MARUK 8

1Funak fákon jameeŋ yiceen yáamak yati bukan inki ejojeenumi tákon. Nan bukanak kubajutumi wampi kuri, Yensa náwonkuumi kuriibaool man aaniimi, 2“Nibabaj káboteni káamak bee di jameeŋey. Buke kulakolako di wulaal wáriiŋe kunak kúfeegiir bálamuk, babajut waaf wan koote eri. 3Eeniijaat kulaañ bóot bákuumenutiil, pankulo kutujo di buruŋab. Mati kuceen kújawumulojawum ban lóie.” 4Kuriibaool di kuceeŋoomi, “Buu pan an aŋoolen ákuumen bukanak buke baabe di baŋaanab?” 5Yensa naceeŋiimi, “Kúmbuur kooni buu jibaje?” Di kulaañenoomi, “Kooni futok di kugaba.” 6Nájaatikenumi jameeŋey elako tentaam. Naŋarumi kúmbuurak kooni futokey di kugabaak, nasalumi aban natingukomi ban nasenumi kuriibaak man kucaabumi bukanak. Di kukaan mo’omu di jameeŋey yati bukanak nan man Yensa aregiimi. 7Di bajumi muwol mupinaay, Yensa nasalumi mati mo. Nájaatikenumi kuriibaool kucaabiil mo. 8Di kurimi manteer anoosani apooñ mab. Warinomi kuriibaool di kumukenumi, manteer kumeeŋenumi, utekel wooni futok di ugaba. 9Di bajumi kúniinaak káriiŋe síwilaas sibakiiras kamaatubomi. Yensa nakammi man bukanak kulaañ bee sísindoiil, 10Oo di kuriibaool kújupomi di busaanaab galab man kútipumi bee kapanak kati Dalumanuta. 11Kufarisa kuceen kujawulojaw bati Yensa man kutaatumi kañoosoorak di oo. Di kuliikumi eyinkooley di áyiisiil fúmanjum, man kufium mati kánkumool di Atijamit kújawumulo. 12Yensa nayiifumi fáap di búyegetool nammi, “Wau kaane bukanak kati jaat bee eñes man íyiis bukoo fúmanjum? Ínje eem di ereguul malegenam, fúmanjumaf fukila létiyiis bukanak kati jaat.” 13Nápurumi di bukoo, nájupomi inki di busaanaab, ban nátipumi bee kapanak kaaku kati falaf. 14Bare kuriibaak kati Yensa kújimeenjim kájeetumul mbúur, rino fúmbuur fákon ceb di bukoo dóo di busaanaab. 15Yensa nagameniimi nammi, “Jijiker, jíkaanum múliitenumaam mati Kufarisaak di mati kati Herod.” 16Di kulakomi kamaloor wan aregumi di kommi, “Ubajutaal mbúur.” 17Bamanjerab waa eenomi síwoonooriil, ñaa Yensa naceeŋiimi, “Wau kaane di jimaloorumi mati jibajut mbúur? Mante hani bee iñeme jíjukeriit mba jílauleriit room? Mante úyegetuul usasay? 18Jooken kúcil leejijuk, ban jooken uwos leejijam? Leejiwoolo wan ikammi? 19Nan itingumi kúmbuurak kooni futokey man íkuumenumi bukanak kawuuje síwili futok, utekel wati burinenab wooni buu jimukene jimeeŋen nan jirimi jiban?” Di koonoomi, “Wooni uñen di ugaba.” 20“Kama nan itingumi kúmbuurak kooni futokey di kugabaak man íkuumenumi kawuuje bukan síwilaas sibakiiras, utekel wati burinenab wooni buu jimukene jimeeŋen nan jirimi jiban?” Di koonoomi, “Wooni futokey di ugabaaw.” 21Naceeŋiimi, “Mante bee jaat jílauloorut room?” 22Nan Yensa di kuriibaool kúriiŋumi Beteseda, bukan kuceen kájeetumulo ániine ájukeriitumi bee di oo, ban di kulawoomi manteer nabaj kabonket man agor ániinaau. 23Yensa násofulomi kañenak kati ániinaau ájukeriitumi, man aruuoomi kúpur di ésukey. Nalacenumi kúcilool aban, narembenumi uñenool di ko ban naceeŋoomi, “Mante nujujuk waaf room?” 24Ániinaau najikerumi áliren ban nammi, “Nijujuk bukan, bare bukoo kammi di ejaay koonokoono nan úbaar.” 25Yensa inki nalaañumi aremben uñenool di kúcilool. Ániinaau umu najikerumi taw, kúcilool di kukoy jaj, ñaa naŋooleŋŋoolen ajuk tíen wanoosani. 26Yensa naanoomi alaañ bóot, man aanool, “Takum ulaañ bee di ésukey.” 27Yensa oo di kuriibaool di kujawumi bee sísukas salofoorumi di Kasaaria Filipo. Nan koomeenumi di ejaay di buruŋab, Yensa naceeŋiimi, “Kama, ai bukanak kurege oo ínje?” 28Di kulaañenoomi, “Yaaya Átiigulenaau. Bukaaku koone, au aboñaau Eliya. Bukaaku poop koone, au ákon di kuboñaak kati naaniŋ.” 29Ban naceeŋiimi, “Bare muyuul, ai jisofumi oo ínje?” Peter nalaañenoomi, “Au eenomi Apakenaau Áamakau.” 30Bare napankiimi mati takum kureg hani an ákon mati oo. 31Yensa nataatumi kaliikitenak kati kuriibaool mati Añiilau ati anau naate egaal di waaf wajuupoe wákoolenie, ban naate ebaj búlat, kunifaanak, kúsimenaak kunifaanak kati Atijamit di kuliikitenaak kati sílingaas. Bukanak pambikubujool, bare di funakaf fúfeegintenaf Atijamit pánayitenulool di kacetumi inki. 32Yensa naregumomi tíen bee di kuriibaool, bare Peter nawonkool kupano ban namakoomi. 33Najonlenumi ban najiker kuriibaool, napankumi Peter man ammi, “Tóro di ínje, au Seetaani! Mati au ulaañut bati Atijamit, bare nulanlaañ bati bukanak.” 34Nawonkulomi jameeŋey di kuriibaool man aaniimi, “Ampi amaŋumi bee kariiben ínje, naate ekat bálamuk kawoonoorak koola di kamaŋak koola, ban natebooro ébaarey yati búpinab ban nariibenom. 35Ampi amaŋumi kapaken eroŋey yoola, oo letabajuyo. Bare ampi amaŋutumi kapaken eroŋey yoola mati oo ariibaom, panabajuyo. 36Mati kásuum kei anau aate ebaj, kaanjaat nababaj dúniyaay búrom ban nábajaati yuutey yoola? 37Waa anau panaŋoolen atitum di yuutool fúkouyo? 38Ampi apuñomi ínje di kurimom titoorey yati buke kalatumi Atijamit di kájakaatimi! Oo poop Añiilau ati anau panapuño’ool, nampi álaañuumi di mawuŋam mati Ampaool di simaleekaas sálirooraas.”

will be added

X\