LUUK 3

1No’ona nan Tiberi Áyiau Áamakau, alakoeenumi Áyiau Áamakau ati mofam mati Róoma, abajumi emitey yakammi simitas bútinkeney di jáyiaj joola, noo Pontius Pilat Anifaanau ati Yúdea. Herod. akammi arungaau ati Galili, atiool Herod Filip oo akammi arungaau ati kapanak kati Itura di Tarakonit. Lisaniu poop akammi arungaau ati kapanak kati Abilen. 2Annas di Kayafas koo kulakomi kúsimenaak káamakak kati Atijamit di fukobaf fáamakaf. No’onu Atijamit asankenumi di Yaaya oo noo man alakoe di baŋaanab. 3Yaaya najawumi mofam búrom malofoorumi di falaf fati Yorudan, man aam di káriiŋeniil furimaf fati Atijamit, “Jítiiwoor jikat bálamuk majakutuul jikaan man kútiigulenuul moo Atijamit panabonketuul.” 4Nan man ciikimi di búkaay yati aboñaau Yesaaya: “Furimaf fati an facibuloulomi di baŋaanab: ‘Jijoonen buruŋab bee mati Akiiyaau, Jílus buruŋ bajoone tul bee mati oo! 5Kálum kanoosani pankufokeni, fúlankiin fanoofani di furemboor fanoofani panfufati fútemi, uruŋaw waŋondoorumi panujooneni, uruŋaw wafosumi pánulusi kuur. 6Ban anoosani aroŋumi panajuk man Atijamit aatumi kapakenoolak!’” 7Jameeŋey yajawulomi man étiiguli bare naaniimi, “Muyuul ulun! Ai agamenuul man jipak, kañuumulak kati Atijamit kaatumi ebiley? 8Jikaan nan úbaaraw wawolemi jak, jikaan mukaana maate káyiisen mati jítiiwootiiwoor jikat bálamuk majakutam. Takum jisofooro mati man jikammi muyuul úwoloorumaw wati Iburehima, panjipak. Ínje eem di ereguul tíen mati Atijamit naŋooleŋŋoolen áruŋul hani kukoobaak uke man akaanko úwoloorumaw wati Iburehima! 9Bee mo iñeme fúniiraf foofu di Atijamit bee epit kumuumak kati úbaaraw. Moo kaane, búbaar banoosani báwoleriitumi muria majake, pambubeti buleebi di sambunas.” 10No’onu jameeŋey yati bukanak di eceeŋumi, “Kama waa wúli oote ekaan?” 11Yaaya nalaañeniimi, “Oo abajumi uloa ugaba, wul kaaku abajutumi. Moo mákonam, oo abajumi muria poop wul mo abajutumi.” 12Kulaga basaaf poop kabilumi bee ekaan man kútiiguleniil di kommi, “Aliikitenaau, wúli waa noote ekaan?” 13Nalaañeniimi, “Takum jilag sígodi wuuj wan Kúroomanak kureguumi.” 14Ñaa kutiika poop di kuceeŋoomi, “Man wúli, waa noote ekaan?” Yaaya nalaañeniimi, “Takum jibot sígodi sati an di kánkum mba di balaaf. Jire di bacaamab booluul.” 15Bukanak di kulakomi ñátum kágolum, ban di kuwoonoor di úyegetiil, manteer Yaaya oo eenomi Apakenaau Áamakau. 16Yaaya nalaañeniimi búrom, “Nítiiguleneuutiigulen ñátum mumel, bare aatumi ebiley oo afaŋaam kánkum, ínje iŋotut bee efel unewaw wati usamataool. Oo pánatiigulenumuul Búyegetab Bátienaab di sambun. 17Káyonkulumaak koola koo naakenumi, bee kápajulak éfuley di muriam. Abanjaat pananen muriam di bulampanool, bare éfuley yoo panareemen di sambunas sáceteriitumi.” 18Ñaa di uruŋ wajuupoe, Yaaya nalakomi káriiŋen bukanak furimaf fajakaaf. 19Yaaya amakeenumi arungaau Herod mati naboteembot ayab Herodias, oo aseekau ati atiool, ban poop mati bújakaataab búrom ban akaaneenumi. 20Herod nalaañ abenenumi wafaŋumi man újakaatie búrom, moo eenomi nakammi Yaaya akuli dán bukanak kukuleimi. 21Funak fákon nan bukan kajuupoe kútiigulimi ban Yensa oo di fúko’ool poop átiigulimi. Nan alakomi elawey, bukinab bajakaab di búwambuli. 22Búyegetab Bátienaab di buwaloulomi bee di oo nan fumuum fati élaabaan, ban furim di fuwaloulomi di bukinab bajakaab man foone, “Au Añoolom ati búsusom, ban mooli músuumansuum máamak.” 23Nan Yensa ataatumi burokab bati Atijamit, nabajumi wáriiŋe simit kabanan di uñen. Yensa (namanjomanjo) añiilau ati Esufa, Esufa añiilau ati Heli. 24Heli añiilau ati Matat, Matat añiilau ati Lewi. Lewi añiilau ati Meleki, Meleki añiilau ati Yanne. Yanne añiilau ati Esufa, 25Esufa añiilau ati Matati, Matati añiilau ati Amos, Amos añiilau ati Nahum, Nahum añiilau ati Eseli, Eseli añiilau ati Naage, 26Naage añiilau ati Maat, Maat añiilau ati Matati, Matati añiilau ati Semein, Semein añiilau ati Yosek, Yosek añiilau ati Yoda. 27Yoda añiilau ati Yoanan, Yoanan añiilau ati Resa, Resa añiilau ati Jerubabel, Jerubabel añiilau ati Salatiel, Salatiel añiilau ati Neri, 28Neri añiilau ati Meleki, Meleki añiilau ati Adi, Adi añiilau ati Kosam, Kosam añiilau ati Elamadam, Elamadam añiilau ati Er, 29Er añiilau ati Yahosua, Yahosua añiilau ati Elieser, Elieser añiilau ati Yorim, Yorim añiilau ati Mataat, Mataat añiilau ati Lewi, 30Lewi añiilau ati Simeon, Simeon añiilau ati Yúda, Yúda añiilau ati Esufa, Esufa añiilau ati Yonam, Yonam añiilau ati Eliakim, 31Eliakim añiilau ati Melea, Melea añiilau ati Menna, Menna añiilau ati Matata, Matata añiilau ati Naatan, Naatan añiilau ati Dauda, 32Dauda añiilau ati Yese, Yese añiilau ati Yobed, Yobed añiilau ati Boas, Boas añiilau ati Salimon, Salimon añiilau ati Naason, 33Naason añiilau ati Amminadab, Amminadab añiilau ati Adumin, Adumin añiilau ati Aruni, Aruni añiilau ati Hesurom, Hesurom añiilau ati Pere, Pere añiilau ati Yúda, 34Yúda añiilau ati Yankuba, Yankuba añiilau ati Siyaaka, Siyaaka añiilau ati Iburehima, Iburehima añiilau ati Tera, Tera añiilau ati Nakor, 35Nakor añiilau ati Seruk, Seruk añiilau ati Ragau, Ragau añiilau ati Pelek, Pelek añiilau ati Eber, Eber añiilau ati Sala, 36Sala añiilau ati Kainam, Kainam añiilau ati Arefasad, Arefasad añiilau ati Sem, Sem añiilau ati Nuha, Nuha añiilau ati Lemek, 37Lemek añiilau ati Matusala, Matusala añiilau ati Enok, Enok añiilau ati Yeret, Yeret añiilau ati Malele’el, Malele’el añiilau ati Kainam, Kainam añiilau ati Enos, 38Enos añiilau ati Set, Set añiilau ati Adama, Adama añiilau ati Atijamit.

will be added

X\