1 Nan Yensa alakomi épurey di fukobaf fáamakaf, ákon di kuriibaool naanoomi, “Aliikitenaau jiker, kukoobaak uke kujooŋoojooŋoor di ulimbis poop moo!” 2 Yensa nalaañenoomi, “Nujujuk ulimbisaw uwu wáamakaw búrom? Uru ran jijukeñaa, kunak pánkuriiŋ nan rootut karino to manteer hani ekooba leterembeni di epaaluyo.” 3 Di múlamukaam, Yensa alakomi di Furembooraf fati Uwoliiw fajonkoorumi fukobaf fáamakaf. Noo Peter, Yankuba, Yohan di Anduru di kutookoomi man kuceeŋoomi sicebiil, 4 “Régoli, kama ñaa nei uru búrom eete kabajo? Fúmanjumaf fei noote ejuk nampi funakaf fan uru dootumi kabajoak fúriiŋumi?” 5 Yensa natooŋumi kasankenumi man aaniimi, “Jíkaanum, takum jimaŋ man an abuntuul. 6 Mati kajuupoe pánkujawumul di kareesom di aaney, bukoo eenomi Apakenaau Áamakau, ban pankubunt kajuupoe. 7 Nampi jijammi mati kutiik di mati kákuumoorak kati kutiik, takum jíkoli. Mati waafaw uwe búrom woote emond ubajo, bare ebaney yati dúniyaay ériiŋoorut. 8 Mof pammutiiken mupaalumo mof, jáyi panjitiiken jipaalujo jáyi. Pambaj káliliŋenoor kati yentaam káamak banoosani, di poop pambaj bacaar báamak. Bare mukaanaam umu búrom mukankaan nan jariey yatooŋemi bala’a aseek aroŋ añiil. 9 “Jíkaanum! Bukan bukaaku pankusofuul kusen bee di kugamenaak kati fugamenaf fáamakaf, ban poop pankutekuul di kukobak. Pankuruu’uul fácul kunifaan di kúyi kati mofam mati muyuul kuriibaom, mambi jiregiil malegenam mati ínje. 10 Bare bala’a fúbanumaf fati dúniyaay, furimaf fajakaaf foote káriiŋeni di bukanak kati dúniyaay búrom. 11 Bare nampi kúsofuumi man kújeetumuul bee kagamenuul di kukobak, takum jikaanooro síwoonooruul mampi jootumi kalaañen eeno. Jireg wan Atijamit asankenumi di úyegetuul nanan nikila, mati lee muyuul jisankene bare Búyegetab Bátienaab. 12 Atia panasof atia aceen man asen kubujool, ban ampa panasof añoolool aceen man asen kubujool, ban kuñiil kuceen pankuñoos kuwolaiil man kusen kubujiil. 13 Bukanak búrom pankulatuul mati muyuul kuriibaom. Bare ampi amuutenumi manteer bee ebaney yati eroŋey yoola Atijamit panapakenool. 14 “Bare nampi jijukumi waafaw wájiteniaaw man ujuumeni tanat tan wootutumi ejuum (jikat man kuliina mbi kúlaul), kammi di kapanak kati Yúdea koote etey bee di kúlankiinak. 15 Ban anoosani ammi téeŋey yati kalimbisak, aatut kanoken bee di kalimbisool man ajojenoor wambaraw woola. 16 Moo mákonam, anoosani ammi di kalaakool, aatut élaañul man aŋar kaloaool káamakak. 17 Di kunak kukila, búyiikab bulako di kuseek kaakumi úrookaaw di kuseek kammi di karaafenak! 18 Jilaw man mátaañiaam umu takum mubajo nanan nan ñonkañ ñíkalaaemi. 19 Mati kunak kukila búyiik báamak baatumi kabajoak butamburerut bubajo baanomi nan mo’omu kabiñoo no’ona di fúcitumaf fati dúniyaay bee mo iñeme, ban bootut kabajorer jáng. 20 Leejaat Akiiyaau átemien kunakak kati búyiikab, hani an letaŋoolen aroŋ. Bare mati bukanak kamukenimi koola nátemientemien kunak kukila. 21 An areguujaat, ‘Jijikeruma! Apakenaau Áamakau oome!’ mba ‘Jijikeruma ooma!’ takum jíyinenool. 22 Kupakena Káamak kubunta di kuboña kubunta, pankubil man kúyiisuul kúmanjum di wajamurerutimi man kubuntuul. Kuŋoolenjaat pankubunt hani kan Atijamit amukenumi aban. 23 Bare jíkaanum! Ínje nireguureg mo’omu búrom bala’a mukaanaam ume mubajo. 24 “Bare di kunak kukila, nampi búyiik bukila báamak buwuujumi, bala’ab pámburimen túk, jileeŋaj leejiwuŋen, 25 di poop bootab pánsibuloul di kátula, ban wánkumaw wammi di fatiya pánuliliŋeni. 26 Bukanak pankujuk Añiilau ati anau náwaloul di kurola di kánkum káamak di mawuŋ máamak mati Atijamit di móro. 27 Ban pánaboñul simaleekaool bee di ufeefaw ubakiiraw wati dúniyaay man sijojen bukanak kan Atijamit amukenumi kápurumul fúcitumaf fati dúniyaay bee fúbanumaf fati yo búrom. 28 “Jíliikenum búpunduun: nampi bulakomi ereebey ceb, muyuul di jimanj mati súm fujamaf fulofulolof. 29 Moo nampi jijukumi uru búrom wan isankenuumiñaa, di jimanj mati Añiilau ati anau nalofulolof ñaj. 30 Ínje eem di ereguul malegenam, bukan kati jaat leekucet kubao mukaanaam umu búrom babajout. 31 Dúniyaay di bukinab bajakaab pánsijim, bare furimaf fúmboom léefujimurer bee bándoorey. 32 “Bare let hani an amanj funak fukila mba nanan nikila, let hani simaleekaas sammi di bukinab bajakaab, mba Añiilau ati Atijamit. Ampaom Atijamit cebool amanje. 33 Jíkaanum mati muyuul jimanjut noonei noote kabajo. 34 Moo mukankaan nan ániine aam di ejaay kajaaburuŋ. Nakatumi kumiiceelool man kucookoor síndo’ool. Nájaatikenumi anoosani wampi akaan ban amiiceel apooya ati fúlamutaf man ákaanum jak. 35 Moo kaane jíkaanum mati muyuul jimanjut nei ati eluupey aate élaañul, ŋooleŋŋoolen kaan di káliimaraay, mba di titoorey yati fukaraay, mba di waradabaw, mba bújomaraay. 36 Ati eluupey alaañulojaat amanjenutuul, takum átookuluul bámoorie. 37 Wan ínje eem di ereguuley, woo ínje eem di ereg anoosani. Jíkaanum.”
