MARUK 4

1Yensa natooŋumi kaliikitenak inki di kapanak kati kafintak. Di bajumi jameeŋ yati bukan yaje’e etookool bo, yakammi man Yensa ájupomi di busaanaab man alako dó di falaf, ban jameeŋey di ejummi di kafintak. 2Nalakomi kaliikiteniilak waaf wajuupoe ñátum kúreg, ban di kaliikitenak koola naaniimi: 3“Jíyenten! Bajeembaj awaña aceen ápurulomi bee eluk bálut. 4Nan aleebubomi di kalaakak koola, baabu di bulomi di kapanak kati buruŋab, bánaakayitaab di buforubomi jaj. 5Baabu di bulomi di fukooba ban mof mujuupout, di bucumulomi galab, mati mofam kásankiak koolimo kuyajut. 6Bare nan bala’ab butebulomi buyahulomi fijijij, di buraayenumi, mati kufaarak kúsankiut. 7Baabu di bulomi ban úlind ujuupoe, di buliilumi man ugooyenubomi, ñaa bálutab bulorenut. 8Baabu di bulomi di mof matoope ban di buliilumi jak ban di bulagetumi. Di bubilumi bubaj élut yanoosani yalagetumi ebabaj sílut sawuuje kabanan di uñen, bukan kúfeegiir di poop ceme.” 9Yensa nammi, “Oo abajumi uwos újamuma, najam!” 10Di múlamukaam, nan Yensa alakomi cebool di kúriiŋenaak uñeney di kugabaak, kan kulaoorubomi di kuceeŋoomi wan kúregak kúbatulumi. 11Yensa naaniimi, “Muyuul Atijamit nakaanuukaan man jílaul malegenam mayofoaam mati jáyiaj joola. Bare bukaaku nisankeniisanken ñátum di kúreg, 12mambi kujiker ban leekujuk, kujam ban léekulaul, takum kulaañ man ibonketiil. 13Yensa naceeŋiimi, “Mante jílaulut wan kúregak uke kúbatulumi? Kama buu panjikammi man jílaul kúregak uke búrom? 14Awañaau alukumi bálutab boo eenomi furimaf fati Atijamit. 15Bálutab balomi di kapanak kati buruŋab, boo eenomi nan kajamemi furimaf fati Atijamit ban Seetaanaay yaŋ too galab di ebil épurenufo di úyegetiil. 16Bálutab balomi di fukooba, boo eenomi kajamemi furimaf fati Atijamit, di kuyabufo di kásuumaay. 17Bare fúnokeneriit lói di úyegetiil, bare léekuyinen piyo. Nampi búyiik mba kásuutuken kubilumi mati kafiumak kati furimaf fati Atijamit, di kulaañ bálamuk galab. 18Bálutab balomi ban úlindaw ujuupomi, boo eenomi kajamemi furimaf fati Atijamit, 19bare síwoonooras, di fubajaf di kásuumaak kati eroŋey yooliil, di emaŋey yati ebajey waaf uceen, doo búrom di gooyenumi furimaf, moo kaane kúŋareriit waaf úyegetiil. 20Bare bálutab balomi di mofam matoopaam, boo eenomi kajamemi furimaf fati Atijamit, ban di kusofufo lit, ban di kuwolen wajakaaw di eroŋey yooliil búrom. Di bubilumi bubaj élut yanoosani yalagetumi ebabaj sílut sawuuje kabanan di uñen, bukan kúfeegiir di poop ceme.” 21Yensa naceeŋiimi, “Mante an panaŋar éwuŋenuma aban naŋar katekel áfimenuyo, mba nakaanuyo di fátaam fati bacaac? Letaganduyo di fúganduma room? 22Mati wanoosani wayofimi panurajeni téeŋey, ban wanoosani wáfimenimi pánwopuli di mawuŋam. 23Anoosani abajumi uwos újamuma, najam!” 24Naaniimi poop, “Jíkaanum wan jijammi. Káliikumaak kan jíliikumumi an, koo Atijamit pánaliikumumi muyuul ban Atijamit panabenenuul máamak wuuj wan jiliikumi. 25Mati ampi abajumi Atijamit panabenenool, bare ampi abajutumi hani jasiinkuney di wan aakumi, Atijamit pánabotuuwo di kañenool.” 26Yensa nammi poop, “Jáyiaj jati Atijamit kankaan nan awaña aleebumi eboña di kalaakak koola, 27ban námoorimoori fukaraay ban náyitoul nan bala’ab burabumi. Bare man eboñaay yoom di ecumbuley ban di ebaak, mo’omu kaaneookaan síwoonoor. 28Yentaamey fúkouyo ekammi eliilenemi mulukiinam. Di mútiyaaram kacumbak etojey épureuumi mbi kiti epooñen. 29Nampi mulukiinam maalumi ceb, awañaau naŋarumi éjituma man ajit, mati eyimey érindiiŋ.” 30Yensa naaniimi, “Waa panuliikooraami di jáyiaj jati Atijamit? Kúreg kei panusenaami mati jo? 31Joonojoono nan jikool jati jíbaaraj jimasitad jalukimi di kafatak koola. Joo jifaŋ man jitiitie bakoolab búrom di dúniyaay, 32nampi jibilumi jiliil jikaan jíbaar jafaŋe múbaar maamu. Ban di jileebumi waanaw woolijo, mansi basuwaab bulon dó, ban di búwuul dó mati bee ebaj bíinaat.” 33Yensa náriiŋenumi furimaf fati Atijamit bukanak, di eregiil ñátum di kúregak kajuupoe kaanoe nan uke, naregiimi bee nan kuŋoolenumi kúlaul. 34Asankenderut di bukoo báyiisenutiil waaf ñátum di kúreg, bare nampi oo di kuriibaool kulakomi sicebiil, nábatuliil wanoosani. 35Nan bala’ab bujinlenumi, Yensa nammi kuriibaool, “Jítipaal bee di kapan kaaku kati falaf.” 36Di kukatulomi jameeŋey bálamuk, kuriibaool man kújupomi nan Yensa aameenumi dóo di busaanaab. Di bajumi usaana uceen wansi kujawoor di oo síñakon. 37Bare fárus fáamak di lonkos yáamak di siyitoulomi di falaf, mansi enag busaanaab manteer súm bumaŋ eyoom. 38Yensa nalakomi kámoori di fúkund di fulamaf fati busaanaab. Kuriibaool di kúyiloomi man kommi, “Aliikitenaau, mante butumi bulee bo mati wulaal bukooke bee ecet?” 39Nan Yensa áyilomi, namakumi fárusaf ban nammi lonkosey di falaf, “Jiyin! Jiyin tem!” Fárusaf di fuyinumi, di bajumi tunoor sii. 40Yensa nammi kuriibaool, “Wau kaane man jíkoli? Kama kafiumak kooluul kookei?” 41Di wáaloiimi ban di kúkolimi máamak, di kuregoorumi, “Kama umu an aanoe buu, handeneen fárusaf di lonkosey di falaf di siyiiŋool?”

will be added

X\