MARUK 11

1Yensa di kuriibaool kúriiŋumi sísukas sati Betufage di Betani di Furembooraf fati Uwoliiw. Nan kulakomi kalofenak Yerusalem, Yensa naboñumi kugaba di kuriibaool man kulo fácul. 2Naaniimi, “Jijaw bee di ésukey yan jijonkooraañaa, bare nampi jilakomi kanokenak kati di ésukey, panjijuk jiroha jakoki jan an aremboorurerut. Jífeluujo man jíjeetumul bee taate. 3An aceeŋujaat man aanuul, ‘Kama wau kaane di joom di efelujo?’ joonool, ‘Akiiyaau amaŋujo ban pánalaañenul jo galab bee taate.’” 4Kuriibaak kugabaak di kujawumi, tikutookumi jirohaaj jakoki di téeŋey di fúlamutaf fati kalimbis kuceen di buruŋab, kaboñimi di kulako éfeluujo. 5Kuceen kajuumutomi di kuceeŋiimi, “Waa kaane di joom efel jirohaaj?” 6Di kulaañeniimi wan Yensa aregeenumi, di kukatiibomi man kujaw. 7Di kújeetumuumi jirohaaj bee bati Yensa ban di kuleefumi uloaiil wáamakaw di bálamukab boolijo kuban, naremboorumi alako di wo. 8Bukan kajuupoe di kufetumi uloaiil di buruŋab, bukaaku insi kúmiinul balita di kagoos man kufet di buruŋab. 9Bukanak káfaculomi di kálamukomi di kutooŋumi kacibuloak, “Kasalak kooku di Atijamit! Kásuumaayak kati Atijamit kooku di ampi ajawulomi, oo eenomi Áyiau ajawulomi di kareesak kati Akiiyaau! 10Kásuumaayak kooku di jáyiaj jábileuumi, jáyiaj jábileuumi jati áyiau Dauda afannaaniŋolaal! Kasalak kooku di Atijamit ammi di bukinab bajakaab!” 11Yensa náriiŋumi Yerusalem ban najawumi bee di fukobaf fáamakaf. Najaatoorumi man ajuk wanoosani, bare mati bala’ab súm bujonjon. Ñaa nápurumulomi ajaw bee ésukey yati Betani di kúriiŋenaak kooni uñeney di kugabaak. 12Furabooraf di bújomaraay, nan kúpurumulomi Betani, Yensa man acaarete. 13Naŋandenumi búpunduun babaje etoj, najawumi bee to man ámeelo manteer panaŋoolen abaj muria. Bare mati ewoley yoolibo ériiŋut, atookut dó hani waaf, leejaat etojey cebuyo. 14Yensa nammi búpunduun, “Hani an letarirer búwolumi inki.” Kuriibaool di kujammomi. 15Nan kulaañumi kúriiŋ Yerusalem, Yensa najawumi bee di fukobaf fáamakaf ban natooŋumi kácesoorul kalakomi kanoomenak di enoomey dó. Insi nafarumi bibibil sitaabulas sati kúruŋulaak kati sígodaas di sijunkutas sati kanoomenemi úlaabaan, 16ban náfiren yém hani an man ájeetumul múnoomenaam bee dó. 17Yensa nalakomi kaliikiteniilak man aaniimi, “Furimaf fati Atijamit foone, ‘Eluupom panekaani fulaw bee mati bukanak búrom.’ Bare muyuul jikankaan yo fulako fati kúkuu.” 18Kúsimenaak kunifaanak kati Atijamit di kuliikitenaak kati sílingaas nan kujammomi di kulakomi eñesey buruŋ bampi kubujool. Kúkoliookoli mati jameeŋey búrom di wáaloiimi máamak baliikitenerab boola. 19Di káliim kukila, Yensa di kuriibaool di kúpurumi di ésukey yáamakey yati Yerusalem. 20Furabooraf di bújomaraay, nan koomeenumi di ejaay, di kujukumi búpunduun man bulalabene busay jororor. 21Peter nawoolomi wabajoeenumi naanoomi, “Aliikitenaau, jikeruma! Búpunduunab ban au unummi fuken bulalabenlalaben wababab.” 22Yensa nalaañenumi kuriibaool, “Joote ebaj kafium di Atijamit. 23Ínje eem di ereguul malegenam, ampi aregumi fúlankiinaf ufe, ‘Kábulo’ooro jaw úlo’ooro falaf,’ ban nábajaati úyeget ugaba, bare náyinen mati wan aregumi, panukaani bee di oo. 24Moo kammi ínje eem di ereguul malegenam, wampi jilawumi di kúlawak, jíyinen mati jiyayab wo jiban, pankaan wooluul. 25Bare nampi jiyitomi jijuum man jilaw, joote kabonket bukaaku kalomi di muyuul, mambi Atijamit Ampauul ammi di bukinab bajakaab abonket majakutuul.” 26“Bare jibonketutujaat, Atijamit Ampauul ammi di bukinab bajakaab poop letabonket majakutuul.” 27Yensa di kuriibaool di kujawulomi bee Yerusalem inki. Nan Yensa aameenumi kajaatoorak di fukobaf fáamakaf, no’onu kúsimenaak kunifaanak kati Atijamit, kuliikitenaak kati sílingaas di Kúyahuudak kunifaanak kuceenak di kubilumi bee di oo. 28Di kuceeŋoomi, “Régoli di fujuum fei noom di ekaan uru? Ai asenifo bee ekammo?” 29Yensa nalaañeniimi, “Ínje paniceeŋuul kúceeŋ kákon pat. Jilaañenom, kammojaat panilaañuul di fujuum fei nikaane uru mo’omu. 30Man Yaaya átiigulenemi bukanak, ai asenoomi fujuum fukila, mante Atijamit mba bukan? Jilaañenom!” 31Di kulakomi kamaloor sicebiil, “Oonaajaat Atijamit asenoomi fo, panaceeŋolaal wau kaane úyinenutool. 32Bare mante wúli oote eregey bukan kusenoomi fo?” Kúkolikoli bukanak mati koo kufiunfium Yaaya oo malegen aboña ati Atijamit. 33Mati mo’omu di kulaañenumi Yensa, “Wúli umanjut.” Yensa nalaañeniimi, “Iyoo! Kama ínje letireguul di fujuum fei nikaane uru búrom.”

will be added

X\