MARUK 9

1Yensa naaniimi, “Ínje eem di ereguul malegenam, kuceen di muyuul kammi bajuume taate leekucet bajukut jáyiaj jati Atijamit jábileuumi di kánkumak koolijo.” 2Nan bajumi wáriiŋe kunak futok di fákon, Yensa naŋarumi Peter, di Yankuba, di Yohan man kujawoorumi bee di fúlankiin fateboe man kulako sicebiil, man kommi di kajikeroolak, Yensa funkool di fulaañoorumi, 3wañool di ukammi uñiliñil ufiit pal, bajut hani an di dúniyaay ampi apos ufiit nan wo. 4Muusa di Eliya di kúrajuliimi man kulakomi kasankenak di Yensa. 5Ban Peter nammi Yensa, “Aliikitenaau, mo’omu múrindiiŋ síwoonoor máamak mati jajak man wúli ommi taate di au! Kob man ujuumen múguut múfeegiir, jákon bee di au, jákon bee di aboñaau Muusa, di jákon bee di aboñaau Eliya.” 6Koo kúfeegiirak di kúkolimi máamak manteer amanjut waa naate ereg. 7Furola di fúyiniil ban furimaf di fúpurulomi dóo di furolaaf di fommi, “Ume eenomi Añoolom ati búsusom, jijamool!” 8Yaŋ too galab di kujikerumi kúliren bare kujukut an, leejaat Yensa di bukoo. 9Nan kommi di káwaloulak ceb di fúlankiinaf, Yensa napankiimi takum kureg hani an ákon wan kujukeenumi, bee nampi Añiilau ati anau ayitoulomi di kacetumi. 10Di kusofooromi wan Yensa ajuumenumi, bare koo sicebiil kutaatumi kamaloorak mati wan kayitouloak di kacetumi ufelumi. 11Di kuceeŋoomi, “Wau kaane kuliikitenaak kati sílingaas koonesoon Eliya aate etooŋ abil bala’a Apakenaau Áamakau?” 12Nalaañeniimi, “Aboñaau Eliya malegen aate etooŋ abil man ajoonenlanken wanoosani. Buu ciikimi eeno di furimaf fati Atijamit mati Añiilau ati anau aate egaal di waaf wákoolenie ban koone oo lee waaf? 13Bare ínje eem di ereguul, mati aboñaau Eliya najawulojaw aban, bukanak di kukaanoomi wayeiimi nan man ciikimi mati oo.” 14Nan kúriiŋenaak karinomi kuceen kunaamoorumi di kuriibaak bukaaku, di kujukumi jameeŋ yáamak yalofiil. Ban kuliikitena kati sílingaas bukaaku bukooku man koom di kañakoor di bukoo. 15Yaŋ too galab jameeŋey búrom nan ejukumi Yensa di sáloiimi máamak, di kuteyumi bee di oo man kusaafoomi jak. 16Yensa naceeŋiimi, “Kama waa joom di kajaloor?” 17Di bajumi ákon di jameeŋey alaañenoomi nammi, “Aliikitenaau, bonket wey níjeetumulojeetum añoolom bee di au, mati bágun bookool ban ásankeneriit.” 18Nanoosani bágunab ube bookool, bubeteoobet tentaam, ban kagufak insi kúpurul di butumool, úñiiŋaw ninsi utooñoor ban eniiley di esay. Nilawumi kuriibai manteer di kucesoorubo, bare kuŋoolenut kukammo. 19Yensa naaniimi, “Wáay muyuul kakaanutumi kufiumaay! Bee nei neete kapiyo di muyuul? Bee nei neete ebaj kamuuten di muyuul? Jéetumulool bee taate.” 20Di kújeetumul añoolool bee di oo. Bare nan bágunab bujukumi Yensa, yaŋ di bukaan añiilau aboboken, ban nalomi tentaam mansi nabakoor, kagufak insi kúpurul di butumool. 21Yensa naceeŋumi ampaool, “Kama biñoo nei mo’omu moom di oo?” Nalaañenoomi, “Biñoo di mañiilenaam moola. 22Ninsi bumammaŋ ebetool di sambun di mumel bee ebujool. Baj káboteni di wúli, uŋoolenjaat mbi úrambenoli.” 23Yensa naanoomi, “Wau joone, ‘Uŋoolenjaat’? Ampi áyinenumi naŋooleŋŋoolen akaan wanoosani.” 24Yaŋ too galab añiilau ampaool nacibulomi man aanoomi, “Níyinenyinen. Urambenom manteer nibaj káyinen káriiŋe!” 25Nan Yensa ajukumi mati jameeŋ yooyu di kábenenoul, namakumi bágunab, man aanubomi, “Au bágunab bakaanemi an ájameriit di poop ásankeneriit, ínje eem di eregi, púr di oo ban takum úlaañurerul bee di oo.” 26Bágunab di bukaawumi ban di bubetoomi tím di búpurumi di oo. Añiilau nasayumi jund nan biiŋ, moo mukammi, bukan kajuupoe di kommi, “Há! Naceceture.” 27Bare Yensa nasofulomi kañenak kati ápuraau ayitenulomi man ajuum sem. 28Nan Yensa anokeneenumi eluupey, kuriibaool di kuceeŋoomi koo sicebiil, “Wau kaane wúli uŋoolenut ucesoor bágunab ubu?” 29Yensa nalaañeniimi, “Bágunab baanomi nan ube an letaŋoolen acesoorubo manteer alawujaat.” 30Yensa di kuriibaool di kúpurumi di kapan kukila, man kúlamumumi kapanak kati Galili. Yensa amaŋut man an amanj boobei oo ammi, 31mati man alakomi kaliikiten kuriibaool naaniimi, “Añiilau ati anau bukan koote épur di oo. Panabuji, ban kunak kúfeegiir fácul pánayitoul di kacetumi.” 32Bare kúlaulut wan Yensa alakomi eregey, di kúkolimi eceeŋooley wan felumi. 33Yensa di kuriibaool di kúriiŋumi ésukey yati Kapaanaum. Nan kulakomi di eluupey, naceeŋiimi man ammi, “Waa jilakoeene kamaloor di buruŋab nan ulakoaami ebiley?” 34Bare di kutunoorumi sii, mati kulakoeenlako kamaloor di buruŋab mati ai afaŋe kákalaa. 35Nalakomi ban nawonkulomi kúriiŋenaak uñeney di kugabaak. Naaniimi, “Ampi amaŋumi elo fácul, oo aate elaañ bálamuk ban nakaan amiiceel ati anoosani.” 36Ñaa naŋarumi añiil, ban najuumenool fáculiil aban, nagaabool man aaniimi, 37“Ampi awalenumi añiilau ume ñátum di kareesom ínje nawalene, ban ampi awalenammi, lee ínje nawalene bare áboñulammi nawalene.” 38Yohan nammi Yensa, “Aliikitenaau, wúli nujujuk ániine alakoeene kacesoor úgun ñátum di kareesi, bare wúli núfirenoofiren man akaan, mati oo di wulaal uletaal buruŋ bákon.” 39Bare Yensa nammi, “Takum jífirenool. Mati ampi akammi wajamurerutimi wákon ñátum di kareesom oo yaŋ letaŋoolen asanken wájakaatie mati ínje. 40Mati ampi alatutumi wulaal, oo oomu di wulaal. 41Ínje eem di ereguul malegenam mati ampi abajulomi mumel asenuul man jiraan mati muyuul kuriibaom, an akila malegen létabajaati búgalenab boola. 42“Ampi akammi man ákon di káyinenumi di ínje nan kuñiilak man akaan majakut, kóyume man aleebi di falaf bakoker fukooba fúnegenuma di ekondoorool. 43Kañeni kukaanijaat man ukaan majakut, miinko pat ban nubeten. Kóyume man unoken di eroŋey yati bándoorey bámongoe, eniili yooken uñenaw Ugabaaw ban nubeteni di sambunas síceteriitumi. 44Ban balolab báceteriitumi buriemi siniiliil ban sambunas síceteriitumi. 45Di poop, kákamuni kukaanijaat man ukaan majakut, miinko pat ban nubeten. Kóyume man unoken bámongoe di eroŋey yati bándoorey di bukinab bajakaab, eniili yooken úkamunaw ugabaaw ban nubeteni di sambunas sáceteriitumi. 46Ban balolab báceteriitumi buriemi siniiliil ban sambunas síceteriitumi. 47Kaanjaat jícili jikaani man ukaan majakut, lóokul jo ban nubeten. Kóyume man unoken di jícil jákon di eroŋey yati bándoorey di bukinab bajakaab, eniil yooken kúcilak kugabaak ban nubeteni di sambunas sáceteriitumi, 48ban balolab báceteriitumi buriemi siniiliil ban sambunas síceteriitumi. 49Mati sambun pansikaan anoosani atiluli nan man musisam mukaanemi búsimen butiluli. 50Musis waaf wabaje fúkaw, bare kafirak koolimo kúpurujaat, buu pammuŋoolen mukaan man mufir inki? Jibaj futitooruul bapaalaab bajummi nan musisam ban di jibaj kásuumaay bee di anoosani.”

will be added

X\