LUUK 8

1Nan púrutomi jayiinkun Yensa najawumi di sísuk sáamak di sayiinkun, man áriiŋen furimaf fajakaaf mati jáyiaj jati Atijamit. Kúriiŋenaak koola uñeney di kugabaak kalakomi di oo. 2Kuseek kuceen kan Yensa apakenumi di úgun di poop nasontenumi úsumut. Di kuseekak kukila Mariyaama, an kuwonkemi Magadalen, úgun wooni futok di ugaba ucesoorimi di oo, 3Yoanna, aseekau ati Kouja, arokaau ati Herod, di Susanna, di kuseek kajuupoe bukaaku kaŋarumi fubajaf fooliil man kuramben Yensa di kuriibaool. 4Nan jameeŋey yápurulomi di ésukooesuk ejojutomi tákon, Yensa naregumi kúregak uke: 5“Bajeembaj awaña aceen ápurulo bee eluk bálut, nan aleebubomi di kalaakak koola, baabu di bulomi di kapanak kati buruŋab, ban kuwuujaak di kutobojubomi, bánaakayitaab di buforubomi. 6Baabu di bulomi di fukoobaaf. Nan bucumbulomi di buraayenumi mati mofam muyajut mumelam. 7Baabu di bulomi di úlind wajuupoe, di uliilumi man ugooyenubomi. 8Baabu di bulomi di mof matoope ban di buliilumi, élut yanoosani yalagetumi ebabaj sílut sawuuje ceme.” Nan Yensa abanumi kasankenak, nammi, “Oo abajumi uwos újamuma, najam!” 9Nan kuriibaool kuceeŋoomi wan kúregak uke kufelumi. 10Nalaañenumi, “Muyuul Atijamit nakaanuukaan man jílaul malegenam mayofoaam mati jáyiaj joola. Bare bukaaku nisankeniisanken ñátum di kúreg, mambi kujiker ban leekujuk, kujam ban léekulaul.” 11“Kúregak uke kufelumi mo’omu, bálutab boo eenomi furimaf fati Atijamit. 12Bálutab balomi di kapanak kati buruŋab boo eenomi kajamemi furimaf fati Atijamit. Seetaanaay di ebil épurenufo di úyegetiil, manteer takum kúyinen man kupak. 13Bálutab balomi di fukoobaaf, boo eenomi kajamemi furimaf fati Atijamit, di kuyabufo di kásuumaay galab. Bare fúnokeneriit lói di úyegetiil, ban léekuyinen piyo, mati Seetaanaay eyinkiijaat di kulaañ bálamuk. 14Bálutab balomi ban úlindaw ujuupomi boo eenomi kajamemi furimaf fati Atijamit, bare síwoonooras di fubajaf, di kásuumaak kati eroŋey yati dúniyaay, doo búrom di gooyeniimi ñaa kúwoleneriit waaf di eroŋey yooliil. 15Bare bálutab balomi di mofam matoopaam boo eenomi kajamemi furimaf fati Atijamit, ban di kusofufo jak di úyeget wajoone di walegenoe, ban di kuwolen jak di eroŋey yooliil kápurumul di kamuutenak. 16“An letayaben éwuŋenuma ban naŋar katekel áfimenuyo, mba nakaanuyo di fátaam fati bacaac. Bare panaganduyo di fúganduma man kampi kanokenulomi di kujuk. 17Mati wanoosani wayofimi búrom panurajeni téeŋey, ban wanoosani wabuusoorimi panumanjeni ban di uneni di mawuŋam. 18Jíkaanum man jíyentenooremi eeno. Mati ampi abajumi Atijamit panabenenool. Ampi abajutumi, hani jasiinkuney di wan asofumi woo naake, Atijamit pánabotuuwo di kañenool.” 19Yensa iñaayool di kutiool di kubilumi bee di oo, bare kuyetut kulofool tan ammi mati jameeŋey yati bukanak. 20Di baj aregumi Yensa, “Iñaayi di kuti’i bukooku bo téeŋey, koone kumammaŋ bee ejuki.” 21Bare nalaañenumi, “Kan iwonkemi iñaayom di kutiom, koo eenomi kajamemi furimaf fati Atijamit, ban di kukaan wan furegumi.” 22Funak fákon Yensa di kuriibaool di kújupomi dóo di busaana ban naaniimi, “Jítipaal bee kapan kaaku kati falaf.” Di kujawumi. 23Nan kulakomi étipey námoorimi. Fárus fáamak di lonkos yáamak di siyitoulomi di falaf, busaanaab di butaatumi emeeŋey mumel, man bumaŋ eyoom. 24Kuriibaool di kujawumi kúyiloomi, di aaney, “Arungaau, Arungaau! Wulaal kooku bo ecet di falaf!” Yensa nayitomi amakumi fárusaf di lonkosey di siyinumi tem. 25Yensa naceeŋiimi, “Kafiumak kooluul kookei?” Di wáaloiimi, ban di kúkolimi, di kuregoorumi, “Kama ume ai, namakumi hani fárusaf di lonkosey, man sijamool!” 26Yensa di kuriibaool, di kúriiŋumi mofam mati Gerasen kan sijonlenoorumi di kapanak kati falaf fati Galili. 27Nan Yensa alakomi káwaloulak di busaanaab, di kúkamboor di ániine ápurulo di ésukey yáamakey, an úgun wookumi. Ániinaau napiyopiyo ákaanoeriit wañ, ban álakoeriit síndo, bare di fufokaf. 28Nan ajukumi Yensa, nalomi di bújonlenab boola aban nasankenumi fatiya, “Yensa, Añiilau ati Atijamit Afaŋumi Katebo, waa butumi boom di ínje? Nilawilaw, takum úsuutukenom.” 29Napankeenumi bágunab man búpur di oo. (Mati ñameeŋe busofeeneoosof, kupooyeoopooy ban di kuŋoobeneoomi kuban ñátum ñiwuj, bare natarenuñomi búrom ban úgunaw ukammi man atey bee di baŋaanab. 30Yensa naceeŋoomi, “Kareesi buu?” Nalaañenoomi, “Wajuupoe.” Mati úgun wajuupoe ucine di oo. 31Úgunaw di ulawoomi, takum amandooruwo man ujaw bee di busunab básankimi babajutumi tan búkabe. 32Di bajumi kamat kati sikumba salakomi kafoop di kapanak kati furembooraf. Úgunaw di ulawumi Yensa buruŋ, man unoken di sikumbaas use. Nawuluwomi buruŋ man unoken di sikumbaas. 33Úgunaw úpurumi di ániinaau bee kanoken di kamatak kati sikumbaas búrom di kuteyumi bee di kayuuyak di kuwuuj kulo di falaf, kuyoom dó yem. 34Nan kumataak kujukumi wabajomi, di kuteyumi kúpur, di kuregumomi banoobani di ésukey yáamakey di sísukas salofoorumi di bukoo. 35Bukanak di kúpurulomi kujaw bee ejukey wabajoeenumi, di kúriiŋulomi tan Yensa ammi, di kutookulomi ániinaau an úgunaw usofeenumi, man alakoe di bújonlenab boola. Nakaanokaano wañ ban búyegetool man bujuume cek, di kúkolimi máamak. 36Ñaa kamaateenumi di kureg bukanak man Yensa asontenumi an úgunaw wookeenumi. 37Bukanak kalakomi di mofam mati Gerasen búrom di kuregumi Yensa akatiil man ajaw. Mati koo kúkolikoli máamak ban saalas sooliil sijijis. Ñaa Yensa nájupomi busaanaab bee elaañ. 38Ániinaau an Yensa asontenumi di úgunaw nalawoomi manteer nakatool man kuriiboor. Bare nammi, 39“Laañ bóot man urege bukanak wan Atijamit akammi bee di au.” Ániinaau nalaañumi bóot man areg kati ésukey búrom wan Yensa akammi bee di oo. 40Nan Yensa alaañulomi di kapan kaaku kati falaf, jameeŋey yati bukanak di ewalenoomi jak mati oo kulakoeenumi ekobey. 41Ániinaau an koonemi Yairus náriiŋulobomi, oo arunga ati fukobaf fati bo, nalomi tentaam kúfima di úkamunaw wati Yensa man alawoomi man ajaw bee di síndo’ool, 42mati jijaŋaaj joola jákonaj jooju bo ecet járiiŋe simit uñen di sigaba. Nan Yensa ajawumi, bukanak di kuŋomenoomi kapanookapan man kommi kafaroor. 43Di bajumi aseek aceen di bukoo abaje kásumut kati kañooak kátingoeriitumi, kásumutak kukila kooku di oo wáriiŋe simit uñen di sigaba ban bajut ampi aŋoolen asontenool. 44Nájawumul bálamukool man áloful Yensa ban nagorumi balisab bati kaloaool káamakak. Kañooak koola kátingoeriitumi di kutingomi yaŋ too galab. 45Yensa nammi, “Ai agoraam?” Nan bukanak búrom kuñoosoorumi, Peter nammi, “Arungaau, jameeŋey yati bukanak yooyu man eŋoobeni di kamingeni!” 46Bare Yensa nammi, “An aceen agoraññaa. Mati nijujuk kánkumak kúpupur di ínje.” 47Nan aseekau ajukumi mati nararaj, nákolimi di kaleleben di kóro, nalomi kúfima di bújonlenab bati Yensa. Too di fáculey yati bukanak búrom naregumi wau kaane nagoreenool, di poop man akoyeneenoomi yaŋ eeno. 48Yensa naanoomi, “Áliinom, kafiumak kooli kupakenipaken. Jaw di kásuumaay.” 49Nan Yensa alakomi eregey mo’omu, ániine aceen nápurulomi di eluupey yati Yairus, arungaau ati fukobaf, man ammi, “Añooli nacecet. Ceeŋut man ugaalen Aliikitenaau man áriiŋ bo.” 50Bare Yensa najammi mo’omu wan aboñaau aregumi, nammi Yairus, “Takum úkoli, yínen ceb, añooli panakoy.” 51Nan áriiŋulomi di eluupey, náfiren hani an man anoken di oo leejaat Peter, Yohan di Yankuba, di añiilau ampaool di iñaayool ceb. 52Bukanak búrom di kulakomi kagamoor di búlok bati múkojiin mati añiilau acetumi. Bare Yensa nammi, “Takum jíruuden. Mati oo acetut, oo kámoori naam di ko!” 53Bare di kúnarulool mati kumammanj fiit añiilau nacecet. 54Ñaa Yensa násofulool kañenak nacibulomi, nammi “Añoolom, yito!” 55Yuutool di elaañulomi, nayitomi galab! Yensa naregumi kusenool waaf man ari. 56Kuwolaool di wáaloiimi, bare Yensa napankiimi takum kureg hani an ákon wabajomi.

will be added

X\