LUUK 6

1Di funak fákon fati kálebienak, nan Yensa di kuriibaool kulakomi ewuujey ulaakaw wati mulukiinam, kuriibaool kuwuwuut ban di kulokos di uñeniil man kutokoñ mo. 2Bare Kufarisaak kuceen di kuceeŋiimi di kommi, “Wau kaane man joom di ekaan wan sílingaas sífirenumi di funakaf fati kálebienak?” 3Yensa nalaañenumi man aceeŋiimi, “Mante jitamburerut jiliiken wan áyiau Dauda akaaneenumi nan oo di kuriiboorool kucaaretumi? 4Nanokenumi di éguutey yati Atijamit man ayabulomi kúmbuurak káñiiaak kanenimi bújonlenab bati Atijamit, man ariko aban nasen kuriibaool poop. Sílingaolaal sífirenfiren man an ariko leejaat kúsimenaak kati Atijamit cebiil.” 5Yensa naaniimi, “Añiilau ati anau oo eenomi arungaau ati mukaanaam mati funakaf fati kálebienak.” 6Di funak faafu fati kálebienak, Yensa najawumi bee di fukobaf man alakomi kaliikiten. Di bajumi ániine an kañenool kúridak kuceteenumi ammi dó. 7Kuliikitenaak kati sílingaas sati Atijamit di Kufarisa kuceen di kulakomi káninguloor Yensa, manteer panasonten di funakaf fati kálebienak, mambi kutaaken Yensa di ekaan majakut. 8Bare Yensa namanjumi wan kusofumi di úyegetiil, nammi ániinaau an kañenool kucetumi, “Bil, juum taate.” Ániinaau nayitomi ajuum to. 9Yensa naaniimi, “Paniceeŋuul, waa sílingaas soololaal sisene man ukaanaal di funakaf fati kálebienak? Buruŋ bati ekaan wajake mba wajakut, kapaken an mba kápakenaati an?” 10Najikeriimi álireniil koo búrom, naanoomi, “Lanten kañeni.” Nalantenukomi war, ban kañenool di kukoy. 11Mati mo’omu, di kuñuumulumi ban kutaatumi kasankenoorak wampi kukammi Yensa. 12Funak fákon Yensa nápurulomi aremboor fúlankiinaf bee elawey, nakaanubomi fukaf búrom elawey yati Atijamit. 13Nan bala’ab burabumi náwonkuumi kuriibaool búrom tákon, man amukenumi kooni uñeney di kugabaak di bukoo bee di oo, kan awonkumi kúriiŋenaak. 14Simon, an Yensa akammi kareesak kuceenak Peter, Anduru Simon atiool, Yankuba di Yohan, Filip di Batolome, 15Matiu, Tomas, Yankuba añiilau ati Alif di Simon ati di fujuumaf fati Kafaŋumi man kumaŋe moofiil. 16Yúdas añiilau ati Yankuba, Yúdas Isikariot aatumi épurey di Yensa. 17Nan Yensa, oo di kúriiŋenaool kuwaloulomi di fúlankiinaf, ban najummi tan pánloe di kuriibaool kajuupoe. Jameeŋey yati bukanak elakolako to yápurulo di mofam búrom mati Yúdea. Di bajumi bukaaku kápurumulo di ésukey yáamakey yati Yerusalem, di poop sísukas sati Turo di Sidon sapanomi falaf fáamakaf. 18Bukanak uke kajawulomi bee káyenten furimool di poop kasontenoor úsumutiil. Ban kan úgunaw usofumi koo nasonteniisonten. 19Jameeŋey yati bukanak búrom di elako eñes bee egorool, mati kánkum kati kasonten kúpurumulopurum di oo ban di kusonteniimi poopiil. 20Yensa natebenumi fúkaaf lóog man ajikerumi kuriibaool ban naaniimi, “Muyuul kabajutumi jakuujak, mati muyuul kati di jáyiaj jati Atijamit. 21“Muyuul kacaaretumi iñeme jakuujak, mati panjiri jipooñ. “Muyuul kammi di búlokab iñeme jakuujak, mati pánjiluu. 22“Muyuul jakuujak nampi bukanak kumaŋutuumi, di kulatuumi, di kujeluumi, ban di kukajen ureesuul mati muyuul kuriibaak kati Añiilau ati anau. 23Nampi mo’omu mubajuumi, jibaal di jimaayoor di kunak kukila, mati bacaamuul báamakab boobu bo bukinab bajakaab. Moo mákonam, kufannaaniŋuul kukaaneenumi bee di kuboñaak kati Atijamit. 24“Bare muyuul kabajumi búyiikab bulako di muyuul, mati jibabaj jiban eñabey yati úsusuul. 25“Muyuul kapooñumi iñeme búyiikab bulako di muyuul, mati panjicaaret. “Muyuul kammi di éluuey di kásuumaay iñeme búyiikab bulako di muyuul, mati panjilok di mátaañie! 26“Muyuul bukan kajuupoe kommi di esaluuley búyiikab bulako di muyuul, mati kufannaaniŋiil moo poop kukaaneenumi bee di kuboñaak kubuntaak.” 27“Ínje eem di ereguul ure kajamemi: Jimaŋ kulatooruul, jikaan wajake bee di kalatuumi. 28Jilaw Atijamit man asen kásuumaayak bee di kanumuumi, ban di jilawool bee mati kásuutukenuumi. 29An atancijaat karaab, senool kaaku poop man atanci, an aŋarujaat kaloai káamakak takum ulat man aŋar kaloai kayiinkunak. 30Alawimi waafi uwulool. Takum uceeŋ bukanak man kulaañeni wan kuŋarumi di au. 31Jikaan bukanak wan jimaŋumi man kukaanuul. 32“Jimaŋujaat kamaŋumi muyuul ceb, buu panjiŋoolen jibaj kasal? Mati hani kukaana majakut kukaanekaan mo! 33Jikaanjaat wajake bee di kakammi wajake bee di muyuul, buu panjiŋoolen jibaj kasal? Mati hani kukaana majakut kukaanekaan mo! 34Jimaagenjaat kupaaluul kan jígolummi pankucaamuul fáculey, buu panjiŋoolen jibaj kasal? Mati hani kukaana majakut, kumaagenemaagen bee di kakaanemi majakutam, mambi kulaañeniil wan kusenumi. 35Bare jimaŋ kulatooruul, ban di jikaaniil jak, jimaagen ban takum jiwoonoor pankulaañenuul waaf. Moo panjibaj bacaamab booluul báamakab, ban panjikaan kuñiilak kati Atijamit Afaŋumi Katebo. Mati oo najajak bee di kásaleriitoomi di kájakaatimi. 36Joote ekaan kubonketa nan man Ampauul akammi abonketa. 37“Takum jigamen bukaaku, Atijamit poop letagamenuul. Takum jijuk eloey yati bukaaku, Atijamit poop letajuk elouul. Jibonket bukaaku, Atijamit poop panabonketuul. 38Jiwul bukaaku, Atijamit poop panawuluul. Malegen, panjiyab wuuj bukaaku kan jiwulumi, manteer réaati di uñenuul yúo. Mati káliikumaak kan jíliikumumi bukaaku, koo Atijamit pánaliikumumi muyuul.” 39Yensa naregiimi poop kúregak uke: “Mante kúpuuma kugaba pankuŋoolen kuruuoor? Kammojaat, koo poopiil pankulo di busun jálaŋ, lee mo? 40Aliina áfaŋeriit kákalaa aliikitenaool, bare aliina anoosani nampi abanumi kaliikenak koola, panaano nan aliikitenaool. 41“Wau kaane nujuk jinukaj jammi di jícilaj jati an, bare ujukut fúbaaraf fammi di jícili? 42Mba buu panuŋoolen urege apaali ariiba, ‘Atiom, bonket kob man ípuren jinukaj jammi di jícili,’ nan uŋoolenutumi ujuk fúbaaraf fammi di jícili? Au mamisam! Utaat úpuren fúbaaraf fammi di jícili, banjaat panuŋoolen ujuk tíen man úpuren jinukaj jammi di jícilool. 43“Búbaar bajake búwoleriit búwolum bajakut, ban búbaar bajakut búwoleriit búwolum bajake. 44Búbaar banoobani búmanjumeimanjum ñátum di búwolum boolibo. Kútujeriit búwolum bati búpunduun di úlind, mba kútujeriit búwolum bati kúul di utanja. 45Anau alegenau oo ápureneuumi wajake di búyegetool, ban anau alegenoutau oo ápureneuumi wajakut di boola. Mati butumab wápureuumi di búyegetab, woo busankenemi. 46Yensa naaniimi, “Wau kaane di jiwonkom ‘Arungaau, Arungaau,’ ban letukaan wan ireguumi? 47Ampi abilumi bee di ínje najam kurimom ban nakaanuko pániyiisuul man aanomi. 48Nakankaan nan ániine aam di kateep eluup, awokumi sánki, man ajoonen fúlakenumaaf di fukooba. Nampi mumel máamak muteyulomi bee di eluupey ekila, leemuŋoolen mugorenuyo mati élinliŋ. 49Bare ampi ajammi kurimom ban ákaaneriituko, nakankaan nan ániine ateepumi eluup, ban awokut fúlakenumaaf sánki. Nan mumel máamak muteyulomi bee di eluupey ekila, yaŋ too galab eluupey ekila panelo wám!”

will be added

X\