MARUK 1

1Mo’omu moo furimaf fajakaaf futooŋumi mati Yensa Apakenaau Áamakau, Añiilau ati Atijamit. 2Nan man aboñaau Yesaaya aciikumi di búkaay yoola, “Ínje oomu níboñeul aboñaom man ayab fáculi, aate bee kajoonen buruŋi. 3Furimaf fati an facibuloulomi di baŋaanab: Jijoonen buruŋab bee mati Akiiyaau, jílus buruŋ bajoone tul bee mati oo.” 4Yaaya Átiigulenaau nápurumulomi di baŋaanab, man ammi di káriiŋeniil furimaf fati Atijamit nammi koote kátiiwoor kukat bálamuk majakutiil ban di kútiiguli mambi Atijamit abonket majakutiil. 5Bukan kajuupoe kápurumulomi di kapanak kati Yúdea búrom, di ésukey yáamakey yati Yerusalem di kujawumi bee káyenten Yaaya. Di kufelumi úyegetiil man kuregumi wan kukammi wajakut ban Yaaya nátiiguleniimi di falaf fati Yorudan. 6Yaaya nakaanomi wañ wajoonenimi ñátum bufal bati eñonkomma. Napiinoorumi ñátum di kabaŋ, ban narieri fábangund di múkum. 7Nalakomi káriiŋeniil furimaf fati Atijamit, di aaney, “Pambaj aatumi ebil, oo afaŋaam kánkum, ínje iŋotut bee éñup bee efel unewaw wati usamataool. 8Nítiiguleneuutiigulen ñátum di mumel, bare pánatiigulenumuul ñátum di Búyegetab Bátienaab.” 9Funak fákon Yensa nápurulomi Nasaret yati Galili, tíariiŋulomi falaf fati Yorudan, boo Yaaya átiigulenoomi. 10Nan Yensa alakomi épuruley di mumelam, yaŋ najukumi bukinab bajakaab man búwambuli, no’onu Búyegetab Bátienaab bulon di oo nan kálaabaan. 11Furim di fúpurulomi bukinab bajakaab, “Au eenomi Añoolom ati búsusom, ban mooli muyeanye máamak.” 12Yaŋ too galab Búyegetab Bátienaab di bukammi Yensa ajaw bee di baŋaanab. 13Nalakobomi wáriiŋe kunak bukan kugaba, noo Seetaanaay elakomi eyinkooley. Sínukuruŋas sákooleniaas sombomi poop, bare simaleeka sati Atijamit di sibilumi sicookoorool man áliŋ. 14Di múlamukaam, nan kukulumi Yaaya dán bukanak kukuleimi kuban, Yensa najawulomi bee di kapanak kati Galili, man alakomi káriiŋenak furimaf fajakaaf. 15Nammi, “Nanan nírindiiŋ, ban jáyiaj jati Atijamit jíriiŋuloriiŋ. Jítiiwoor jikat bálamuk majakutam mooluul ban di jifium di furimaf fajakaaf.” 16Funak fákon nan Yensa alakomi ejaay di kafintak kati Falaf fati Galili, najukumi Simon di atiool Anduru man kulakoe jaleeb di falaf, mati koo kuleeba. 17Yensa naaniimi, “Jiriibenom, muyuul nan man jisofemi siwolas panikaanuul kuwonkena bukan bee di ínje!” 18Yaŋ too galab di kukatulomi kuŋabiil palab man kuriiboomi. 19Yensa narulenumi ejaay fácul jayiinkun di kafintak najukumi kutiaay kugaba kuceen, Yankuba di atiool Yohan, kuñiilak kati Jebede. Kulakoeenlako di busaanaiil man kommi di kágolulak kati kuŋabiil. 20Yaŋ too galab Yensa nawonkiimi, di kukatulobomi ampaiil Jebede di busaanaab di kurokooriil man kuriiboomi. 21Yensa di kuriibaool di kujawumi bee di ésukey yati Kapaanaum. Koo di ériiŋey piyout ceb funakaf fati kálebienak di fúriiŋumi, najawumi dóo di fukobaf man alakomi kaliikitenak bukanak. 22Bukanak di wáaloiimi man aliikitenemi eeno, mati naliikiteniimi di furimool fabaje fujuum di kánkum nan arunga, ban aanout nan kuliikitenaak kati sílingaas. 23Yaŋ too galab di bájudomi fukobaf fooliil ániine an bagun busofe. 24Nacibulomi fatiya, “Yensa ati Nasaret, waa numaŋumi di wúli? Mante nujawulojaw bee kákajenoli room? Nimammanj ai eenomi au, Álirooraau Ákonau ati Atijamit.” 25Yensa namakubomi man ammi, “Tunten! Púr di oo!” 26Bágunab di bukaanoomi kalelebenak ban di bukaawumi máamak man búpurumi di oo. 27Bukanak búrom di wáaloiimi, di kutaatumi kaceeŋoor man kommi, “Kurimak uke kaanoe buu? Kaliikitenak kunkul kubajoe! Namakumi ñátum di kurimak kabajumiñaa fujuum di kánkum nan arunga, hani úgunaw uyiiŋeooyiiŋ.” 28Mukaanaam mati Yensa di mujammomi galab di kapanak búrom kati Galili. 29Yaŋ too galab Yensa di kuriibaool Yankuba di Yohan di kúpurumi di fukobaf ban di kunokenumi di eluupey yati Simon di Anduru. 30Simon alolool anaaraau man afintoe eniilool man ébolie. Yensa yaŋ di ériiŋuley ceb bukanak di kuregoomi mati moola. 31Yensa nalofoomi, nan asofumi kañenool man áyitenulool alako, káboliak kati eniiley di kurooŋenumi sii ban nacookooriimi wampi kuri. 32Di káliim kukila, bala’ab di eloey, bukanak di kújeetumulumi káju’utumi búrom di kan úgun wookumi bati Yensa. 33Bukanak búrom kati ésukey kujojulomi tákon di butumab bati kalimbisak. 34Yensa nasontenumi kajuupoe kabajumi úsumut wanaamutaw, ban nakosoorumi úgun wajuupoe. Bare mati kumammanj ai eenomi oo, nalatumi esen buruŋ man úgunaw usanken. 35Bújomaraay pím fati kajomooraf, Yensa náyilaalimi bala’a bala’ab búteboul, ban nápur bee tan tunoore sii, too nalawumi. 36Di múlamukaam, Simon di kuceenak katooñoomi di kúpurumi eñesooley. 37Nan kujukoomi di kommi, “Anoosani oomu bo eñesiey.” 38Bare nalaañeniimi, “Wulaal ootaale ejaw bee sísuk saasu. Ínje neete káriiŋen furimaf fati Atijamit poop, mati moo nijawulojaw beet.” 39Najawumi banoosani di Galili man alakomi káriiŋen furimaf fati Atijamit di kukobak kooliil ban nakosoor kan úgun wookumi. 40Di bajumi ániinaau an kafaañak kusofe abilumi ban nákuntaajenumi di fáculey yati Yensa, di elawool karamben nammi, “Umaŋujaat, panuŋoolen utilulom.” 41Yensa nabajumi káboteni di oo, nañuurumi kañenool man agoroomi. Nammi, “Nimammaŋ, tilulo.” 42Yaŋ too galab kafaañak di kukatenoomi, natilulimi akoy. 43Yensa natonkoomi ban naanoomi ápuruto galab. 44Nan aregumomi aban, “Janten takum ureg hani an ákon. Bare jaw taac ban núyiisen fúkoi bee di ásimenaau ati Atijamit man ámeeloi. Jéetum búsimen man ásimen nan man aboñaau Muusa aregumi man anoosani afium mati nutilulitiluli ukoy.” 45Bare nápurulomi awuuj ban natooŋumi eregey bukan kajuupoe mati wabajo’oomi búrom. Moo mukammi man Yensa aŋoolenut anoken bee di ésuk ñaa nápurubomi ajaw bee tan tunoore sii, bare bukanak kúpureuupur banoosani bee ejukooley.

will be added

X\