MARUK 2

1Kunak kupinaay fácul nan Yensa abookomi bee Kapaanaum, di kujammomi mati Yensa oomu dó síndo’ool. 2Bukan kajuupoe di kujojumi tákon di kalimbisak dán ammi di kumeeŋenukomi tep manteer kúreaati, mati bukanak kumemmeeŋ bee mo di téeŋey yati fúlamutaf. Nalakomi káriiŋeniilak furimaf fajakaaf. 3Di bajumi kúniine kubakiir katebulomi ániine abakoe di silaak. 4Mati jameeŋey yati bukanak, manoosani, kuŋoolenutumi kúriiŋetumool alof bati Yensa. Di kúlumi kasondak fatiyenaay yati dán ammi. Nan kukammi mo’omu, di kúyuunuloomi di silaakas san afintomi. 5Nan Yensa ajukumi kafiumak kati kúniinaak katebulomi, nammi ániinaau abakoaau, “Añoolom, majakuti mubonketibonket.” 6Bare di bajumi kuliikitena bukaaku kati sílingaas kalakoeene to di kuceeŋooro di úyegetiil man kommi, 7“Tíj! Kama wau kaane ániinaau o’omu nasankenumiñaa mo’omu? Moo ñíiñii! Ai aŋoolene abonket majakutam mati anau leejaat Atijamit cebool?” 8Yensa namanjumi wan kulakomi kawoonoorak, ñaa naceeŋiimi, “Wau kaane di jiwoonoor mo’omu? 9Wei ufaŋe man uhiilie man ireg ániinaau abakoaau majakutool mubonketibonket mba man iregool ayito, aŋar silaakool man ajaw? 10Pániyiisuul mambi jimanj mati Añiilau ati anau nababaj kánkum di dúniyaay man abonket majakutam mati bukanak.” Yensa nammi ániinaau abakoaau, 11“Ínje eeni, yito, teb silaaki man ujaw bóot!” 12Nayitomi ajuum sem, naŋar silaakool ban nápurumi bee bóot fáculiil búrom. Kamaatumi búromiil di wáaloiimi, ñaa di kusalumi Atijamit mati mákalaam moola, di aaney, “Húm! Jaat nujujuk waaf wafaŋe kúko’oli!” 13Yensa nalaañumi inki bee di kafintak kati falaf fati Galili. Jameeŋ yati bukan di ejojubomi di oo, ñaa nalakomi kaliikiteniilak. 14Nan oo arulenumi ejaay, natookumi alagaau Lewi añiilau ati Alif man alakoe di furokool. Yensa naanoomi, “Riibenom.” Lewi nayitomi ariiboomi. 15Nan Yensa di kuriibaool kulakomi furiaf síndeey yati Lewi. Di kamaatubomi kulaga basaaf kajuupoe di kasofutimi di waaf. Bukan kajuupoe kuceen poop di kunaamoorutomi. 16Bare nan kuliikitena bukaaku kati sílingaas kammi di fujuumaf fati Kufarisaak kujukumi mati Yensa nalakolako furiaf di kasofutimi di waaf di kulaga basaaf, di kuceeŋumi kuriibaool, “Wau kaane naam di furi dákon di kulaga basaaf di kasofutimi di waaf?”?” 17Nan Yensa ajammomi, naaniimi, “Bukan kájumi kuceeŋut asontena, bare káju’utumi ceb. Ínje ijawulout bee ewonk kajoonaak bare kasofutimi di waaf man kútiiwoor kukat bálamuk majakutam.” 18Kuriibaak kati Yaaya di kati Kufarisaak di kulakomi ekaaney balatab. Funak fákon bukan kuceen di kubilumi bee di Yensa di kuceeŋoomi, “Wau kaane kuriibaak kati Yaaya di kati Kufarisaak di kukammi balatab, bare kooli koo kúkaaneriitubo?” 19Yensa nalaañenumi, “Mante ati fuyabaf kupaalool pankuŋoolen kukaan balatab nan ati fuyabaf oo too di bukoo? Nan ati fuyabaf ammi di bukoo, moo leeŋoolen kaan. 20Bare kunakak pánkuriiŋ, nampi ati fuyabaf aŋarimi di bukoo, ñaa pankukaan balatab kunak kukila. 21An átuutuleriit jipeket di kaloa kunkul man acik alook kéele. Akammojaat, jipeketaj panjitutuulo di kéelaak ban kajisak pankufaŋ man kúkalaae. 22An áwuleneriit wayiney yunkul di ubaŋ wafanlene. Akammojaat, wayiney pánepambenuwo, ulee di wayiney, ulee di ubaŋaw. Bare wayiney yunkul eete éwuleni di ubaŋ wunkul.” 23Di funakaf fati kálebienak Yensa di kuriibaool balakoe ewuujey di ulaakaw wati mulukiinam. Nan kulakomi ejaay buruŋiil kuriibaool, di kutaatumi ewuutumo. 24Bare Kufarisaak di kuceeŋoomi, “Jiker, wau kaane man koom di ekaaney wan sílingaas sífirenumi di funakaf fati kálebienak?” 25Yensa naaniimi, “Mante jitamburerut jiliiken wan áyiau Dauda akaaneenumi, nan akila amaŋeenumi wan aate furi? Oo di kuriiboorool man kucaarete, 26man anokenumi di éguutey yati Atijamit man ayabulomi kúmbuurak káñiiaak kanenimi bújonlenab bati Atijamit. Mo’omu mubajomi nan Abiasar alakomi ásimenaau áamakau ati Atijamit. Sílingaas soololaal sífirenfiren man an ariko leejaat kúsimenaak kati Atijamit cebiil, bare Dauda nariri aban nasen kuriibaool poop.” 27Yensa poop naaniimi, “Funakaf fati kálebienak fujuumenijuumen mati anau, bare kaanut anau ajuumenumi mati funakaf fati kálebienak. 28Moo Añiilau ati anau eenomi arungaau ati hani mukaanaam mati funakaf fati kálebienak.”

will be added

X\