LUUK 24

1Fati kajom di waradabaw, di funakaf futooŋandaf fati funoomaf kuseekak di kujawulomi bee di fuyaakaf di búsiifetab bati bubaliinab di mumelam maputemi súum man kujoonenumi. 2Di kutookumi fukoobaaf fácilimbenimi fulook fuyaakaf man fubakeni fulaañ bee di kapan kaaku lói fúnokenumaaf fati fo. 3Ñaa di kúnokendomi, bare kutookut biiŋab. 4Di wáaloiimi mati mo’omu. Yaŋ too galab kúniine kugaba di kurajiimi, kakaanoe wañ wátiene lec manteer uñiliñil. 5Kuseekak di kúkolimi di kúroogomi tentaam, ñaa kúniinaak di kuceeŋiimi, “Wau kaane di joom di eñes anau aroŋumi ban kacetumi kommi? 6Oo alee déere! Atijamit nayitenulo’ooyiten di kacetumi. Jiwoolo wan areguumi, nan alakomi di Galili, 7mati Añiilau ati anau koote esofool kusen di uñenaw wati kati majakutam mambi kufaaŋenool, ban di funakaf fúfeegintenaf naate káyitoumul di kacetumi.” 8Ñaa di kuwoolomi kurimak kan asankeniimi noo, 9ban di kulaañulomi di fuyaakaf, di kuregumi wabajomi búrom bee di kúriiŋenaool uñeney di ákonau di karinomi búrom. 10Kuseekak kajaweenumi koo eenomi Mariyaama ati Magadalen, Yoanna, Mariyaama Yankuba iñaayool, di kuseekak bukaaku ró. Di kuregumi kúriiŋenaak wabajoeenumi, 11bare di kaaniimi nan kuseekak kayesasoor koom di ko, ñaa kúyinenutiil. 12Manoosani, Peter nayito atey bee di fuyaakaf, náñup man álulen dó, bare najukumi kafulak kúboocinak cebuko. Alakomi ejaay bóot di wáalo’ool di wabajomiñaa. 13Di funakaf fo’ofu fákonaf di bajumi Yensa kuriibaool kugaba di kulakomi ejaay bee di ésukey yati Emmau yammi, wáriiŋe síkilomeetar uñen di yákon di Yerusalem, 14ban di kulakomi kámikak mati wabajumiñaa. 15Nan kulakomi ejaay di kámikak di móro, Yensa oo di fúko’ool nárajuliimi ban di kujawoorumi. 16Bare di bajumi wakammi man kúciliil kúsofaati mati oo. 17Yensa naceeŋiimi, “Waa jímikemiñaa jijaw di móro?” Di kujummi júd, di máboteni’iie. 18Ákon di bukoo kareesool Kuleopa, nalaañenoomi, “Au cebi eenomi ajaaburuŋ di Yerusalem ajamutumi wabajomi dó di kunakak uke?” 19Yensa naceeŋiimi, “Waa ubajoe dó?” Di kulaañenoomi, “Mati Yensa ati Nasaret, malegen oo akammi aboña abaje kánkum di kurimool di mukaanaool fácul Atijamit di bukanak búrom. 20Kúsimenaak kunifaanak kati Atijamit di kurungaak kóololi koo kusofoomi kusen mambi kubujool di ébaarey yati búpinab. 21Bare wúli núgolumeengolum mati oo aateenumi bee kapaken Isirael. Bare jaat baje kunak kúfeegiir nan mo’omu mubajomi. 22Manoosani, kuseekak kuceenak kati di fujojaf fóololi di kúkaanolimi man wáalo’oli. Di waradabaw kujajaw bee di fuyaakaf, 23bare kutookut dó biiŋool. Di kulaañumi di aaney mati kujukeenjuk di sáaut sati simaleeka sigaba sirajiimi saaniimi Yensa oomu bo man aroŋe. 24Kuceen di kalakomi di wúli di kujawumi bee di fuyaakaf, ban di kutookubomi wabajoe nan man kuseekak kuregumi eeno. Bare kujukut Yensa poop.” 25Yensa naaniimi, “Wáay káyiloutuñaa, ban kan úyegetuul úlebiñaa bee káyinen wan kuboñaak kati Atijamit kureguumi búrom! 26Mante jimanjut mati cenceeŋ man Apakenaau Áamakau agaal mo’omu bala’a anoken nanan noola nati mawuŋam moola?” 27Yensa ñaa náfasuliimi furimaf fati Atijamit búrom wan furegumi mati oo di fúko’ool, káŋarum síbukaas sati Muusa bee di sati kuboñaak búrom. 28Di kulofenumi ésukey yan kulakomi ejaay beet, di kaaniimi nan Yensa bee ewuuj fácul. 29Bare di kulawoomi man koonoomi, “Umooraal bee kajom, mati bala’ab bulolo.” Nájawudomi bee kalako di bukoo. 30Nan oo di bukoo kulakomi furi, naŋarumi fúmbuur fákon, nasalumi aban, natingufomi man acaabiil. 31Yaŋ too galab kúciliil di kúgaamulomi man kujukool. No’onu nájimimi to meej. 32Di kuregoorumi, “Mante goreneenutolaal sísigirolaal nan alakoñaa kasankenolaal di buruŋab, di káfasulolaalak furimaf fati Atijamit?” 33Nanan nikila di kuyitomi galab kulaañumi bee Yerusalem, dán kujukumi kúriiŋenaak kooni uñeney di ákonau di bukaaku kammi di bukoo. 34Di kooniimi, “Malegen Akiiyaau Yensa nayitouloyito di kacetumi. Mati narajuloraj Simon!” 35Kuriibaool kugabaak di kuregumi wabajiimi di buruŋab di poop man kúmanjumoomi eeno oo di etingey fúmbuuraf. 36Nan kulakomi eregey mati mo’omu, Yensa oo di fúko’ool najummi to titooriil, naaniimi, “Kásuumaayak kulako di muyuul.” 37Bare di kúkolimi búrom ban di úyegetiil di újiisoor máamak, di kusofumi mati asaay kujuke! 38Naceeŋiimi, “Wau kaane úyegetuul di újiisoor mo’omu? Wau kaane di joom kamanteer mati ínje? 39Jijiker uñenom di úkamunom, malegen ínje. Jigorom man jijuk, mati asaay ábajeriit eniil di wool nan man jijukammi man eenomi.” 40Nan asankenumi mo’omu aban, náyiiseniimi uñenool di úkamunool man kujuk. 41Kuŋoolenut kúyinen mati mo’omu mukaaniikaan kásuumaay káamak ban di wáaloiimi máamak, naaniimi, “Mante jibabaj taate muriaay?” 42Di kusenoomi jítingum jati ewol yaboli, 43nayabujomi aban natokoñ fáculiil. 44Naaniimi, “Waafaw uwe wabajomiñaa wan isankenuumi nan ilakomi di muyuul mati wanoosani waciikimi mati ínje kápurumul di sílingaas sati Muusa, di síbukaas sati kuboñaak kati Atijamit, di búkaay yati Jábuura woote káliroor.” 45Yensa náwambulumi úyegetiil man kúlaul furimaf fati Atijamit. 46Naaniimi, “Nan man kuciikumi eeno mati Apakenaau Áamakau aate egaal ban naate káyitoumul di kacetumi di funakaf fúfeegintenaf. 47Ban muyuul joote káriiŋen kurimak uke di kareesool bee di bukanak kati mofam mati dúniyaay búrom kápurum Yerusalem, man jooniil, ‘Jítiiwoor jikat bálamuk majakutam, moo Atijamit panabonket majakutuul.’ 48Muyuul kúyiisena mati wabajomi. 49Ínje di fúko’om panisenuul wan Ampaom aregumi panasenuul. Bare jilako baabe di ésukey yáamakey bee nampi kánkumak kuwaloulomi fatiya man kumeeŋenuul.” 50Yensa narungiimi manteer bee Betani, natebenumi uñenool nawuliil kásuumaay. 51Nan alakomi ewuliiley kásuumaayak, nakatoor di bukoo ban nájeetumimi bee di bukinab bajakaab. 52Di kúkuntaajenumi man kumiiceelaetool ban di kulaañumi bee Yerusalem di kásuumaay káamak, 53ban di kurulenumi kalako di fukobaf fáamakaf esaley Atijamit.

will be added

X\