MARUK 6

1Yensa nápurubomi, oo di kuriibaool di kulaañumi bee di ésukool ban akurimi. 2Di funakaf fati kálebienak nataatumi kaliikitenak dóo di fukobaf, kajuupoe di kujantenumi kaliikitenak koola di wáaloiimi. Di kuceeŋumi, “Boobei nabajulo wahaw uwu búrom? Malinlo maano buu naake? Bei nabaje kánkum bee ekaan wajamurerutimi uwe! 3Kama lee oo afaaŋenaau, añiilau ati Mariyaama ban nakaan kutiaak kati Yankuba, Yose, Yúda di Simon, ban kúliinool poop lee bukooku man kucinoore di wulaal? Di kulatool jáng. 4Yensa naaniimi, “Aboña ati Atijamit nálebieneilebien banoosani, manteer rino di ésukool, bukanool di fiilool.” 5No’onu Yensa aŋoolenut áyiisiil wajamurerutimi máamak leejaat bukan káju’utumi kupinaay ceb di ésuk ekila kan arembenumi uñenool man kukoy. 6Yensa wáalowaalo máamak mati kubajut káyinen di oo. Ban najawumi sísukas salofoorumi man alakomi kaliikitenak bukanak. 7Nawonkulomi kúriiŋenaool kooni uñeney di kugabaak bee eboñiil kugaba-kugaba man kufasoor, ban naseniimi buruŋ bati kacesoor úgunaw. 8Nájaatikeniimi takum kujaw waaf di wóro, takum an aaken mbúur, di ejonkonkoroŋ, ban takum an aaken sígodi di jimaka jíkaanuma sígodi, leejaat egol éjaatooruma. 9Naregiimi man kukaano usamati bare takum an aaken hani kaloa kuceen. 10Ban naaniimi, “Di eluupey yati an jiwalenimi, jilako eluupey ekila bee nampi jípurumi di ésukey. 11Nampi jíriiŋumi ésukey eceen bare kácindomi di kulat kawalenuul ban di kulat káyentenuul, nampi jilakomi épurey ésukey ekila, jifank kaporak kakotumi di úkamunuul, di káyiiseniil mati utumuul ulee bo di éjimey yooliil.” 12Di kúpurulomi man koom di káriiŋenak furimaf fati Atijamit di eregey bukanak koote kátiiwoor kukat bálamuk majakutam. 13Di kucesoorumi úgun wajuupoe ban di kunaanen túlu káju’utumi kajuupoe ban di kusonteniimi. 14Áyiau Herod di ejamey wan kulakomi kasankenak, mati kareesool kujamojamo bee di bukanak ban di kuyiisoor banoosani. Bukan kuceen koonsoon, “Yaaya Átiigulenaau Atijamit áyitenulool di kacetumi. Moo kaane, nababaj wánkum uwe woowu di burok di oo.” 15Bukaaku koonsoon, “Oo Eliya.” ban bukaaku koonsoon, “Oo aboña, ákon di kuboñaak kati noo.” 16Nan Herod ajammomi mati Yensa nammi, “Yaaya, an ínje isenumi buruŋ man kumiin fúkaaf foola, ayitoulo di kacetumi.” 17Mati Herod naboñeemboñ kutiika kuceen man kusof Yaaya, kukokenoomi ban di kukuloomi dán bukanak kukuleimi. Herod nakankaan mo’omu mati Herodias, oo nayabeenooyab, handeneen oo aseekau ati atiool Filip. 18Yaaya Átiigulenaau ninsi naregeenumi Herod, “Mo’omu ñíiñii mati sílingaas soololaal siregut man au úbotul aseekau ati ati’i uyab.” 19Herodias nabajumi búlat bee di Yaaya man amaŋumi ebujool, bare aŋoolenut akammo. 20Mati Herod nákolikoli Yaaya, namammanj mati Yaaya ániine ajoone ban náliroor, napooyipooy jak. Nan Herod ajammi wan asankenumi, búyegetool di bújiisoorumi, bare ninsi áyentenool di kásuumaak. 21Bareñaa di múlamukaam, aseekau Herodias nabajumi buruŋ. No’onu funakaf fati karuukenak kati ebajiey yati Herod, nawonkulomi kupaalool kurokoorool di kurungaool kutiikaak káamakak di poop kúfacula kubaja kati Galili. 22No’onu añiilau anaaraau ati Herodias ajawulomi aboom, násuumenumi Herod di kujaaburuŋak koola. Áiyau Herod nammi ajaŋaau, “Lawom mati wampi umaŋumi paniseniwo.” 23Nababaat bee di oo nammi, “Wampi ulawammi, paniseniwo, hani bútingumab bati jáyiaj júmboom.” 24Ban nápurulobomi, naceeŋumi iñaayool, “Kama wei panilawool man asenom?” Iñaayool nalaañenoomi, “Fúkaaf fati Yaaya Átiigulenaau.” 25Nawookoorumi alaañ bati Herod, nalawoomi man aanoomi, “Ínje nimammaŋ man usenom taate too laj fúkaaf fati Yaaya Átiigulenaau di kapalaat.” 26Herod súumutool máamak. Bare aŋoolenut áfiren mati kabaatak kan akammi di bújonlenab bati kujaaburuŋak kalakomi furiaf di oo búrom. 27Yaŋ too galab áyiau naboñumi furimool apooya manti áŋarulool fúkaaf fati Yaaya. Atiikaau apooyaau najawumi bee dán bukanak kukuleimi man kumiinulofomi. 28Atiikaau apooyaau nájeetumulofomi di kapalaat, ban nasenufomi ajaŋaau, tíariiŋenufomi iñaayool. 29Nan Yaaya kuriibaool kujammi wabajomi, di kubilumi kuŋarumi biiŋab boola tikufok. 30Kúriiŋenaak di kulaañulomi bee di Yensa, man kuregoomi wanoosani wan kukaaneenumi di wan kuliikiteneenumi bukanak. 31Yensa naaniimi, “Jipumaal úloiaal jayiinkun jameeŋey bee tan tunoore man úyokuloaal jayiinkun.” Mati bukan kajuupoe kommi di ebiley di kujaw manteer Yensa di kúriiŋenaool kubajut hani nanan nati furi.” 32Di kújupomi man kujaw di busaanaab bee ban tunoore mambi kuŋoolen kulako bo cebiil. 33Bare bukan kajuupoe di kujukiimi di ejaay, di kumanjumi bukoo. Ñaa di kuteyumi kujawubomi di úkamun kápurumul di sísukas búrom, di kupiiten Yensa di kuriibaool. 34Nan Yensa awaloulomi di busaanaab najukumi jameeŋ yáamak yati bukanak, nabajumi káboteni káamak bee di bukoo, mati kukankaan nan sisaha sabajut amata. Nataatumi kaliikeniilak upan wajuupoe wati Atijamit. 35Nan bala’ab bulakomi kátinkaak, kúriiŋenaool di kubilumi bee di oo man kommi, “Baabe tunootunoor sii, ban bala’ab boobu di ejon. 36Katen bukanak man kuŋoolen kujaw bee di sísukas salofumi baabe di urambaaw bee enoom wampi kuri.” 37Bare Yensa nalaañeniimi, “Muyuul di kúkouul jiseniil wampi kuri.” Di kulaañenoomi, “Mante numammaŋ wúli panujaw man unoom mbúur butum sígodi sidenaari siceme sigaba man useniil kuri?” 38Naaniimi, “Kúmbuur kooni butum buu jibaje? Jijaw jijuk.” Nan kumanjumi butum buu kubaje, di kulaañenoomi, “Kooni futok di siwol sigaba.” 39Yensa nájaatikeniimi búromiil man kulako tentaam ban étuureey yommi kukaan kujoj. 40Di kukammi kujoj man kulako tanootani, bukaaku wáriiŋe bukan kugaba di uñen, bukaaku ceme. 41Yensa naŋarumi kúmbuurak kooni futokey di siwolas sigabaas, man ajikerumi fatiya, nasalumi bee mati muriaam. Natingukomi aban, nasenukomi kúriiŋenaool, man kucaabukomi bukanak, ban nacaabiimi siwolas sigabaas poop manteer anoosani amaatumi nabaj. 42Bukanak búrom di kurimi biyok kupooñ tep. 43Kúriiŋenaak di kumukenumi burinenab manteer kumeeŋenumi utekelaw wooni uñen di ugaba. 44Karimi kúmbuurak kukila kooni futokey koo eenomi kúniinaak kawuuje síwili futok. 45Nan mo’omu múpurutomi ceb, Yensa naregumi kúriiŋenaool kújupo di busaanaab man kútip kapan kaaku bee Beteseda man kuyabool fácul. Man oo afasiken jameeŋey yati bukanak kujaw. 46Nan kukatoorumi di bukoo, najawumi aremboorumi di fúlankiinaf man alawumi. 47Nan ríiŋumi káliimaraay, Yensa nalakobomi cebool. Kúriiŋenaool di kurinoulomi dóo di busaanaab di titoorey yati falaf fati Galili. 48Naŋandenumi mati kuriibaool di bugaal báamak di kulakomi jaweenaj, mati fárusaf fáamakaf foofu di kapenteniil baabaaba di falaf. Di nanan náriiŋe sirig sífeegiir di futok di yákon di waradabaw, Yensa nalakomi ejaay di mumelam. Nasofeenumi bee ewuujiil. 49Bare nan kujukoomi ejaay di mumelam, di kusofoomi mati oo ápurapur, di kucibuloorumi. 50Mati koo búromiil kujukoojuk, di kúkolimi máamak. Bare Yensa nasankeniimi galab man ammi, “Jibeben suutuul, ínje, takum jíkoli.” 51Nájupomi di busaanaab di bukoo, ban fárusaf di fuyinumi tem. Di wáaloiimi máamak. 52Mati kuŋoolenut kúlaul wan kákuumenak kati bukanak ñátum di kúmbuurak, mati úyegetiil usasay. 53Nan kútipumi kapan kaaku, di kúriiŋulomi mofam mati Gennesaret, di kukok busaanaab di kásikak. 54Nan kuwaloulomi di busaanaab, bukanak kantomi bajuumer di kúlauloomi galab. 55Di kuteyumi bee di siluupas san kucinoorumi búrom kapanak kanoosani kan kujameoomi, di kutooŋumi kájeetumulak káju’utumi di silaakas sooliil. 56Baabaaba naje’e, di sísuk sayiinkun, di sáamak, mba di sísuk sati fatiya ninsi kufinten káju’utumi di kunoomenak, bukoo di kulawumi mati Yensa man abonket akat man káju’utumi kugor hani balisab bati kaloaool káamakak, man anoosani aŋoolenumi agoruko nakoy jaj.

will be added

X\