MARUK 16

1Furabooraf di káliimaraay, nan funakaf fati kálebienak fubanumi, Mariyaama ati Magadalen, Mariyaama Yankuba iñaayool di Salome di kujawumi kunoomulo muraafa mati mumelam maputemi súum mambi kujaw kunaanen biiŋab bati Yensa. 2Di funakaf futooŋandaf fati funoomaf bújomaraay pím, nan bala’ab butebulomi buban di kujawumi bee di fuyaakaf. 3Man koonoorumi, “Ai panabakenolaal fukoobaaf fan kulookumi fúnoonumaf fati fuyaakaf?” 4Bare nan kúriiŋulobomi, di kujukumi mati fukoobaaf, foo fúkalaakalaa, fubakeneenibaken bee di kapan kaaku. 5Koo di kanokenak di fuyaakaf ceb, di kútookudomi ápura ániine alakoe di kapanak kúridak man akaanoe wañ wátiene púl, di wáaloiimi. 6Bare ániinaau naaniimi, “Takum wáalouul. Muyuul joom di eñesey Yensa ati Nasaret, an kufaaŋeneenumi di ébaarey yati búpinab. Oo alee déere! Atijamit náyitenulooyiten di kacetumi! Jijikeruma dán biiŋab boola bufokimi. 7Bare ñaa jijaw tijireg Peter di kuriibaool karinomi mati Yensa panalouul fácul bee Galili. Boo pantijitookool, nan man aregeenuumi eeno bala’a acetumi!” 8Kuseekak kuteyulomi di fuyaakaf, bawonloe manteer ninsi kuleleben máamak. Bukoo kuŋoolenut kusanken di an, mati kúkolikoli máamak. 9Di funakaf futooŋandaf fati funoomaf di bújomaraay pím Yensa nan áyitoulomi di kacetumi, natooŋumi árajul Mariyaama ati Magadalen, di oo Yensa acesooreenumi úgun wooni futok di ugaba. 10Nápurulomi bee eregey kariibooreenumi di oo, di kulokumi manteer kulikij. 11Bare nan kujammi mati oomu bo man aroŋe mati oo najukeenoojuk, kúyinenut mo. 12Di múlamukaam, Yensa narajulomi funoon fuceen di kuriibaool kugaba, nan kulakomi ejaay bee sísukas sati fatiyaay. 13Nan kulaañumi tikuregumi kuriibaool karinomi, bare kúyinenutiil. 14Di múlamukaam, nalaañumi árajul kúriiŋenaak uñeney di ákonau, koo di kúkoiil nan kulakomi furiaf tákon. Namandooriimi mati káyinenaataak kooliil di esayey yati úyegetiil bee káyinen wan kajukeenoomi nan ayitouloeenumi di kacetumi. 15Naaniimi, “Jijaw dúniyaay búrom jíriiŋen furimaf fajakaaf bee di bukanak búrom. 16Anoosani áyinenumi furimaf fajakaaf ban di jítiigulenool Atijamit panapakenool. Bare anoosani alatumi man áyinen furimaf fajakaaf, Atijamit letapakenool. 17Káyinenumi ínje pánkuyiis kúmanjum uke: pankucesoor úgun di kareesak kati Yensa, ban pankusanken di usanken wunkul. 18Hani pankusof siyela, di kuraan busiken manoosani, waaf letubajiil. Pankuremben uñeniil di káju’utumi, pankukoy.” 19Nan Akiiyaau Yensa asankenumi mo’omu di kuriibaool aban, nájeetumimi bee di bukinab bajakaab tialako báridab bati Atijamit. 20Kuriibaool di kujawumi banoosani kúriiŋen furimaf fajakaaf, Akiiyaau narambeniimi noonoono mati káriiŋenak kooliil kukankaan malegen, kápurumul di wajamurerutimi wan kukaanemi. Amen.

will be added

X\