LUUK 22

1No’onu káaningak kati Mbúur Yabajutumi Múliitenuma, kan koonemi poop káaningak kati Ewuujey yati Njalayiri di kulako éloful. 2Kúsimenaak kunifaanak kati Atijamit di kuliikitenaak kati sílingaas di kulakomi eñes mampi kubuj Yensa ñátum kutunt, mati kúkolikoli jameeŋey yati bukanak. 3Seetaanaay di esof Yúdas an kuwonkemi poop Isikariot, ákon di kúriiŋenaak uñeney di kugabaak kati Yensa. 4Yúdas najawumi man kusanken di kúsimenaak kunifaanak kati Atijamit di kupooyaak kati di fukobaf fáamakaf mampi ápurumi akaan man kusof Yensa. 5Di súumiimi máamak ban di kúligoomi mati ecaamool sígodi. 6Yúdas namaŋumi ban nalakomi eñes buruŋ tampi ápurumi akaan man kusof Yensa jameeŋey balee to. 7Bala’ab bati káaningak kati Mbúur Yabajutumi Múliitenuma búrindiiŋ, nan kootumi káraamulak jisahaaj jati búsimenab bati Ewuujey yati Njalayiri. 8Yensa naboñumi Peter di Yohan man aaniimi, “Jijaw man jicookoor furiaf fati káaningak kati Ewuujey yati Njalayiri bee mati wulaal, mambi jilakoaal tákon man uriaal.” 9Di kuceeŋoomi, “Ujaw ucookooruko bei?” 10Nalaañeniimi, “Nampi jinokenumi ésukey yáamakey, pánjikamboor di ániine arookoe kárumba kati mumel. Jiriibenool bee di eluupey yampi anokenumi, 11man joon ati eluupey, ‘Aliikitenaau aceeŋumi, kalimbisak kan oo di kuriibaool kootumi furiaf fati karuukenak kati káaningak kati Ewuujey yati Njalayiri kookei?’ 12Pánayiisuul fatiyena kalimbis kawuŋe kacookoori kuban wan umaŋaami bee ekaaney búrom. Dóo panjicookoorumi wanoosani.” 13Di kujawumi kúriiŋubo, di kutookumi waafaw búrom nan man aregeeniimi eeno. Ñaa di kucookoorubomi káaningak. 14Nan ríiŋumi, Yensa di kúriiŋenaool di kulakomi man kuri káliimenak. 15Yensa naaniimi, “Ínje nimammaŋ máamak furi tákon di muyuul káaningak uke bala’a bugaalab búmboom búriiŋ. 16Mati ínje eem di ereguul, letilaañ irirer ko bee nampi wakilumi man kubajo ukaan dóo di jáyiaj jati Atijamit.” 17Naŋarumi éraanuma, ban nan asalumi aban nammi, “Jiyab uye man jiraanoor. 18Ínje eem di ereguul mati káŋarum funakaf fati jaat ínje letilaañ iraander wayin bee nampi jáyiaj jati Atijamit jíriiŋul.” 19Naŋarumi fúmbuur, nan asalumi aban namiinufomi aseniimi, di aaney, “Ure eniilom yasenimi bee di muyuul. Jikaan mo’omu mambi jiwoolo’om.” 20Moo mákonam, nan kurimi káliimenak kuban naŋarumi éraanumaay, di aaney, “Ure fúsimom, fáyuimi bee mati muyuul. Ñátum di fo Atijamit nakaan kasofoorak koola kunkulak.” 21Bare ániinaau pánapur di ínje, oo ammi nuriooraale dákon! 22Mati Añiilau ati anau panajaw nan man Atijamit asofumi eeno. Bare búyiikab bulako di ániinaau akila aatumi épur bee ekaaney man kusofool!” 23Di kutaatumi kaceeŋoorak, ai di bukoo aatumi bee ekaan mo’omu. 24Kañoosoor di kuyitomi titooriil bee emanj ai di bukoo aatumi efaŋ man akaane an áamak. 25Yensa naaniimi, “Kúyiak kati kákoberiitumi Atijamit kurungerung bukanak di kánkum, ban kurungaak pankuwonkooro kukaana majake. 26Bare jootut ekaan mo’omu di muyuul, afaŋumi muyuul naate ekaan nan oo afaŋe man atiitie, di poop áfaculaau naate ekaan nan amiiceelau. 27Ai afaŋe man akaane an áamak, alakomi akob man kútiŋenulool mba atiŋenaau? Mante let oo alakomi akob man kútiŋenulool? Bare ínje oome di muyuul nan atiŋena. 28“Muyuul kariibeneammi tanootani nan ilakomi di mátaañiaam. 29Nan man Ampaom asenammi jáyi, ínje isenuul fujuum fati búrungumab bati jáyiaj, 30mambi jiri di jiraan tín tákon di ínje dóo di jáyiaj júmboom. Panikaanuul man jilako sijunkutas sati jáyiaj, kagamenak kiilak uñeney di kugabaak kati Isirael.” 31Akiiyaau Yensa nammi, “Simon, Simon! Jantenom, Seetaanaay ebabaj buruŋ bati eyinkuul búrom, nan man anau áyonkulemi éful yati busereŋ. 32Bare nilalaw kúlaw mati au, Simon, mambi kafiumak kooli takum kukaño. Nampi ulaañulomi bee di ínje inki, núliŋen úyegetaw wati kupaali kuriiba.” 33Peter naanoomi, “Arungaau, ínje nijonjoojonjoor man ijaw di au hani bee tampi kukulimi pánkukulom to, ban tampi kubujimi pankubujom to!” 34Yensa nammi, “Peter, ínje eregi waaf. Fukaf fo’ofu fati jaat kéenak leekulit, au bañoosut ñooni ñáfeegiir mati numanjammanj.” 35Yensa naaniimi, “Nan iboñuumi basenut jimaka jíkaanuma sígodi, mba ejonkonkoroŋ, mba usamati, waa jibajeenut?” Di koonoomi, “Hani waaf.” 36Naaniimi, “Bare iñeme, anoosani abajumi jimaka jíkaanuma sígodi nájeetum, moo poop abajumi ejonkonkoroŋ naŋar. Ampi abajutumi jiliba jabaake nanoomen wañool man ánoomul jo. 37Mati ínje eem di ereguul, wan kuregumi di furimaf fati Atijamit mati ínje woote kabajo: ‘Kupinoopin di kúlaputaak.’ Wanoosani waciikimi di fo mati ínje panukaan malegen.” 38Kuriibaool di kulaañenoomi, “Arungaau, jiker, muliba mugaba mabaake moome taate.” Yensa naaniimi, “Jikatubo.” 39Nan Yensa ápurulomi Yerusalem najaw nan man apiimi bee fatiyaay yati Furembooraf fati Uwoliiw, ban kuriibaool poop di kuriibenool. 40Nan kúriiŋubomi naaniimi, “Jilaw takum Seetaanaay eŋoolen étiiwuul.” 41Napummi áñaalo jayiinkun, ban nákuntaajen man alako elawey Atijamit, 42“Ampaom, umaŋujaat nure’eten éraanumaay uye yati búyiikab di ínje. Takum wan imaŋumi mbi ukaan, bare wan umaŋumi mbi ukaan.” 43Di bajumi maleeka yati bukinab bajakaab di erajulomi bee mati esenool kánkum. 44Man búyegetab boola bújiisoorumi nafaŋumi man alawe di kánkum máamak. Ejeenaay yoola di esot tentaam nan fúsim. 45Nan alawumi aban nayitomi ban nalaañumi bee di kuriibaool, tiatookiimi man kúmoorie kúlaamolaamo ñátum káboteni’iilak. 46Naaniimi, “Kama wau kaane di joom di kámoori? Jiyito man jilaw takum Seetaanaay eŋoolen étiiwuul.” 47Nan Yensa alakomi kasankenak, di bajumi jameeŋ yáriiŋulo, yan an koonemi Yúdas arungulotomi, an umanje ákon di kúriiŋenaool uñeney di kugabaak. Nabilumi man alof Yensa bee ecuufool. 48Bare Yensa naanoomi, “Yúdas, mante di ecuufomey nootumi épurey di ekaan man kusof Añiilau ati anau?” 49Nan kúriiŋena bukaaku kalakomi di oo kujukumi waatumi kabajoak di kommi, “Arungaau, mante wúli útiikenumiil di mulibaam mabaakaam?” 50Ákon di bukoo nanagumi amiiceelau ati ásimenaau áamakau ati Atijamit ban nacanumi kawosak kúridak koola. 51Bare Yensa nammi, “Jikat! Takum jikaanderumo.” Ban nagorumi kawosak koola man yaŋ kukoy. 52Yensa nasankenumi kúsimenaak kunifaanak kati Atijamit, di kupooyaak, di kurungaak kati fukobaf fáamakaf, di Kúyahuudak kunifaanak, kajawulomi esofooley, naceeŋumi, “Mante ínje álaputa di muyuul, an jibilumi bee esofomey di muliba mabaake di simooŋ? 53Balayoobalay, nilakoelako kaliikitenuul dóo di fukobaf fáamakaf, ban jiliikut esofom. Bare nanan une noo jisofumi kánkumak kati érimey koom di burokuko.” 54Di kusofumi Yensa ban di kújeetumoomi bee di síndeey yati ásimenaau áamakau ati Atijamit. Peter nalako ébuuyul nariib bálamuk lói bo. 55Di kuyabenumi sambun di titoorey yati fankaf man kulakomi kuŋomenuso. Peter nalako kulaoor to, 56ñaa di bajumi amiiceel ajaŋa aceen ajukoomi. Nalakomi di mawuŋam mati sambunas ajikeroomi káw aban, nammi, “Malegen ániinaau umu poop oomueen di oo.” 57Bare Peter nañoosumi, di aaney, “Jaŋa, ínje imanjutool!” 58Piyout mo’omu di bajumi an aceen ajukool ban nammi, “Au poop ákon di bukoo!” Bare Peter nalaañenoomi, “A’a, ániinaau, ínje let!” 59Nan wuujutomi walofe erigooraay erig yákon aamu asofumi lit, man aane, “Malegenam ániinaau o’omu poop oomueen di oo, mati oo ati Galili!” 60Bare Peter nammi, “Ániinaau, ínje imanjut wan usankeneñaa.” Nan alakomi kasankenak mo’omu ceb, kéenak di kulitumi yaŋ too galab. 61Akiiyaau Yensa nátiiwoorumi ajiker Peter káw. Peter nawoolomi mati Akiiyaau wan aregeenoomi, man aaneenoomi, “Fukaf fo’ofu, bala’a kéenak kulit, panuñoosom ñáfeegiir man oon umanjutom.” 62Peter nápurulomi bee téeŋey, ban náruuren manteer alikij. 63Kutiikaak kupooyaak kalakomi kapooy Yensa di kúnaruloomi ban di kutekoomi. 64Di kúmiipoomi poop ban di kuceeŋoomi, “Au aboñaau! Régoli ai atekiñaa?” 65Di kujeloomi ujel uceen wanoosani. 66Di erabey yati bala’ab, kunifaanak kati Kúyahuudak kunifaanak di kujojumi di kúsimenaak kunifaanak kati Atijamit, di kuliikitenaak kati sílingaas. Di kújeetumulomi Yensa fácul fugamenaf fáamakaf man kugamenool, man koone, 67“Régoli, kaanjaat au Apakenaau Áamakau.” Bare Yensa nalaañeniimi, “Ireguujaat, léejiyinenom, 68ban iceeŋuujaat, leejilaañenom. 69Bare káŋarum iñeme Añiilau ati anau panalako di báridab bati Atijamit ati Kánkum.” 70Koo búrom di kommi, “Mante ñaa au Añiilau ati Atijamit?” Nalaañeniimi, “Muyuul jirege ínje.” 71Di kommi, “Kama ñaa káyiisen kei nukobaale di ko? Wulaal di kúko’olaal nujamaajam di butumool!”

will be added

X\