MARUK 3

1Yensa nalaañumi anokenumi di fukobaf ban nátookudomi ániine an kañenool kucetumi. 2Di bajumi bukan kuceen di kulakomi káninguloor Yensa, manteer panasontenool di funakaf fati kálebienak, mambi kutaakenool. 3Yensa nammi ániinaau, “Bil, juum titoorey yati bukanak.” 4Ban najonleniimi ban naceeŋiimi, “Waa sílingaas soololaal sisene buruŋ man ukaanaal di funakaf fati kálebienak? Buruŋ bee ekaan waaf wajake mba wajakut, kapaken an mba kápakenaati an?” Bare di kulatumi kalaañenak. 5Yensa di yémool máamak nan ajikerumi álireniil, bare di yookenoomi máamak poop mati úyegetiil usasay. Nammi ániinaau, “Lanten kañeni.” Nalantenukomi war, di kukoyumi inki nan noo. 6Yaŋ too galab Kufarisaak di kúpurumi di fukobaf tikumaloorumi di kuriiba kuceen kati Herod, mampi kubujoomi eeno. 7Yensa di kuriibaool di kúpurumi kujaw bee di kafintak kati falaf, jameeŋ yati bukan di eriibooroomi. Bukoo kúpurumulomi di kapanak kati Galili di Yúdea, 8Yerusalem, Idumea, kátipaak kaaku kati falaf fati Yorudan, kapanak kaŋomenumi sísukas sati Turo di Sidon. Bukan kajuupoe ko’oku kajawulomi bee ejuk Yensa mati kujameenjam wan alakomi ekaaney. 9Yensa naregumi kuriibaool man kúŋarulool jisaana takum jameeŋey elitenool. 10Mati nasonteneensonten bukan kajuupoe, man bukaaku káju’utumi búrom di kulakoeenumi kafaroor bee egorool. 11Nanoosani kan úgunaw wookumi kujukumi Yensa, koo búromiil elo di bújonlenool man kucibulo, “Au eenomi Añiilau ati Atijamit.” 12Bare Yensa natonkiimi takum kureg hani an ákon ai eenomi oo. 13Yensa naremboorumi di fúlankiin ban náwonkul kuriibaak kan amaŋumi bee di oo, ñaa di kubilumi. 14Namukenutomi kooni uñeney di kugabaak kaate kalako di oo, ban naboñiimi man kúriiŋen furimaf fajakaaf, 15ban naseniimi fujuum man kucesoor úgun. 16Buke koo eenomi kúriiŋenaool uñeney di kugabaak kan amukenumi: Simon, an Yensa akammi karees kuceen Peter. 17Yankuba di atiool Yohan koo Jebede kuñoolool, Yensa nakaaniimi karees kuceen Silikandi, moo felumi kañuumulemi galab. 18Anduru, Filip, Batolome, Matiu, Tomas, Yankuba, añiilau ati Alif, Tade, Simon ati di Fujuumaf fati Kafaŋumi man kumaŋe moofiil. 19Ban Yúdas Isikariot ápurumi di Yensa fáculey akaan man kusofool. 20Yensa di kuriibaool di kulaañumi bóot. Jameeŋ yáamak inki di ebilumi ejojubo inki, manteer Yensa di kuriibaool kuŋoolenut kubaj hani buruŋ bati furi. 21Nan kukiloorool kujammomi, di kúpurulomi bee ébotulool bee síndeey, mati bukanak koone, “Nagonogono.” 22Bare kuliikitena bukaaku kati sílingaas kápurumulomi Yerusalem koone, “Belusebul yookool, arungaau ati úgun. Yoo esenool kánkumak kati kacesoor úgunaw.” 23Yensa náwonkuliimi man aregiimi kúreg, “Buu paŋŋoolen man Seetaanaay ekosoorooro? 24Kaanjaat jáyi janoosani bukan kulatoorumi, jáyiaj jikila leejiŋoolen jijuum lit. 25Moo kaanjaat eluup yanoosani bukan kulatoorumi, eluupey ekila leteŋoolen ejuum lit. 26Kaanjaat Seetaanaay katiikenooro ban di pajulooro, jáyiaj jooliyo leejiŋoolen jijuum lit, bare panjiban. 27An letaŋoolen anoken eluupey yati an afaŋool kánkum afumuyo man ákuut wanoosani woola, leejaat natataat asofool akok. Moo malegen panaŋoolen ákuut di eluupey yoola. 28“Ínje eem di ereguul malegenam, ampi akammi majakut di wanoosani wan asankenumi ñíi, panabonketi. 29Bare ampi asankenumi ñíi mati Búyegetab Bátienaab, letabonketi jáng, bare oo nalolo mati majakut mákon mati bándoorey. 30Mati koo kooneenumi, “Bágun bookool.” 31Yensa iñaayool di kutiool di kúriiŋumi, di kujummi téeŋey man kuboñumi man kúwonkulool. 32Di bajumi jameeŋ yati bukan di elakomi eŋomen Yensa, di yoonoomi, “Iñaayi di kuti’i bukooku bo téeŋey, koone kumammaŋ ejuki.” 33Yensa nalaañenumi, “Ai eenomi iñaayom? Bukei eenomi kutiom?” 34Najikerumi áliren bukanak kálakodomi aban nammi, “Jijiker! Buke eenomi iñaayom di kutiom! 35Ampi akammi wan Atijamit amaŋumi oo atiom, áliinom, di poop iñaayom.”

will be added

X\