LUUK 23

1Jameeŋey yati bukanak búromiil di eyitomi, eruu Yensa bee di bújonlenab bati Pilat. 2Di kutooŋumi elaafooley man kommi, “Nutotook ániinaau ume oo di étiiwey úyegetaw wati bukanak kati mofam móololi di poop naane wúli takum ucaam basaafab Áyiau Áamakau. Oo poop naane Apakenaau Áamakau, oo áyi.” 3Pilat naceeŋoomi, “Mante au eenomi áyiau ati Kúyahuudak?” Yensa nalaañenoomi, “Au urege mo.” 4Pilat najonlenumi kúsimenaak kunifaanak kati Atijamit di jameeŋey man ammi, “Ínje ijukut búlaput di ániinaau ume.” 5Bukoo efaŋ man kumingene lit, di aaney, “Bare oo ammi di ekaaney kayiten káguuloor banoosani di mofam búrom mati Yúdea, kápurumul Galili manteer kuyahoor Yerusalem fúkoudo!” 6Nan Pilat ajamumomi, naceeŋumi manteer ániinaau ati Galili. 7Nan kumanjumi mati oo ati di búrungumab bati Herod naam, ñaa Pilat naboñiimi kújeetum Yensa bee bati Herod, nanan nikila oo di fúko’ool nalakomi di Yerusalem. 8Herod di súumoomi máamak nan ajukumi Yensa, mati naliimeenliim bee ejukool. Mati najameenejam man kusankene moola, nalakoeene kágolum bee ejuk tan akaane wajamurerutimi. 9Ñaa naceeŋoomi kúceeŋ kajuupoe, bare Yensa alaañenutool. 10Kúsimenaak kunifaanak kati Atijamit di kuliikitenaak kati sílingaas di kujuumutomi man kulako kataakenool di kánkum káamak. 11Herod di kutiikaool di kukaanool jiteni ban di kúnarulool. Di kukarenoomi kaloa kajake, ban di kulaañenool baabu di Pilat. 12Di funakaf fukila Herod di Pilat di kusofoorumi bapaalaay, handeneen man kulakoeenumi bukan kalatoore noo. 13Pilat nawonkumi tákon kúsimenaak kunifaanak kati Atijamit di kurungaak kuceenak di Kúyahuudak kuceenak. 14Naaniimi, “Muyuul jíjeetumulomi ániinaau ume bee di ínje man joone oo ammi di étiiwey úyegetaw wati bukanak. Niceeŋooceeŋ iban fáculuul, ban ijukut waaf wan ániinaau ume akajene di wan jílaafumoomi. 15Hani Herod di fúko’ool ajukutumo, mati náboñulool bee wulaal. Jíyenten, ániinaau akaanut waaf wajakut wáriiŋe man ubujaalool. 16Moo kaane panikaan man kukurool ban nikatenool man ajaw.” 17Iñeme naate kakaten ániine ákon bee di bukoo di káaningak. 18Bare bukoo búromiil di kucibuloorumi síñakon, “Buj ániinaau umu, núkatenoli Baraba!” 19Baraba an kukuleneenumi dán bukanak kukuleimi mati káguuloorak kan ayitenulomi di ésukey yáamakey di mati jabuj jan akammi. 20Pilat nalaañumi asankeniil mati namammaŋ kakaten Yensa. 21Bare di kulakomi kacibuloorak man kommi, “Faaŋenool! Faaŋenool! Faaŋenool!” 22Di káfeeginten naceeŋiimi, “Bare wau? Bújakaataab bei nakaane? Ijukut di oo wan akajene wan aate ebuji. Moo kaane, panikaan man kukurool ban nikatenool ajaw.” 23Bare jameeŋey yati bukanak elinliim di emingen di kakaabuloorak ró máamak man aate kafaaŋeni. Burigoorab booliil di buliimool píw. 24Di múlamukaam, Pilat nasenumi buruŋ wan kumaŋumi eeno. 25Nakatenumi ániinaau an kuceeŋumi, an akulimi dán bukanak kukuleimi mati káguuloorak kan ayitenulomi di ebujey yan akammi. Bare Yensa, oo Pilat asene man kubuj nan man kumaŋumi eeno. 26Nan kulakomi kájeetumoolak kápurumul bati Pilat, di kúkamboorumi di aceen an koonemi Simon ati Kurene, alakomi bóotul di karamba. Di kumingenoomi man arooko ébaarey yati búpinab man ajaw nariiben Yensa. 27Di bajumi jameeŋey yati bukanak yalakomi kariibenoolak, bukoo di kuseek kalakoe búruuren di kagamoor. 28Bare Yensa nátiiwoorumi bee di bukoo man ammi, “Kuseek kati Yerusalem, takum jíruuren mati ínje, bare jíruuren mati kúkouul di mati kuñooluul. 29Kunakak pánkuriiŋul nampi kommi, ‘Kamanjutumi fufaan, kabajurerutumi kuñiil ban di kiilak karaafenderutumi, malegen jakiijak!’ 30No’onu pankoone kúlankiinak, ‘Jíloul títi di wúli!’, ban di koone kuremboorak, ‘Jífokenoli.’ 31Mati kukaanjaat mo’omu nan fúbaar fujinlenumi, waa koote ekaan nampi fusayumi?” 32Kúniine kuceen kugaba poop, kálaputumi, di kújeetumimi man kufaaŋeniil kubuj tín tákon di Yensa. 33Nan kúriiŋumi tan koonemi Golugota, too kufaaŋenool di kúlaputaak, ákon báridool, aamu bamayool. 34Yensa nammi, “Ampaom, bonketiil, mati koo kumanjut wan kommi di ekaaney.” Ban di kukammi bulukoor bee kacaaboorak wañool. 35Bukanak di kujuumutomi man kommi di kajikeroolak. Bare kurungaak di kulako kánarulool, di kommi, “Napakempaken bukaaku. Kama apakenooro fúko’ool, kaanjaat o’omu Apakenaau Áamakau ati Atijamit, An Atijamit Aanumi Pánaboñul.” 36Kutiikaak poop di kulako káhaarulool, di kulofoomi kusenoomi binegar, 37di aaney, “Kaanjaat au áyiau ati Kúyahuudak, pakenooro fúkoi!” 38Di bajumi poop too fatiyena fúkaaf foola kuciciik to, “Ume áyiau ati Kúyahuudak.” 39Ákon di kálaputumi an kufaaŋenooriimi too di oo, nalakomi ejelool, “Lee au Apakenaau Áamakau? Pakenooro ban núpakenoli!” 40Bare aamu namakoomi, “Mante úkoliut Atijamit, biñoo nan au di akila kútekak kákonak jommi di eyabey? 41Wulaal cenceeŋ man ubajaal ko mati wan ukaanaami, bare ániinaau umu akaanderut waaf.” 42Nammi, “Yensa, woolo’om nampi ulaañulomi di jáyiaj jooli.” 43Yensa nalaañenoomi, “Ínje eregi malegenam, jaat panulako di ínje di bukinab bajakaab bati Atijamit.” 44No’onu kankaan kajuum balaraay, ñaa di rímmi túk fímenumi mofam mukila búrom, manteer bee mo sirig sooni sífeegiir. 45Bala’ab balet, ban kafulak káamakak káyinimi fatiyaay di síndeneey yati fukobaf fáñiiaaf di kujisomi fac titoorey. 46Ñaa Yensa nacibulomi, “Ampaom, ínje oomu di enen yuutom di kañeni!” Nan aregumi mo’omu aban nañak lár. 47Nan arungaau ati kutiikaak Kúroomanak ajukumi wabajomi, nalakomi esal Atijamit man ammi, “Malegenam ániinaau o’omu akaanut waaf!” 48Nan jameeŋey yati bukanak búrom yajojutomi bee ejukey wabajomi, di kulakomi élaañuley bóot di enagey ró bóteni úsusiil. 49Bare Yensa kupaalool, di kuseekak káriibenuloomi kápurumul Galili, di kújummi lói man kommi di kajikerak. 50Di bajumi ániine an koonemi Esufa, oo ati ésukey yati Arimate yati Yúdea. Oo nababaj búyeget ban najoon, handeneen oo ákon di fugamenaf fáamakaf, 51nalatumi wan kupaalool kati di fujuumaf kusofumi di wan kukammi. Nalakolako ekob mambi ajuk nei jáyiaj jati Atijamit joote ériiŋul. 52Ániinaau umu najawumi bee di Pilat man alawoomi mambi asenool biiŋab bati Yensa. 53Ban nakammi man kúwalenuubo di ébaarey yati búpinab man aguububomi di jíboocin. Nájeetumubomi áfintendomi di fuyaak facemeenimi di fúlankiin dán kufokurerut an. 54Funak fo’ofu foo eenomi fati Kajonjoorak, funakaf fati kálebienak falakomi etooŋey. 55Kuseekak kan kuriibooruloeenumi di Yensa kápurum Galili di kujawumi di Esufa ban di kujukumi fuyaakaf man biiŋool bufintenimi eeno. 56Di kulaañumi bóot manti kujoonen búsiifetab bati bubaliinab di mumelam maputemi súum. Funakaf fati kálebienak di kuyoolomi nan man sílingaas siregumi.

will be added

X\