LUUK 5

1Funak fákon nan Yensa Ajummi di kafintak kati falaf fati Gennesaret, jameeŋey yati bukan kajuupoe di elakomi kafaroor bee ejamey Yensa mati furimaf fati Atijamit. 2Yensa najukumi usaana ugaba di kásikak, wan kuleebaak man kuwaloe man kulakomi efank kuŋabak kooliil. 3Nájupomi di busaana bákon di wo, ban Simon akilumi, man aanoomi afarubo jayiinkun bee di mumelam. Nálakoromi man aliikiten bukanak kápurumul dó. 4Nan abanumi káriiŋenak kati furimaf fati Atijamit, nammi Simon, “Pumen busaanaab ban sánkimi, au di kurokoori ban di jileeb kuŋabak kooluul man jisof siwolas.” 5Simon nalaañenoomi, “Há! Arungaau, wúli nunanaab di fukaf búrom bare usofut hani waaf! Bare uregujaat mo’omu, panuleeb kuŋabak.” 6Nan kuleebumi kuŋabak, di kusofumi siwolas simeeŋenuko tep kúlebi tús manteer kumaŋ katuutulo. 7Di kúbirulomi kurokooriil kammi di busaanaab baabu di eñes karamben, ban koo di kubilumi kurambeniil. Di kúriiŋulotomi di kumeeŋenumi usaanaaw ugabaaw di siwolas, manteer umaŋ eyoom. 8Nan Simon Peter ajukumi wabajomi, nákuntaajenumi di bújonlenab bati Yensa, di aaney, “Wáay, Akiiyaau! Bonket ukatom, mati ínje akaana majakut.” 9Mati oo di kurokoorool búrom di wáaloiimi mati kajuupoak kati siwolas san kusofumi. 10Simon kurokoorool Yankuba di Yohan, Jebede kuñoolool, koo poop di wáaloiimi. Yensa nammi Simon, “Takum úkoli! Kápurum iñeme panukaan awonkena bukan bee di ínje!” 11Nan kúpurenumi usaanaiil bee di kásikak ceb, di kukatumi bálamuk wanoosani wooliil man kuriiboomi. 12Nan Yensa alakomi di ésuk yáamak yiceen, ániine an kafaañak kusofe líip nabilumi. Nan ániinaau ajukumi Yensa nalomi kúfima nalawoomi man ammi, “Akiiyaau, umaŋujaat, panuŋoolen utilulom!” 13Yensa nalantenumi kañenool man agoroomi, di aaney, “Nimammaŋ, tilulo.” Yaŋ too galab kafaañak di kukatenumi ániinaau. 14Yensa natonkoomi takum areg hani an ákon, bare “jaw ban núyiisen fúkoi bee di ásimenaau ati Atijamit man ámeeloi. Jéetum búsimen man ásimen nan man aboñaau Muusa aregumi man anoosani afium mati nutilulitiluli ukoy.” 15Bare kareesak kati Yensa di kufaŋ man kujamoe banoobani, jameeŋey yati bukanak di ebilumi bee ejamooley di kubaj kasonten. 16Bare niceen najawejaw alako cebool di baŋaanab man alaw. 17Funak fákon nan Yensa alakomi kaliikiten, Kufarisa kuceen di kuliikitenaak kati sílingaas balakoe to kápurulomi di sísuk sati Galili, di sati Yúdea, di ésukey yáamakey yati Yerusalem. Kánkumak kati Akiiyaau kulakolako di Yensa man asonten káju’utumi. 18Kúniine kuceen katebulo ániine abakoe di silaak. Di kulakomi eñes bee kánokenumulool man kunenool di bújonlenab bati Yensa, 19bare kuyetut kubaj buruŋ bampi kúnokenumulool bee di Yensa mati bukanak kumemmeeŋ, di kuremboorumi kasondak, di kúlukomi ban di kúyuunuloomi di silaakas san abakoaau afintomi bee titoorey yati bukanak di bújonlenab bati Yensa. 20Nan Yensa ajukumi kafiumak kooliil kúkalaakalaa nammi, “Añoolom, majakuti mubonketibonket.” 21Kuliikitenaak kati sílingaas di Kufarisaak di kulakomi kawoonoor, man koone, “Tíj, kama ume ai asankeneñaa ñíi? Ai aŋoolene abonket majakutam, leejaat Atijamit cebool?” 22Yensa amanjumi wan kulakomi kawoonoor, ñaa naceeŋiimi, “Wau kaane di jilako kawoonoor kaanoe mo’omu? 23Wei ufaŋe man uhiilie man ireg ániinaau abakoaau majakutool mubonketibonket mba man iregool ayito man ajaw? 24Bare nimammaŋ mambi jimanj mati Añiilau ati anau nababaj kánkum di dúniyaay man abonket majakutam mati bukanak.” Yensa najawumi bee di ániinaau abakomi nammi, “Ínje eeni, yito teb silaaki man ujaw bóot!” 25Yaŋ too galab nayitomi di fáculiil, natebumi silaakool tan afintoeenumi, ban najawumi bóot, di esaley máamak mati mákalaam mati Atijamit di móro. 26Koo búrom di wáaloiimi máamak. Di kubajumi kákoli, di kusalumi Atijamit, di aaney, “Há! Jaat nujukaajuk wajamurerutimi wafaŋe kúko’olaal!” 27Nan mo’omu múpurutomi, Yensa nápurulomi ákamb alaga basaaf, an koonemi Lewi, tan arokemi. Yensa naanoomi, “Riibenom.” 28Ñaa Lewi nakatumi bálamuk wanoosani woola, man ariiboomi. 29Lewi nakammi káaniŋ káamak di síndo’ool bee mati Yensa. Di bukanak kamaatubomi, babaj kulaga basaaf kajuupoe máamak di poop bukanak kuceenak. 30Kufarisaak di kuliikitenaak kooliil kati sílingaas di kulakomi kákuuluj bee di kuriibaool, man kommi, “Wau kaane di jiri dákon di kulaga basaaf di kasofutimi di waaf?” 31Yensa nalaañeniimi, “Bukan kájumi kuceeŋut asontena, bare káju’utumi ceb. 32Ínje ijawulout bee ewonk bukanak kajoonaak, bare kasofutimi di waaf, man kútiiwoor kukat bálamuk majakutam.” 33Kufarisaak di kuliikitenaak kooliil kati sílingaas di kommi Yensa, “Kuriibaak kati Yaaya Átiigulenaau kukaanekaan balatab di kulaw, kati Kufarisaak koo poop moo, bare kuriibai eri di kuraan nanoosani bakaanut balatab.” 34Yensa naceeŋiimi, “Mante panjiŋoolen jikaan man ati fuyabaf kupaalool kukaan balatab, oo too di bukoo? 35Kunakak pánkuriiŋ nampi ati fuyabaf aŋarimi di bukoo, ñaa kunakak kukila pankukaan balatab.” 36Yensa poop naregiimi kúregak uke: “An átuutuleriit jipeket di kaloa kunkul man acik alook kéele. Akammojaat, panatuutul kaloaak kunkulak, ban jipeketaj jati kaloaak kunkulak di kéelaak lee siriiboor. 37Moo mákonam, an áwuleneriit wayin yunkul di ubaŋ wafanlene. Akammojaat, wayiney yunkuley pánepambenuwo, ulee di wayiney, ulee di ubaŋaw. 38Wayin yunkul eete éwuleni di ubaŋ wunkul. 39An ámaŋeriit wayin yunkul baraanerab wayin yafanlene aban. Mati naanesaan, ‘Wayin yafanlene ejajak.’”

will be added

X\