LUUK 4

1Nan Yensa alaañulomi kápurumul di falaf fati Yorudan, nameeŋumi di Búyegetab Bátienaab bati Atijamit. Búyegetab Bátienaab di bújeetumoomi bee di baŋaanab mambi buyuunenool. 2Boo nalakomi wáriiŋe kunak bukan kugaba, noo Seetaanaay elakomi eyinkooley. Di kunakak kukila búrom barirerut waaf, di múlamukaam, bacaarab di bubilumi busofool. 3Seetaanaay di yoonoomi, “Kaanjaat au Añiilau ati Atijamit, jáatiken ekooba uye man elaañ muria.” 4Bare Yensa nalaañenuyomi, “Ciikiciik, ‘Lee muria ceb anau aate éroŋum.’” 5Seetaanaay di éjeetumoomi bee tan teboe man éyiisoomi sísuk siceen sati mofam búrom nanan nátemie. 6Di yoonoomi, “Paniseni sísukas use búrom man urunguso di fujuum ban nukil majakam mooliso búrom, mati Atijamit asenammi woo búrom, ban paniŋoolen isenuwo anoosani an imaŋumi. 7Úkuntaajenjaat fáculom man umiiceelaetom, uru búrom panukil ro.” 8Yensa nalaañenuyomi, “Ciikiciik, ‘Panoote kákuntaajen man umiiceelaet Akiiyaau Atijamit ooli, ban numiiceelaetool, oo cebool.’” 9Seetaanaay di éjeetumoomi bee Yerusalem, man erembenoomi di donkaasey yati kasondak kati fukobaf fáamakaf, di yoonoomi, “Kaanjaat au Añiilau ati Atijamit, baal bee tentaam! 10Mati ciikiciik, ‘Atijamit panareg simaleekaool man sipooyi jak,’ 11ban foone, ‘Di uñenaw wooliso pansipebi, takum kákamuni kunag túc di ekooba.’” 12Yensa nalaañenuyomi, “Ciikiciik, ‘Ootut eyink Akiiyaau Atijamit ooli.’” 13Nan Seetaanaay ebanumi eyinkey Yensa, di ekatoomi ñaake man épurumi ejawumi bee niceen inki. 14Yensa nalaañumi bee kapanak kati Galili. Kánkumak kati Búyegetab Bátienaab kooku di oo. Mukaanaool di muyiisoorumi di mofam maŋoobenumi búrom. 15Nalakomi kaliikitenak di kukobak kooliil, ñaa anoosani ajammi nálebienoomi. 16Yensa nalaañumi bee Nasaret, ban akurimi. Di funakaf fati kálebienak, najawumi bee di fukobaf nan man apiimi nayitomi ajuum man aliik furimaf fati Atijamit. 17Di kusenoomi búkaay yan aboñaau Yesaaya aciikumi. Nábooñuluyomi tan kuciikumi tíen furimaf fati Atijamit man foone, 18“Búyegetab Bátienaab bati Akiiyaau boobu di ínje, mati namukenammuken man íriiŋen furimaf fajakaaf kalekumi. Náboñulamboñ bee karegen mati epakey kasofimi, di poop mati ewuley yati ejukey kájukeriitumi, bee kapaken kan búyiikab bommi di kañenak kati kulatooriil, 19bee karegen mati emitey yan Akiiyaau abilumi bee kapakenak bukanool érindiiŋ.” 20Nabooñ búkaay, ban nalaañenumi asen arambenaau ati fukobaf aban, nalakomi. Bukanak búrom kammi di fukobaf di kujikeroomi yém. 21Nataatumi eregiiley, “Funakaf fati jaat, furimaf fo’ofu fan jijamuñaa fúlilir, nan man jijammi eeno.” 22Koo búrom kamaatumi di kúlebienool, mati di furimaf falegenaf fan alakomi kasankenak di fukaan wáaloiil. Di kulakomi eregey man kommi, “Jé! Kama room ume let añiilau ati Esufa?” 23Yensa naaniimi, “Nisofe malegen panjiregom kúregak uke, ‘Asontenaau, sontenooro.’ Muyuul panjoonom man ikaanuul baabe di ésukey yúmboom nan man jijamulomi wan ikaaneenumi di ésukey yati Kapaanaum.’” 24Ban nammi, “Ínje eem di ereguul malegen, bájeriit aboña ati Atijamit ampi bukanak kati ésukey yoola kusofe jak. 25Bajeembaj kuseek kajuupoe kati kújima di mofam búrom mati Isirael di kunakak kati aboñaau Eliya nan bajumi burank wáriiŋe simit sífeegiir di bútingum, no’onu bacaar báamak buloulomi di bukanak búrom. 26Atijamit aboñut Eliya bee di hani ákon di bukoo, bare naboñooboñ bee di aseek ati ájima ajaaburuŋ ati Jerefet di mofam mati Sidon. 27Di kunakak kati aboñaau Elisa bajeembaj kati kafaañak kajuupoe di mofam mati Isirael, ban hani ákon di bukoo atiluluti, leejaat Naaman ati mofam mati Siria.” 28Bukanak búrom kammi di fukobaf nan kujammi mo’omu di bóli’iimi wút. 29Di kuyitomi man kufarenoomi ápur di ésukey yáamakey ekila, ban di kújeetumoomi bee mo di kayuuyak kati furembooraf fan ésukey yooliil eteepimi. Di kusofumi mambi kúfarulool kúbetulool tentaam. 30Bare naweejulomi di jameeŋey ajaw buruŋool. 31Yensa najawumi bee Kapaanaum yati Galili. Di funakaf fati kálebienak, nalakomi kaliikitenak di fukobaf. 32Bukanak di wáaloiimi man aliikitenemi eeno, mati furimool fubabaj fujuum nan arunga. 33Di fukobaf babaj dó, ániine an úgun wookoomi nacibulomi máamak bee di Yensa nammi, 34“Wáay! Yensa ati Nasaret, waa numaŋumi di wúli? Mante nujawulojaw bee kákajenoli room? Nimammanj au ai! Au eenomi Álirooraau Ákonau ati Atijamit!” 35Yensa namakumi bágunab, di aaney, “Tunten! Púr di oo!” Bágunab di bubetumi ániinaau titooriil, ban di búpurumi bujaw bábukenutool. 36Bukanak búrom di wáaloiimi di kuregoorumi, “Kama ñaa, kurimak uke kaano buu? Mati oo amakumi úgunaw di kurimak kabajumiñaa fujuum di kánkum nan arunga, man ujam ban di ukatenool!” 37Moola di mujammomi di upanaw uŋomenumi Kapaanaum. 38Yensa nápurumi di fukobaf ban najawumi agooŋumi di eluupey yati Simon. No’onu Simon alolool anaaraau man afintoe, eniilool man ébolie, ñaa di kulawumi Yensa man asontenool. 39Najummi di kapanak kati bacaacab náñup bee di oo, ban namakumi káboliak kati eniiley di kurooŋomi sii. Aseekau nayitomi galab man acookooriimi. 40Nan bala’ab bulakomi ejoney, bukanak kabajumi kusonta kati úsumut wanaamut di kújeetumuliimi bee di Yensa. Narembenumi uñenool di anoosani di bukoo, ban nakoyeniil. 41Benento, úgun poop di úpurumi di bukan kajuupoe, di ekaawey di yóro, “Au eenomi Añiilau ati Atijamit!” Yensa namakumi úgunaw ban náfirenuwo man usanken mati umammanj oo eenomi Apakenaau Áamakau. 42Fati kajomooraf, di bújomaraay pím, Yensa najawumi ápur ésukey yati Kapaanaum, man ajawumi alako cebool tan tunoore sii. Jameeŋey yati bukanak di elakomi eñesooley, ñaa nan kujukoomi di kutaatumi esofool takum ajaw. 43Bare nalaañeniimi, “Ínje eete káriiŋen furimaf fajakaaf mati jáyiaj jati Atijamit di sísuk saasu poop, mati moo Atijamit áboñulammi beet.” 44Narulenumi káriiŋenufo di kukobak di mofam mati Yúdea búrom.

will be added

X\