MARUK 14

1No’onu kunak kugaba bala’a kutooŋ karuukenak kati káaningak kati Mbúur Yabajutumi Múliitenuma, kan koonemi poop káaningak kati Ewuujey yati Njalayiri. Kúsimenaak kunifaanak kati Atijamit di kuliikitenaak kati sílingaas kulakoeenlako eñes buruŋ mampi kubuutoor man kusof Yensa man kubujool. 2Man kommi, “Takum ukaanaal mo di nanan nati káaningak uke, kaanutumojaat pankuyiten káguuloor.” 3No’ona Yensa di ésukey yati Betani man alakoe di síndeey yati Simon an kafaañak kusofeenumi. Nan alakomi furiaf dó, aseek najawulomi di jiraafa jati naad jabajumi mumelam maputemi súum máamak, jan jajoonenimi ñátum di bakooba, butumab boolijo buriri máamak. Aseekau nafatujomi ákambul ban náyuenumomi di fúkaaf fati Yensa. 4Bare di bajumi kuceen karegoorumi yém man kommi, “Wau kaane naam di kakajen mumelam maputemi súum mo’omu? 5Mati mumelam ume maputemi súum pammuŋooleneen munoomeneeni wawuuje sidenaari sooni siceme sífeegiir, ban siseneeni kabajutumi.” Ban di kupuñenoomi. 6Bare Yensa nalaañeniimi, “Jikatool bo. Wau kaane di joom di kagaalenool? Nakaanankaan waaf wajake. 7Mati panjibaj kabajutumi nanoosani, ban jimaŋujaat panjiŋoolen jirambeniil nanoosani. Bare leejibajom baabe nanoosani. 8Nakankaan wan aŋoolenumi búrom ban nanaanennaanen eniilom ñátum di mo bee kajonjoor bala’a efokomey ériiŋ. 9Ínje eem di ereguul malegenam, banoosani bampi furimaf fajakaaf fúriiŋenimi di dúniyaay búrom, mukaanaam mati aseekau umu pammuregeni bukanak di kawoolen moola.” 10Yúdas Isikariot, ákon di kúriiŋenaak uñeney di kugabaak kati Yensa, najawumi bee di kúsimenaak kunifaanak kati Atijamit man ápurumi akaan man kusof Yensa. 11Nan kujammomi di súumiimi máamak, di kúligoomi mati ecaamool sígodi. Yúdas nataatumi eñes buruŋ bee épur di oo akaan man kusofool. 12Di funakaf fútiyaaraf fati karuukenak kati káaningak kati Mbúur Yabajutumi Múliitenuma, ban kúraamulumi jisahaaj jati búsimenab bati Ewuujey yati Njalayiri, noo kuriibaak kati Yensa man koonoomi, “Boobei numaŋumi man ujaw ucookoori furiaf fati káaningak kati Ewuujey yati Njalayiri?” 13Yensa aboñumi kugaba di kuriibaool man aaniimi, “Jinoken di ésukey yáamakey, pánjikamboor di ániine arookoe kárumba kati mumel. Jiriibenool 14bee di eluupey yampi anokenumi, man joon ati eluupey, ‘Aliikitenaau naceeŋumi, kalimbisak kan oo di kuriibaool kootumi furiaf fati karuukenak kati káaningak kati Ewuujey yati Njalayiri kookei?’ 15Pánayiisuul fatiyena kalimbis kawuŋe kacookoori kuban wan umaŋaami bee ekaaney búrom, dóo panjicookoorumi furiaf bee mati wulaal.” 16Di kujawumi bee ésukey yáamakey yati Yerusalem, di kutookumi waafaw búrom nan man Yensa aregiimi eeno. Di kucookoorubomi káaningak. 17Nan bala’ab bujinlenumi Yensa náriiŋulomi di kúriiŋenaool uñeney di kugabaak. 18Nan kulakomi furiaf, Yensa naaniimi, “Ínje eem di ereguul malegenam, ákon di muyuul pánapur di ínje, oo oome nuriaale tákon di fulakaaf ufe.” 19Bukoo di súumaati’iimi, ñaa di kutaatumi eceeŋooley ákon-akon man kuceeŋoomi, “Mante ínje room?” 20Naaniimi, “Ákon di muyuul uñeney di kugabaak kammiñaa, an ommi di érud mbúur síñakon di ebooley. 21Mati Añiilau ati anau aate ecet nan man ciikimi mati oo no’ona. Bare búyiikab bulako di an akila aatumi épurey di Añiilau ati anau. Pánkoyumeen an akila awoleenutijaat.” 22Nan kulakomi furiaf, Yensa naŋarumi fúmbuur, nasalumi aban namiinufomi ban naseniimi nammi, “Jiyab jiri, ure eniilom.” 23Naŋarumi éraanuma, ban nasalumi aban naseniimi kuraanuyo. 24Ban naaniimi, “Ure fúsimom, fáyuimi bee mati bukan kajuupoe, ban ñátum di fo Atijamit akammi kasofoorak. 25Ínje eem di ereguul malegenam, letilaañ iraander wayin bee nampi iraan wayiney yunkuley inki di jáyiaj jati Atijamit.” 26Di kúcimmi kácim kati esaley yati Atijamit ban di kúpurulomi kujaw bee di Furembooraf fati Uwoliiw. 27Yensa naaniimi, “Muyuul búrom panjilaañ bálamuk. Mati ciikiciik, ‘Panibuj amataau, ban kayooŋak kati sisahaas pankuyiisoori nañ.’ 28Bare nampi Atijamit áyitenulammi bee di eroŋey, panirunguul fácul bee Galili.” 29Peter naanoomi, “Handeneen bukoo búrom pankulaañ bálamuk, ínje let.” 30Yensa nalaañenoomi, “Ínje eem di eregi malegenam ume, fukaf fo’ofe fati jaat, bala’a kéenak kulit ñagaba, panuñoosom ñáfeegiir man oon umanjutom.” 31Bare Peter nalatumi yém, man aanoomi, “Handeneen au di ínje kacetoor, letiñoosi!” Kúriiŋenaool karinomi oo mákonam kuregoomi eeno. 32Yensa di kuriibaool di kujawoorumi bee tanat tati Gesemani. Yensa nammi kuriibaool, “Jilako taate bee nampi ibanumi kúlawak.” 33Yensa naŋarumi Peter, Yankuba di Yohan man kujawumi. Tootooto di kaanoomi yiriyir ban di gaalenool búyeget máamak. 34Naaniimi, “Yuutom egagaal máamak, jaheemeen panicet. Jilako taate, man jíkaanum.” 35Nan abajumi apum lói jayiinkun nalomi kúfima man alawumi mo’ome, kaanjaat paŋŋoolen, nanan nikila takum kaan di oo. 36Ban nammi, “Ampaom, Ampaom! Au uŋoolene ukaan wanoosani, ure’eten éraanumaay uye yati búyiikab di ínje. Bare takum wan imaŋumi mbi ukaan, bare wan umaŋumi mbi ukaan.” 37Nalaañulomi natookumi kuriibaool di kámooraak túc, nammi Peter, “Simon, mante au númoorimoori? Mante uŋoolenut úkaanum wáriiŋe hani erig yákon? 38Jíkaanum man jilaw Atijamit, takum Seetaanaay eŋoolen eyinkuul. Malegen búyegetab bubebeb, bare eniiley élaamolaamo.” 39Yensa nalaañumi ápur ban najaw kúlawak, nan kati di mútiyaaram. 40Nalaañulomi inki tiatookiimi di kámooraak, mati kámooraak kúlaameniilaamen máamak. Kumanjut wan koote kalaañenool. 41Nan abookoulomi káfeegintenak, naaniimi, “Mante muyuul bee jaat kámooraak di káyokulak joom di ko? Jiyitoñaa reooreoor! Nanan nírindiiŋ mati Añiilau ati anau koote épur di oo man kusof kusenool bee di kañenak kati kukaana majakut. 42Jiyito, man uja’aal. Jijikeruma, ániinaau aatumi bee épurey di ínje akaan man kusofom oome taate di wulaal, kúriiŋuloriiŋ.” 43No’onu nan Yensa alakomi kasankenak, Yúdas, an umanje ákon di kúriiŋenaool, náriiŋulomi bee to di jameeŋ yaakenulo muliba mabaake di simooŋ. Bukoo kúsimenaak kunifaanak, kuliikitenaak kati sílingaas, di Kúyahuudak kunifaanak kuceen kuboñumi man kusof Yensa. 44Iñeme Yúdas naregeeniireg mati fúmanjum, di aaney, “Ampi icuufoomi di jimanj oo. Jisofool jisen kupooya man kújeetumool.” 45Nan kúriiŋulomi, Yúdas najoonumi taac bee di Yensa nammi, “Aliikitenaau!” Ban Yúdas nacuufoomi. 46Kúniinaak bukaaku di kúbiipoorumi kusof Yensa. 47Bare ákon di kajuumutomi lof, náfoonulumi jilibaaj jabaakaaj joola aban nacanumi kawosak kati amiiceelau ati ásimenaau áamakau ati Atijamit. 48Yensa naceeŋiimi, “Mante ínje álaputa di muyuul, an jibile di muliba mabaake di simooŋ bee esofomey? 49Balayoobalay ínje nilakoelako kaliikitenak muyuul dóo di fukobaf fáamakaf, ban jisofutom. Bare jikat man wan furimaf fati Atijamit furegumi úliroor.” 50Kuriibaak kati Yensa búrom kukatoomi bálamuk di kuteyumi kúpur man kupak. 51Di bajumi ápura ániine aceen ariibene Yensa bálamukool, nagaayoorumi kaful ceb. Bukanak di kusofoomi, 52bare nápurumi atey tíikaarool, nakatubomi kafulak koola bálamuk. 53Di kújeetumi Yensa bee di eluupey yati ásimenaau áamakau ati Atijamit, dán kúsimenaak kunifaanak kati Atijamit, Kúyahuudak kunifaanak kuceen di kuliikitenaak kati sílingaas kujojumi. 54Peter nalakomi ébuuyul nariib bálamuk lói bo, tiajawumi anokenumi bee mo titoorey yati fankaf fati síndeey yati ásimenaau áamakau ati Atijamit. Dóo nalakomi di kupooyaak man koom di fánumaf kálumbaak. 55Kúsimenaak kunifaanak kati Atijamit di kati fugamenaf fáamakaf búrom kulakolako karaagal eñes kalepoor di oo man kubaj buruŋ mampi kubujumi Yensa, bare kubajutuko. 56Mati bukan kajuupoe kulepoolepoor mati Yensa, bare kurimiil kujawut dákon. 57Di múlamukaam, bukaaku kayitoe kujuum man kureg kalepoor bee mati Yensa, koo di aaney, 58“Wúli nujanjam naane, ‘Panikajen fukobaf fáñiiaaf ufe fati Akiiyaau fan uñenaw wati bukanak uteepumi, ban di kunak kúfeegiir, paniteepulanken fuceen fan bukan kuteeput.’” 59Bare handeneen mo, kurimiil kujawut dákon. 60Ásimenaau áamakau ati Atijamit nayitomi ajuum look titoorey yati koo búrom, man aceeŋumi Yensa, “Mante ubajut kalaañen room? Wo’owu woo kúniinaak buku kommi di kataakeni?” 61Yensa natuntenumi sii aregut hani furim. Ásimenaau áamakau ati Atijamit nalaañ aceeŋool, “Mante au eenomi Apakenaau Áamakau, Añiilau ati Atijamit ati Kásuumaayak?” 62Yensa nammi, “Ínje oo, ban panjijuk Añiilau ati anau balakoe di báridab bati Atijamit ati Kánkum, ammi di káwaloul di kurolaak kati di fatiya.” 63Ásimenaau áamakau ati Atijamit nacacumi uloaool wáamakaw man ammi, “Wau kaane man uñesaal kúyiisena kuceen? 64Muyuul búrom jijanjam mati man asankenumi ñíi. Waa jiwoonoorumiñaa kama?” Koo búrom di kommi oo aate ebuji. 65Bukaaku di kutooŋumi kalacenool, ban kúmiipoomi di kútuk man kutek, di koonoomi, “Au aboñaau! Régoli ai ateki?” Kupooyaak di kujontenoomi. 66Nan Peter ammi titoorey yati fankaf, noo bajumi amiiceel ajaŋa ati ásimenaau áamakau ati Atijamit ánokenuloromi. 67Oo najukumi Peter di fúko’ool kálumbaak, najikeroomi caw aban nammi, “Au poop oomueen di Yensa ati Nasaret.” 68Bare Peter nañoosumi yém, di aaney, “Ínje imanjut wan usankeneñaa di wo.” Nápurulomi fut bee di fúlamutaf fúnokenumaaf. 69Amiiceelau ajaŋaau naŋandenumi Peter nammi kammi bajuumer to, “Ániinaau ume an ákon di bukoo.” 70Bare nañoosoorumi inki. Nan bajumi piyo jayiinkun, kájuumum to kuceen di kommi inki Peter, “Tíentien lec au an ákon di bukoo, mati au ati Galili.” 71Peter di fúko’ool nabaatumi ñíi nammi, “Ínje imanjut ániinaau umu an jisankenemi moola.” 72Yaŋ too galab kéenak di kugabuntenumi kulit. No’onu Peter nawoolomi wan Yensa aaneenoomi, “Bala’a kéenak kulit ñagaba panuñoosom ñáfeegiir man oon umanjutom.” Naweelomi búruudenab.

will be added

X\