MATIU 12

1Funak fákon fati kálebienak, Yensa di kuriibaool balakoe ewuujey ulaakaw wati mulukiinam. Kuriibaool bacaarab di busofiimi, di kutaatumi ewuut di kutokoñumo. 2Kufarisa kuceen kujukumi mo’omu, di kommi Yensa, “Jiker, kuriibai man koom di ekaaney wan sílingaas sífirenumi di funakaf fati kálebienak.” 3Bare Yensa nalaañeniimi man aaniimi, “Mante jitamburerut jiliiken furimaf fati Atijamit wan áyiau Dauda akammi, nan oo di kuriibaool bacaarab busofumi? 4Nanokennoken di éguutey yati Atijamit, man ayabulomi kúmbuurak káñiiaak kanenimi bújonlenab bati Atijamit, man ariko aban nacaabuko kuriibaool poop. Sílingaolaal sífirenfiren man an ariko leejaat kúsimenaak kati Atijamit cebiil. 5Mba mante jitamburerut jiliiken di sílingaas sati Muusa mati kúsimenaak kati Atijamit kubabaj buruŋ bati erok di fukobaf fáamakaf di funakaf fati kálebienak? Hani an letareg mati bukoo kulolo. 6Ínje eem di ereguul, wafaŋumi man ubaje fúkaw fukobaf fáamakaf woowe taate. 7Jílauleenjaat wan furimaf fo’ofu fufelumi, ‘Nimammaŋ man bukanak kubaj kabonketak bee di bukaaku, lee ekaaney búsimen bee di ínje,’ léejifireneen bukanak kaloutumi. 8Mati Añiilau ati anau eenomi arungaau ati mukaanaam mati funakaf fati kálebienak.” 9Yensa nápurutomi najaw bee di fukobaf fati Kúyahuudak. 10Di bajumi ániine an kañenool kucetumi. Bukan kuceen kálakodomi di kuceeŋumi Yensa, “Mante sílingaas soololaal sisenolaasen buruŋ bati kasonten di funakaf fati kálebienak?” mampi kukammi man kutaakenool. 11Nalaañeniimi man aaniimi, “Kaanjaat an esahaool eloe di ekoloŋ, ai di muyuul létapurenuuyo galab, hani funakaf fati kálebienak? 12Anau afaŋe ebaj fúkaw esaha! Mati sílingaas soololaal sisenolaasen buruŋ man ukaanaal waaf wajake di funakaf fati kálebienak.” 13Nammi ániinaau, “Lanten kañeni!” Kañenak di kulantenumi war, ban di kukoyumi, nan man kaaku koonomi. 14Kufarisaak kuceenak kúpurulomi di fukobaf man kujawumi kulako kamaloor bee eñesey buruŋab mampi kúbujummi Yensa. 15Nan Yensa amanjumi wan kommi eñesey mampi kukammi, nápurumi tan tikila, jameeŋey yalakotomi di eriibooroomi. Nasontenumi káju’utumi búrom, 16bare nagameniimi takum kureg hani an ákon mati oo. 17Nakammi mo’omu mati wan aboñaau Yesaaya aregeenumi mati furimaf fati Atijamit woote káliroor: 18“Jijiker, arokaau úmboom an imukenumi, oo ati búsusom, moola muyeom máamak. Panimeeŋenool di Búyegetab búmboom, ban panaregen bukanak búrom mati nanan nati kagamenak kúmboom nírindiiŋ. 19Oo letakaan kansankenak mulobaam mba letacibuloor di an, mba an letajam furimool di uruŋaw. 20Letatujer falint fákupoe mba letafok éwuŋenuma yamaŋe ecet, mo’omu moo naatumi kaanoak bee nampi akammi kapakenak kúmboom kuŋooleni, 21ban bukanak búrom pankujuumen fúgolumaf fooliil di kareesool.” 22Bukan kuceen kújeetumulojeetum an ájukeriit ban ásankeneriitumi bee di Yensa. Nasontenoosonten manteer akoyumi naŋooleŋŋoolen asanken di poop najuk. 23Bukanak búrom di wáaloiimi man kommi, “Mante paŋŋoolen kaan Añiilau ati Dauda room?” 24Bare nan Kufarisaak kujammi mo’omu di koonoomi, “Arungaau ati úgunaw, Belusebul esenool kánkumak kati kacesoor úgunaw.” 25Yensa namanjumi wan kuwoonoorumi ban naaniimi, “Di jáyi janoosani bukan kulatoorumi joo panjifumo wúp di poop ésuk yanoosani mba fiil fanoosani bukan kulatoorumi leefujuum lit. 26Kaanjaat Seetaanaay kacesoorooro, yoo épajulooropajulooro. Kama buu jáyiaj jooliyo joote ejuum eeno? 27Kaanjaat Belusebul esenaam kánkumak kati kacesoor úgunaw, kama ai asenumi kuriibauul kánkumak kati kacesoor úgunaw poop? Wan kuriibauul kommi di ekaaney pankureguul mati jikooŋut. 28Bare kaanjaat ínje oomu di kacesoor úgun ñátum di kánkumak kati Búyegetab Bátienaab bati Atijamit, kama ñaa jáyiaj jati Atijamit jíriiŋuloriiŋ jiban di muyuul. 29Mba anau buu panaŋoolen anoken eluupey yati an afaŋool kánkum, man ábotul wanoosani woola, leejaat nakokenookoken aban? Kammojaat, malegen panaŋoolen ábotul wanoowaniaw woola di eluupool. 30Ampi aleemi di ínje oo alatoorom, anoosani arambenutammi man ijojen bukanak tákon oo ayiisikena. 31Moo kaane ínje eem di ereguul, ampi akammi majakut di asankenumi ñíi panabonketi, bare ampi asankenumi ñíi mati Búyegetab Bátienaab, letabonketi jáng. 32Ampi asankenumi furim fati elat mati Añiilau ati anau, Atijamit panabonketool, bare ampi asankenumi furimaf fati elat mati Búyegetab Bátienaab, Atijamit letabonketurerool, iñeme mba nanan nábileuumi. 33“Búbaar bajake buwolewol búwolum bajake, búbaar bajakut buwolewol búwolum bajakut. Mati búbaarab banoosani búmanjumeimanjum ñátum di búwolumab boolibo. 34Muyuul ulun! Buu panjiŋoolen jisanken waaf wajake, nan muyuul di kúkouul jíjakaatimiñaa mo’omu? Mati butumab wápureuumi di búyegetab, woo busankenemi. 35An alegen, oo ápureneuumi waaf wajake di funenool fati wajakaaw wáamakaw wammi di oo nan fuyofo. An alegenout, oo ápureneuumi waaf wajakut di funenool fati wajakut wáamak wammi di oo nan fuyofo. 36Ínje eem di ereguul, di funakaf fati bagamab bukanak kasankenumi furim fanoosani fabajutumi fúkaw pankoote eyiiŋ. 37Mati Atijamit pánagamenumumi kurimak kooluul fúkouko mati jilolo mba jilout.” 38Di bajumi kuliikitena bukaaku kati sílingaas di Kufarisa bukaaku di kommi, “Aliikitenaau, wúli numammaŋ man úyiisoli fúmanjum.” 39Bare nalaañeniimi, “Bukanak kájakaatimi ban di kulatumi Atijamit nan muyuul jilawomi man íyiisuul fúmanjum man jifium. Bare létiyiisuul manteer rino fúmanjumaf fati aboñaau Yunusa. 40Mati nan man Yunusa alakomi kunak kúfeegiir di kuk kúfeegiir di faraf fati ewoley yáamakey, moo Añiilau ati anau, aatumi bee efokiey di tentaamey man alako kunak kúfeegiir di kuk kúfeegiir poop. 41Di funakaf fati kagamenak, bukanak kati Niniwet pánkuyitoul man kujuum fácul bukanak kati iñeme man kutaakeniil ban di kúfireniil mati kulolo. Mati bukanak kati Niniwet kútiiwootiiwoor kukat bálamuk majakutam, nan kujammi káriiŋenak kati Yunusa. Ban súm taate an aceen afaŋumi kákalaa Yunusa, oome! 42Di funakaf fati kagamenak, áyiau anaaraau ati mofam mammi di kapanak kati báridab, pánayitoul ajuum fácul bukanak kati jaat, man ataakeniil ban náfireniil mati kulolo. Mati nápurumulopurum di mof máloie bee ejamey yati malinlaam mati áyiau Suleimaan. Ínje eem di ereguul, ban súm an aceen afaŋe Suleimaan, oome! 43“Nampi bágun búpurumi di an, di buyuunoor bee di baŋaan eñesey tampi bugoogo, bare buraŋenut tampi bulako. 44Di buregooromi, ‘Ínje panilaañ bóot ban ípurumulomi.’ Nan bulaañumi, tibutookubo bati noo man boom tíikaar, man bútiene, ban di bucookoori jak. 45Di bujawumi buñes úgun wooni futok di ugaba uceen wafaŋumi man újakaatie bo, woo búrom man úriiboorul ulaañ unoken di anau man ucin dó. Di múlamukaam, kásumutak kati an akila koote efaŋ man kumingene mútiyaaram. Moo mákonam eetumi bee ekaani di bukanak kati iñeme kájakaatimi.” 46Nan Yensa alakomi kasankenak bukanak, iñaayool di kutiool di kujummi téeŋey, man kulawumi bee kasanken di oo. 47An aceen di bukoo naregumi Yensa, “Iñaayi di kuti’i bukooku bo téeŋey, man kulawumi bee kasanken di au.” 48Yensa nalaañenumi bee di ániinaau aregoomi, “Ai eenomi iñaayom? Di bukei eenomi kutiom?” 49Yensa nañuurumi kuriibaool nammi, “Buke kukammi iñaayom di kutiom! 50Ampi akammi emaŋey yati Ampaom Atijamit ammi di bukinab bajakaab, oo eenomi atiom, áliinom, di iñaayom.”

will be added

X\