MARUK 7

1Funak fákon Kufarisa bukaaku di kuliikitena kupinaay kati sílingaas kápurumulomi di ésukey yáamakey yati Yerusalem di kubilumi kujoj tákon di Yensa. 2Di kujukumi mati kuriibaak bukaaku kati Yensa kuriri ñátum di uñeniil man usikoe, moo eenomi bañaakuleneenut nan man buruŋab booliil buceeŋumi. 3(Mati Kufarisaak di Kúyahuudak búrom, kúrieriit bañaakulenut nan man buruŋab booliil kuceeŋumi, moo eenomi esofey mukaanaam mati kufannaaniŋiil. 4Nan kúpurulomi di funoomenaf kúrieriit waaf wan kunommi, leejaat utilulitilul. Kubabaj poop mukaanaay majuupoe man kukaanemi, maanomi nan katilulak kati síraanuma, sileera di sibool san kujoonenumi ñátum mulap máyeme.) 5Kufarisaak di kuliikitenaak kati sílingaas di kuceeŋumi Yensa, “Wau kaane kuriibai kúriibeneriit kájaatikenak kati mukaanaam mati kufannaaniŋolaal, bare ninsi kuri ñátum di káñaakulenaataak? 6Yensa nalaañeniimi, “Muyuul mamisam! Kama aboñaau Yesaaya nakooŋeenkooŋ nan áriiŋeneenumi mati muyuul, nan man ciikimi, ‘Bukanak buke kúlebienanlebien ñátum di utumiil ceb, bare úyegetiil ulee di ínje. 7Kamiiceelaetomak kooliil koo kubajut fúkaw, mati koo kuliikiteneliikiten bukanak sílingaas sati bukanak kaan nan súmboom.’ 8Muyuul jiñoosumi esofey sílingaas sati Atijamit san aceeŋolaami, ban di jisof líŋ kaliikitenak kati mukaanaam mati bukanak.” 9Yensa naaniimi, “Muyuul jikankaan jak di ebaj buruŋ balinloe bati eñoosey wan Atijamit ájaatikenumi man jisofumi mukaanaam mati kufannaaniŋuul ceb! 10Sílingaas sati Muusa soone, ‘Lébien ampai di iñaayi,’ ban, ‘Anoosani álebienutujaat ampaool mba iñaayool, oo aate ebuji pak.’ 11Bare di jiliikitenemi bukanak mati an abajujaat waaf wampi árambenumumi ampaool mba iñaayool, di joonool areg, ‘Wo’owu woo Koruban’ (moo eenomi, wasenimi bee di Atijamit) 12Kukammojaat usenutiil buruŋ bee karamben ampaiil di iñaayiil. 13Ñátum di mo’ome jiheelenumi furimaf fati Atijamit man jiliikiten mukaanaam mati kufannaaniŋuul bee di úwoloorumuul woote ekaan. Di bajumi waaf uceen wajuupoe wan jikaanemi wanokoorumi nan mo’omu. 14Yensa nawonkulomi bukanak inki man kubil tákon ban naaniimi, “Muyuul búrom, jíyentenom man jílaul. 15Lee waaf wanokenemi di butumab bati anau woo usikeneoomi, bare wápureuumi di butumab bati anau woo usikeneoomi.” 16Kaanjaat anoosani abajumi uwos újamuma, najam! 17Nan Yensa akatumi jameeŋey bálamuk, man anokenumi di kalimbisak, kuriibaool di kúlofuloomi man kuceeŋoomi wan kúregak kufelumi. 18Naaniimi, “Mante muyuul poop jílaulut? Mante jimanjut mati wanoosani wan an akaanemi di butumool, uŋoolenut usikenool. 19Mati woo letunoken di búyegetool bare di farool, ban nalanjowo?” (Naregumomi mati muriaam búrom muŋoolene muri’i.) 20Ban nabenentomi, “Wápureuumi di anau woo usikeneoomi. 21Mati di síndeneey yati anau, búyegetab bati anau, ure púreuumi síwoonoor sájakaatie, kaseeketak di kániine’etak, jákuut, ebujey, di basang aseek mba di ániine ati an, 22emaŋ wan ukilutumi, bújakaati, kabunt, kayenet, kaleetoor, kasuulen, máyuo di mágotet. 23Májakaataam umu búrom múpurumulopurum di búyegetab bati anau, moo musikenoomi.” 24Yensa nápurutomi najaw bee di mofam mati Turo. Boo nalakomi di eluup eceen namaŋeenumi kayofo, takum bukanak kumanj mati oomu bo, bare aŋoolenut ayofo. 25Bare yaŋ di bajumi aseek an jijaŋaool bágun busofe, najammi karankool ban nabil bee di oo man alomi kúfima. 26Nalawoomi manteer Yensa nacesoor bágunab di jijaŋaool. Aseekau umu oo Ágirik, awolimi di kapanak kati Fonekia di mofam mati Siria. 27Yensa naanoomi, “Kob man kuñiilak kutooŋ kuri kupooñ, mati senut man an aŋar muri mati kuñiilak, asenumo múkurukam man muri.” 28Bare nalaañenoomi, “Éey, arungaau, bare hani múkurukam murieri tan oomaañaa di furiaf, burinenab bati kuñiilak.” 29Yensa naanoomi, “Mati balaañenerab booli, mbi ujaw. Bágunab bukatenkaten añooli.” 30Nan áriiŋumi síndeey nátookudomi añoolool man afintoe di bacaacab ayin tem, di kumanjumi mati bágunab búpupur di oo. 31Yensa nápurumi kapanak kati Turo ban najawumi bee kapanak kati Sidon bee falaf fati Galili, ban nájawumumi di kapanak kalofumi Dekapolis. 32Boo di kújeetumulo ániine ájameriitumi ban ásankeneriit, di kulawoomi man agorool. 33Yensa nápurenoomi di jameeŋey bee kapan kuceen koo sicebiil. Nárudumi musinkool di uwosaw wati ániinaau. Ñaa nalacenumi musinkool, nagorumi fúredimpaf fati ániinaau. 34Najikerumi fatiya, nafoolen, naanoomi, “Efafata!” yoo eenomi, “Wámbul uwosaw.” 35Yaŋ too galab uwosaw wati ániinaau di úwambulimi ban fúredimpool di fukatenumi natooŋ kasankenak luul. 36Yensa natonkiimi mati takum kureg hani an ákon. Bare nafaŋumi man aaniil takum kureg an, koo di kufaŋumi man kubaje fuuñ fati emaŋ man kureg mukaanaool. 37Kajammomi di wáaloiimi wuuj kúkoiil di kommi, “Wanoosani wan akammi ujajak máamak. Nakammi hani kájameriitumi di kujam kásankeneriitumi di kusanken!”

will be added

X\