurumi di jameeŋey, alaañumi bee di eluupey dán alakomi. Kuriibaool di kubilumi bee di oo, di aaney, “Úregoli kábatulak kati kúregak kati banogab bati di kalaakak.” 37Yensa nammi, “Ampi alukumi bálutab bajakaab oo eenomi Añiilau ati anau. 38Kalaakak koo eenomi dúniyaay, ban bálutab bajakaab boo eenomi kuñiilak kati jáyiaj jati Atijamit. Banogab boo eenomi kuñiilak kati Seetaanaay. 39Alatooraau alukumi banogab oo eenomi Seetaanaay. Ejaley yoo eenomi ebaney yati dúniyaay, ban kujalaak koo eenomi simaleeka. 40Nan man banogab búrupimi man bureemeni, moo mákonam eetumi kabajoak di ebaney yati dúniyaay. 41Añiilau ati anau pánaboñul simaleekaool, man sípajul kápurumul di jáyiaj joola wakaanemi búrom man bukanak kukaan majakut di kájakaatimi búrom, 42ban pansileebiil bee di fúur yáamak nan sambunas sáceteriitumi, to’otu too pánkuciiŋit di pankutooñoor. 43Ñaa kajoonaak pankuwuŋen nan bala’ab di jáyiaj jati Ampaiil Atijamit. Abajumi uwos újamuma, najam! 44“Jáyiaj jati bukinab bajakaab joonojoono nan waaf wabaje fúkaw máamak wafokimi di kalaak kan ániine ákambumi ban nafokuwomi. Mati súumoosuum manteer pak, najawumi bee kanoomen fubajaf fan aakumi búrom ban nárudumi sígodaas di enoomey kalaakak kukila. 45“Inki, jáyiaj jati bukinab bajakaab joonojoono nan anoomena ammi eñesey yati bamaal balegen bati pema babajumi fúkaw máamak. 46Nampi ajukuyomi yábutoe, najawumi anoomenumi búrom wan abajumi ban nanommi pemaay ekila. 47Nalaañumi areg, “Inki, jáyiaj jati bukinab bajakaab joonojoono nan fuŋab fan kuleeba kuceen kuleebumi di falaf ban di kusofumi siwol sanoosani. 48Nan kusofumi siwolas simeeŋenufo tep fúlebi tús, kuleeba di kuñakufomi bee di kásikak man kulakomi bee kápajul siwolas sáamakas di kukaan di utekel, banjaat di kubeten bapecab. 49Mo’omu moo pambikammi di fúbanumaf fati dúniyaay eeno. Simaleekaas pánsirajul man sípajul kajakutak di kajakaak, 50ban di sileeb kajakutak bee di fúur yáamak nan sambunas sáceteriitumi, to’otu too pánkuciiŋit di pankutooñoor. 51Yensa naceeŋiimi, “Mante jílaulaul uwu búrom?” Di kulaañenoomi, “Éey.” 52Ñaa nabenentomi, “Moo kaane aliikitena anoosani ati sílingaas abilumi akaan aliina di jáyiaj jati bukinab bajakaab, oo nakankaan nan ati eluupey ápurenulomi waaf uceen wunkul di waaf uceen wafanlene di fuyofaf foola.” 53Nan Yensa abanumi káriiŋen kúregak uku, nápurubomi, 54ban nalaañumi bee di ésukey yoola ban akurimi. Nan alakobomi kaliikitenak bukanak di fukobaf, ñaa di wáaloiimi di kommi, “Boobei nabajulo malinlaam ume ban naŋoolenulo wajamurerutimi uwe? 55Jé! Kama ume let añiilau ati afaaŋenaau room? Lee iñaayool an kuwonkemi Mariyaama? Lee kutiool koo eenomi Yankuba, Esufa, Simon di Yúda? 56Lee kúliinool búrom kulakomi di wulaal? Kama ñaa boobei nabajulo mukaanaam umu búrom?” 57Moola di múyemiimi ban di kulatoomi. Bare Yensa naaniimi, “Aboñaau ati Atijamit nálebieneilebien banoosani manteer rino di ésukool di fiilool.” 58Yensa akaanut wajamurerutimi wajuupoe bo, mati kábajaataak kati káyinenak kooliil.

will be added

X\