MATIU 10

1Yensa náwonkuumi kúriiŋenaool uñeney di kugabaak tákon, ban naseniimi buruŋ bati kacesoor úgun di poop kasonten bukanak kan úsumut wanoosani di úsumut wáñiie wanoosani usofumi. 2Kúriiŋenaak kukila, ureesiil woo eenomi uwe: kutooŋandak, Simon, an kuwonkemi Peter, di atiool Anduru. Yankuba di atiool Yohan, koo Jebede kuñoolool. 3Filip, Batolome, Tomas, di Matiu nakaaneenkaan alagaau ati basaafab. Yankuba añiilau ati Alif, di Tade, 4Simon ati di Fujuumaf fati Kafaŋumi man kumaŋe moofiil, ban Yúdas Isikariot ápurumi di Yensa fáculey man akaan kusofool. 5Yensa naboñumi kúriiŋenaak uñeney di kugabaak, nájaatikeniimi man ammi, “Takum jijaw mofam man Kakaanutumi Kúyahuudak kommi mba takum jinoken hani ésuk yákon yati Samaria. 6Bare jijaw bee di bukanak kati Isirael koo kaanomi nan sisaha sájime. 7Jíriiŋeniil furimaf fajakaaf nan man jijawumi eeno, ‘Jáyiaj jati bukinab bajakaab jilofulolof.’ 8Jisonten bukanak káju’utumi, di jiyiten kacetumi bee di eroŋey inki. Di jitilul kati kafaañak, ban di jicesoor úgun kan wookumi. Nisenuusen buruŋ bee ekaan uwe baceeŋutuul bacaam. Jijaw iñeme man jikaan bukaaku uwe mákonam, ban takum jiceeŋiil bacaam. 9Takum an aaken sígodi sanoosani di jimaka jíkaanuma sígodi. 10Takum an aŋar ejonkonkoroŋ ejaay kajaaburuŋ, mba kaloa kuceen, mba usamati, mba egol éjaatooruma. Mati arokaau aate eyab bacaamool. 11Ésuk yáamak mba yayiinkun yampi jíriiŋumi, jinoken eluupey man jijukumi ampi amaŋumi man awalenuul di eluupool di jilako di eluupey ekila bee nampi jípurumi di ésukey ekila. 12Nampi jilakomi bee kanokenak kati eluupool, jisaaf bukanak kálakodomi. 13Kaanjaat kácindomi man kuwalenuul, kásuumaay kan jilawumi Atijamit pankulako di bukoo. Bare kukaanutumojaat, jilaw Atijamit takum álebien kúlawak kooluul man asen kásuumaayak kooluul bee di kukila. 14Kaanjaat ampi amaŋutumi awalenuul mba áyentenutuul wan joote káriiŋen, jifank kaporak kakotumi di úkamunuul nampi jípurumi di ésukey ekila. 15Ínje eem di ereguul mati di funakaf fati bagamab Atijamit Akiiyaau pánayiisen kabonket káamak bee kati Sodom di Gomora wuuj kati ésuk ekila yalatuumi. 16“Ínje eem di eboñuul nan sisaha saate kalako ban játunt yati símunduŋo soom. Muyuul joote kalinlo nan ujeeru ban poop joote kayinennoor nan úlaabaan. 17Jíkaanum! Mati bukan bukaaku pankusofuul kusen bee di fugamenaf fáamakaf di poop kutekuul di kukobak kooliil. 18Mati muyuul kuriibaom pankuruu’uul fácul kunifaan di kúyi kati mofam, bee eregey malegenam mati ínje fáculiil di Kakaanutumi Kúyahuudak. 19Bare nampi kuruu’uumi bee kagamen, takum jikaanooro síwoonooruul di mampi jootumi kasanken mba wampi jootumi ereg. Mati wampi jootumi ereg, woo paniseniuul di nanan no’onu. 20Mati panjisanken, bare kurimak kampi jisankenumi pánkujawumul di Búyegetab Bátienaab bati Ampauul Atijamit ammi di bukinab bajakaab. 21Kúniine bukaaku pankusen kútumbeiil mba kuti’iil man kubuji, ban kumpa bukaaku pankukaan moo mákonam di kuñooliil. Kuñiil bukaaku pankulat kuwolaiil ban pankuseniil man kubuji lus. 22Bukanak búrom pankulatuul mati muyuul kuriibaom. Bare anoosani ajummi lit manteer bee mo di fúbanumaf, Atijamit panapakenool. 23Nampi kúsuutukenuumi di ésuk ekila, jípur jitey bee di ésuk bee di ésuk. Ínje eem di ereguul mati leejiban burokab booluul búrom di sísukas sati Isirael bala’a Añiilau ati anau abil. 24“Aliina áfaŋeriit kákalaa aliikitenaool, ban amiiceel áfaŋeriit kákalaa arungaool.” 25Aliina aate kaano nan man aliikitenaool abajumi fumanjaf, moo mákonam, amiiceel aate kaano nan man arungaool abajumi kánkumak. Kaanjaat bukanak koone anifaanau ati fiilaf Belusebul anoosani ammi fiilaf pankuwonkool ureesaw wafaŋe man újakaatie. 26“Takum jíkoli bukan kukila. Mati an aŋoolenut áfimen waaf manteer úrajaati, mba an aŋoolenut asanken furim fati kákuuluj manteer fújamoaati. 27Wampi isankenuumi di kutunt di érimey, joote kasankenuwo inki di mawuŋam man jameeŋey búrom emanj. Wampi ibuusooruumi di kutunt joote kasankenuwo fatiya man jameeŋey búrom emanj. 28Takum jíkoli kabujemi eniiley bare leekuŋoolen kubuj yuutey. Bare jifaŋ man jíkolie an abujumi aban, nababaj kánkum kati eŋar suut sati bukan ban naleebuso di sambunas sáceteriitumi. 29Lee kunoomenenoomen mutitiir mooni mugaba asaari yákon ceb? Hani jákon di moo léejilorer tentaam Ampauul Atijamit bamanjut. 30Ban hani waluul upinipin. 31Moo kaane, takum jíkoli. Muyuul jifaŋe man jibaje fúkaw mutitiir juup! 32Ampi aregumi di bújonlenab bati bukanak mati oo ariibaom, ínje poop paniregumo di bújonlenab bati Ampaom Atijamit ammi di bukinab bajakaab. 33Bare ampi alatammi di bújonlenab bati bukanak mati oo ariibaom, ínje poop panilatool di bújonlenab bati Ampaom Atijamit ammi di bukinab bajakaab. 34“Takum jisof mati ínje nijawulojaw bee kájeetumul kásuumaayak bee baabe di dúniyaay. Ínje ijawulout bee éŋarul kásuumaay, bare muliba mabaake. 35Mati ínje nijawulojaw bee ekaan kápajuloor titoorey yati añiil ániine di ampaool, añiil anaare di iñaayool, ásampul anaare di alolaool anaare. 36Kulatoorool kafaŋumi man kújakaatie pankaan kati fiilool. 37Ampi amaŋumi ampaool mba iñaayool wuuj ínje, oo áriiŋut ekaan ariibaom, mba ampi amaŋumi añoolool ániine mba anaare wuuj ínje, oo poop áriiŋut ekaan ariibaom. 38Ampi atebooroutumi ébaarey yoola yati búpinab man ariibenom, áriiŋut ekaan ariibaom. 39Ampi añesumi kapaken eroŋey yoola, oo pánajimuyo, bare ampi ájimmi eroŋey yoola mati oo ariibaom, oo panabajuyo. 40“Ampi awalenuumi oo ínje nawalene, ban ampi awalenammi, oo Ampaom Atijamit nawalene áboñulammi. 41Ampi awalenumi aboña mati oo aboña ati Atijamit, panoote eyab oo di aboñaau bacaam bákon. Ampi awalenumi an ajoone mati oo najonjoon, panoote eyab oo di ajoonaau bacaam bákon. 42Ampi awulumi an ákon di kuriibaom kasofutimi di waaf man araan hani jipot jati mumel majilene, mati oo ariibaom, malegenam oo létajim bacaamool.”

will be added

X\