MARUK 15

1Fati kajom bújomaraay pím, kúsimenaak kunifaanak kati Atijamit, Kúyahuud kunifaan kuceen, kuliikitenaak kati sílingaas di kugamenaak kati fugamenaf fáamakaf búrom, di kujojumi man kumaloor man kootumi ejaw di mukaanaam umu eeno. Di kukokenumi Yensa, ban di kuruuoomi kusen di kañenak kati Pilat. 2Pilat naceeŋumi Yensa, “Mante au eenomi áyiau ati Kúyahuudak?” Yensa nalaañenoomi, “Au urege mo.” 3Noo kúsimenaak kunifaanak kati Atijamit kutaakenoomi di mukaanaay majuupoe. 4Pilat nalaañumi aceeŋool, “Mante ubajut wan oote kalaañen? Jiker kataakenak kajuupoaak kan kurembenimi.” 5Bare Yensa aregut hani furim, ñaa Pilat di múwaalo’oomi. 6Káaning kanoosani kati Ewuujey yati Njalayiri kúriiŋumi, anifaanau Ároomanau nakatenekaten an ákon di dán bukanak kukuleimi an jameeŋey emaŋumi. 7No’onu dán bukanak kukuleimi, babaj ániine an koonemi Baraba. Oo di kúlaputa kuceen kusofisof mati kukaaneenumi jabuj bukan kuceen di káguuloorak. 8Nan jameeŋey ejawulomi ejojumi déeri Pilat nan man epiimi di elawoomi. 9Nalaañeniimi, “Mante jimammaŋ man íkatenuluul Áyiau ati Kúyahuudak?” 10Pilat namammanj mati kúsimenaak kunifaanak kati Atijamit kusofeensof Yensa tikuseneenool mati kaleetooriil. 11Bare kúsimenaak kunifaanak kati Atijamit kommi di káliŋen jameeŋey man elaw Pilat man akaten Baraba bare lee Yensa. 12Pilat nalaañumi asankeniil man aaniimi, “Kama waa jimaŋumi man ikaan di ániinaau an joonemi Áyiau ati Kúyahuudak?” 13Di kucibulomi inki, “Faaŋenool!” 14Bare Pilat naceeŋiimi, “Wau? Kama búlaput bei nakaane?” Bare di kufaŋumi man kucibuloe, “Faaŋenool!” 15Pilat, namaŋumi ekaan jameeŋey éyilo, nákatenuliimi Baraba. Nakatumi furim man kutiikaak kupooyaak kuŋar Yensa kutek máamak aban naseniil man kufaaŋenool di ébaarey yati búpinab. 16Kupooyaak kuceenak di kújeetumoomi dóo di bati anifaanau Ároomanau (tan koonemi puretori). Ban kuwonkumi kupaaliil kutiika karinomi búrom. 17Di kukaano’oomi kaloa káamak kakaayene éyem nan kati áyi, ban di kunapumi úlind kaan nan bompoŋ bati áyi man kuloopenumi di fúkaaf foola. 18Di kutaatumi esaafooley di kálebienalenoor man koone “Atijamit akati di karulen ebaj fuyiif fabaake! Áyiau ati Kúyahuudak!” 19Di kutekoomi di fúkaaf foola ñátum egoley, kulacenool, di kúkuntaajenool di kakaanalenoor nan kúlebienoolebien. 20Nan kúnarulumi kuban, di kúbulul kaloaak káamakak kakaayene éyem di kulaañ kukaano’oomi kaloaool. Di kújeetumoomi téeŋ kafaaŋenoolak di ébaarey yati búpinab. 21Boo di buruŋab nan kulakomi kájeetumoolak, di kúkamboorumi di Simon ati Kurene, ampaau ati Alesandar di Ruf man ápurumulomi di karambaak. Kutiikaak kupooyaak di kusofoomi ban di kumingenoomi man kúrookenool ébaarey yati búpinab yan Yensa árookeenumi. 22Di kújeetumulomi Yensa bee tan koonemi Golugota, (yan eenomi ‘Tanat tati Kakonkaam’). 23Di kugaasoorumi wayin di bubeeben bati sumurun man kusenool araan, bare nalatumi eraanuyo. 24Di kufaaŋenoomi di ébaarey yati búpinab, ban di kucaaboorumi wañool ñátum di baluk anoosani namanj kapan kei panabaj. 25Nan kufaaŋenumi Yensa kankaan sirig futok di sibakiir di bújomaraay. 26Kuciciik to mo’ome waa kammi man kubujool, “Áyiau ati Kúyahuudak.” 27Di kufaaŋenumi kúlaputa kugaba di oo tákon, ákon báridool aamu bamayool. 28Furimaf fati Atijamit fúlirooliroor fammi, “Kupinoopin di kúlaputaak.” 29Kuwuuja bukaaku insi kúŋuk, mansi kúnarulool man kommi, “Ahaa! Au ooneenumi bee efum fukobaf fáñiiaaf fati Akiiyaau wúp, ban nuteepulankenufo di kunak kúfeegiir! 30Pakenooro, ban núwaloul di ébaarey yati búpinab!” 31Moo mákonam kúsimenaak kunifaanak kati Atijamit di kuliikitenaak kati sílingaas di kulako kánarulool man koonoorumi, “Napakempaken bukaaku, bare aŋoolenut apakenooro! 32Lee oo Apakenaau Áamakau, Áyiau ati Isirael! Áwaloul iñeme di ébaarey yati búpinab mambi ujuk man úyinen di oo.” No’onu kafaaŋenoorimi tín tákon di oo koo poop insi kujelool. 33No’onu kankaan kajuum balaraay, ñaa di rímmi túk fímenumi mof mukila búrom manteer bee mo sirig sooni sífeegiir. 34Nan ríiŋumi sirig sífeegiir tutularaay Yensa nacibulomi, “Élo-i, Élo-i, Lema Sabak-taani?” yoo eenomi, “Atijamit úmboom, Atijamit úmboom, Atijamit úmboom, wau kaane nubetenom?” 35Bukaaku kammi bajuumer to di kujammomi man kommi, “Jíyenten, oo oomu bo nawonke Eliya.” 36Ákon di bukoo nateyulomi aŋar jibur aboojenumi di binegar aban, nakaanujomi di funuk, ban nasenumi Yensa man acuut aban di aaney, “Jikob, man ujukaal manteer aboñaau Eliya panabil áwalenulool di ébaarey yati búpinab.” 37Yensa nacibulomi inki aban, nañak lár. 38No’onu, kafulak káamakak káyinimi fatiyaay di síndeneey yati fukobaf fáñiiaaf di kujisomi fac titoorey, kápurum fatiya bee tentaam. 39Arungaau ati kutiikaak Kúroomanak nan ajonkoorumi najukumi mati nañañak lár, nammi, “Malegenam, ániinaau ume nakankaan Añiilau ati Atijamit!” 40Kuseek kuceen kajuumulo lói, man koom di kajikerool, di buku Mariyaama ati Magadalen, Mariyaama Yankuba ayiinkunau di Yose iñaayiil di poop Salome. 41Buku kuriibenooriiben nan alakoeenumi di kapanak kati Galili, ban kurambenooramben wan amaŋumi. Kuseek bukaaku kajuupoe poop kariiboorulomi di oo bee mo Yerusalem. 42Funak fo’ofu fati kajonjoorak, foo eenomi bala’a funakaf fati kálebienak futooŋumi. Nan ríiŋumi káliim, 43ániine ati Arimate, an koonemi Esufa an kúlebienool oo ákon di fugamenaf fáamakaf. Nalakoeenlako poop ekob mambi ajuk nei jáyiaj jati Atijamit joote ériiŋul. Nabajumi búyeget babebe man ajawumi bati Pilat man alawoomi mambi asenool biiŋab bati Yensa. 44Pilat aŋoolenut áyinen mati Yensa nalelet, ñaa nawonkulomi arungaau ati kutiikaak Kúroomanak ban naceeŋoomi manteer Yensa nalelet aban. 45Arungaau ati kutiikaak Kúroomanak naregoomi tíen mati Yensa nalelet aban, Pilat nasenumi Esufa buruŋ man ajaw aŋarubo. 46Esufa nanommi jíboocin, ban nakammi man kuwalenumi biiŋab bati Yensa man aguububomi di jíboociney, ban nájeetumubomi áfintendomi di fuyaak facemeenimi di fúlankiinaf. Ban ñaa nabakenumi fukooba fáamak alook di fúnokenumaaf fati fuyaakaf ban najawumi bóot. 47Mariyaama ati Magadalen di Mariyaama Yose iñaayool kujujuk ban Yensa afokimi.

will be added

X\