LUUK 9

1Funak fákon Yensa nawonkumi kúriiŋenaak kooni uñeney di kugabaak tákon ban naseniimi kánkum di buruŋ bati kacesoor úgun búrom di kasonten úsumut. 2Naboñiiboñ bee káriiŋen mati jáyiaj jati Atijamit di kasonten káju’utumi. 3Naaniimi, “Nampi jilakomi ejaay kajaaburuŋ, takum an aaken egol éjaatooruma, mba ejonkonkoroŋ, mba mbúur, mba sígodi, hani kaloa kuceen. 4Eluupey yampi jiwalenimi, jilako di eluupey ekila ceb bee nampi jípurumi di ésukey. 5Ésukey yampi kácindomi kulate man kuwalenuul, nampi jípurumi di ésukey ekila jifank kaporak kakotumi di úkamunuul. Moo káyiiseniil mati jibetembeten yo ban utumuul ulee bo di éjimey yooliil.” 6Kúriiŋenaak kati Yensa di kujawumi sísukas, man koom di káriiŋenak furimaf fajakaaf di kasontenak káju’utumi banoosani. 7Nan Herod ajammi, wan Yensa ammi di ekaaney, búyegetool di bújiisoorumi máamak, mati koonsoon Yaaya Átiigulenaau Atijamit áyitenulool di kacetumi. 8Bukaaku koonsoon Eliya árajulolaal. Ban bukaaku koonsoon ákon di kuboñaak kati naaniŋ Atijamit áyitenulool di kacetumi. 9Bare Herod nammi, “Ínje eene kumiin fúkaaf fati Yaaya. Bare ume ai, an emmiñaa di ejamey mati mukaanaam ume?” Ban nañesumi buruŋ bee ejukool. 10Nan kúriiŋenaak kulaañulomi di sísukas ban kuregumi Yensa wan kukaaneenumi. Naŋariimi man kubuuloorumi bee di ésukey yati Beteseda. 11Bare jameeŋey yati bukanak di ejammomi, di eriibenoomi. Nawaleniimi aban naregiimi mati jáyiaj jati Atijamit, ban nasontenumi kan ceeŋumi man asonten. 12Nan bala’ab bulakomi kátinkaak, kúriiŋenaak uñeney di kugabaak di kubilumi di kommi, “Katen bukanak man kulaañ bee di sísukas salofumi mati baabe karamba, mambi kubaj furi di fumoor. Mati wulaal bukooke ban tunoore sii.” 13Bare Yensa nalaañeniimi, “Muyuul di kúkouul jiseniil wampi kuri.” Di kulaañenoomi, “Wúli kúmbuur futok di siwol sigaba ceb nubaje. Mante létumaŋ man ujaw únoomul muria bee jameeŋey uye búrom?” 14Babaj kúniine kúrindiiŋ síwili futok kalakobomi. Yensa nammi kúriiŋenaool, “Jikaaniil kujoj man kulako tanootani wáriiŋe bukan kugaba di uñen.” 15Nan kúriiŋenaak kukammi mo’omu man bukanak búrom kulakomi. 16Yensa naŋarumi kúmbuurak kooni futokey di siwolas sigabaas najiker fatiya, nasalumi ban natingukomi aban, nasenumi muriaam kúriiŋenaool, man kucaabumomi. 17Bukanak búrom di kurimi biyok kupooñ tep. Di kumukenumi burinenab, manteer kumeeŋenumi utekel wooni uñen di ugaba. 18Funak fákon nan Yensa alakomi cebool, man aam di elawey, nabilumi bee di kuriibaool, man aaniimi, “Ai bukanak kurege oo ínje?” 19Di kulaañenoomi, “Bukaaku di kommi au Yaaya Átiigulenaau, bukaaku di kommi au aboñaau Eliya, bukaaku poop di kommi au ákon di kuboñaak kati naaniŋ Atijamit ayitenulo di kacetumi.” 20Naceeŋiimi, “Bare muyuul ai jisofumi oo ínje?” Peter nalaañenoomi, “Au Apakenaau Áamakau.” 21Yensa napankiimi takum kureg hani an ákon jáng. 22Yensa nammi kúriiŋenaool, “Añiilau ati anau aate egaal di waaf wajuupoe, ban oo aate ebaj búlat di Kúyahuudak kunifaanak di kúsimena kunifaan kati Atijamit, di kuliikitenaak kati sílingaas. Bukanak pankubujool, bare di funakaf fúfeegintenaf Atijamit pánayitenulool di kacetumi.” 23Ñaa Yensa nammi bukanak búrom, “Ampi amaŋumi bee kariibenom naate ekat bálamuk kawoonoorak moola, ban natebooro ébaarey yati búpinab funakoofunak ban nariibenom. 24Ampi amaŋumi kapaken eroŋey yoola, oo letabajuyo. Bare ampi amaŋutumi kapaken eroŋey yoola mati oo ariibaom, panabajuyo. 25Kásuum kei anau aate ebaj abajujaat dúniyaay búrom bare nábajaati yuutool? 26Ampi apuñomi ínje di kurimom, Añiilau ati anau panapuño’ool nampi álaañuumi di mawuŋam moola, di mati Ampaool, di mati simaleekaas sálirooraas sati Atijamit. 27Ban ínje eem di ereguul malegenam, muyuul kuceen kammi bajuume taate, kaatut bee ecet bala’a kujuk jáyiaj jati Atijamit.” 28Nan bajumi wáriiŋe kunak futok di kúfeegiir fácul Yensa naŋarumi Peter, Yankuba di Yohan tikuremboor fúlankiinaf bee elaw. 29Nan alakomi elawey, buulool di bulaañoorumi, ban wañool di uñiliñil ufiit pal. 30Yaŋ too galab kúniine kugaba, Muusa di Eliya, di kulakomi kasankenak di oo. 31Boo kurajumi di mawuŋam mati bukinab bajakaab ban di kusanken di Yensa mati elaañey yoola, yan oo aate káliroor di ésukey yáamakey yati Yerusalem. 32Peter di kuriibaak kugaba bukaaku di oo man kúmoorie kúlimen. Bare di kúyilomi galab di kujukumi mawuŋam mati Yensa. Bukoo poop kujujuk kúniine kugaba kan kujuume di oo. 33Nan Muusa di Eliya kulakomi kakatoorak, Peter nasankenumi Yensa, “Arungaau, jajak man wúli ommi taate! Ujuumenaal múguut múfeegiir, jákon bee di au, jákon bee di aboñaau Muusa, di jákon bee di aboñaau Eliya.” Peter álaulut waa naam di kasankenak. 34Bare nan alakomi kasankenak mo’omu, furola di fúwaloul fúyiniil man bíinaatab boolifo buguubeniil. Kuriibaak di kujukumi mo’omu di kúkolimi. 35Furim fápurumulomi dóo di furolaaf, di fommi, “Ume eenomi Añoolom, an íboñuluumi, jijamool!” 36Nan furimaf fusankenumi fuban, kúriiŋenaak di kutookumi Yensa cebool. Ban kúriiŋenaool kúfeegiirak kuregut hani an ákon, wan kujukumi bee nan mo’omu muwuujumi. 37Di furabooraf, nan kuwaloulomi di fúlankiinaf, jameeŋey di kúkamboorumi di Yensa. 38No’onu di bajumi ániine kápurumul di jameeŋey nacibulomi, “Aliikitenaau! Nilawilaw, jiker añoolom mati oo cebool nibaje! 39Bágun busofeoosof bubetool ban di bukaanool man akaaw. Buloŋenool mansi kagufak kúpurul di butumool. Búkateneriitool hani jayiinkun manteer bukaanoojaat álaamo máamak! 40Nilalaw kuriibai, mambi kucesoor bágunab ube di oo, bare kuyetut kukammo.” 41Yensa nalaañenumi, “Wáay muyuul sibaŋoot, kakaanutumi kufiumaay! Bee nei neete kapiyo ban di kamuuten di muyuul? Jéetumulom añooli bee taate iñeme.” 42Yaŋ añiilau di élofuley, bágunab di bufaroomi bubetool ban di buloŋenool. Bare Yensa namakumi bágunab man bukaten añiilau, añiilau nakokoy ban nalaañenoomi ampaool. 43Kalakotomi búrom di wáaloiimi mati mákalaam mati Atijamit. Bare nan kulakomi búrom di wáaloiimi mati wanoosani wan Yensa alakomi ekaaney, nammi kuriibaool, 44“Jíyentenom ban di jiwoolo wan eetumi bee ereguuley. Añiilau ati anau aate esofi aseni kabajumi kánkumak.” 45Bare kumanjut wan aregumi di wan furimaf fúbatulumi. Mati woo uyofoi’iiyofo, takum kúlaul wo. Bare kúkolikoli eceeŋooley mati mo’omu. 46Kañoosoor di kuyitomi di bukoo bee emanj ai di bukoo afaŋe man akaane an áamak. 47Bare nan Yensa amanjumi kawoonoorak kooliil, násoful añiil alofen di oo. 48Naaniimi, “Ampi awalenumi añiilau ume ñátum di kareesom oo ínje nawalene, ampi awalenumi ínje, oo áboñulammi poop nawalene. Mati afaŋumi man asofutimi di waaf di muyuul, oo afaŋumi man akaane an áamak.” 49Yaaya nalaañenumi, “Arungaau, wúli nujujuk anau acesoorumi úgun ñátum di kareesi, núfirenoofiren, mati oo di wulaal uletaal buruŋ bákon.” 50Bare Yensa nammi, “Takum jífirenool. Mati ampi alatutumi muyuul oo oomu di muyuul.” 51Nan kunakak kati eŋariey yoola bee bukinab bajakaab kulofumi, Yensa najuumenumi búyegetool tíen bee ejaay Yerusalem. 52Naboñumi kuriiba kuceen kulo fácul, kajawumi kunoken di ésuk eceen yati Samaria man kujonjoor mati ériiŋuley yoola. 53Bare kati ésukey di kulatumi kawalenool, mati koo kumammanj tíen oo ejaw bee Yerusalem. 54Nan kúriiŋenaool Yankuba di Yohan kujukumomi, di kommi Yensa, “Arungaau, mante létuwalenul sambun di bukinab bajakaab man sireemen buke?” 55Bare Yensa nátiiwoorumi man ajonlen di bukoo, man amakiimi. 56Ñaa di kurulenumi ejaay bee di ésuk eceen. 57Nan Yensa di kuriibaool kulakomi ejaay di buruŋ, ániine aamu nammi Yensa, “Ínje paniriibeni banoosani nuje’e.” 58Bare Yensa nalaañenumi, “Hani usiitil ubabaj usun dampi ucin, basuwa bubabaj wúul dampi bucin. Bare Añiilau ati anau abajut tan aate káyokulo.” 59Nammi an aceen, “Riibenom.” An akila namammaŋ bare nammi, “Arungaau, mutooŋand kob man ilaañ bóot bee kafokak kati ampaom.” 60Bare Yensa naanoomi, “Kat man kacetumi kufok kooliil kacetumi, bare bee mati au, ujaw man úriiŋen mati jáyiaj jati Atijamit.” 61Aamu poop nammi, “Éey, Arungaau, ínje paniriibeni, bare mutooŋand kob man ijaw bóot ukatoor di kati fiilom.” 62Bare Yensa naanoomi, “Ampi asofumi kajandaak kati síbaas bee mati ewañ ban najegoor bálamukool, oo letaŋoolen arok di jáyiaj jati Atijamit.”

will be added

X\