LUUK 21

1Yensa nakooñammi kubaja bukaaku man kommi eseney yati kawulak kooliil di jiceesaj. 2Najukumi aseek aceen ati ájima abajutumi nákatendo sígodi sileputa sigaba. 3Nammi, “Ínje eem di ereguul malegen, aseekau ati ájimaau o’omu abajutumi wan ákatendomi ufaŋe wan bukaaku karinomi kúkatendomi. 4Mati bukaaku búrom kúkankando kawuliil kapan di wajuupoaaw wan kubajumi búrom, bare oo di kábajaataak koola nákankando wan abajumi búrom bee mati eroŋey yoola.” 5Kuriiba kuceen kulakolako kasankenak mati kukoobaak kajoŋooraak kan fukobaf fáamakaf futeepimi di kawulak kanenimi dó. Bare Yensa nammi, 6“Uru ran jijukeñaa, kunak pánkuriiŋ nan rootut karino to manteer hani ekooba leterembeni di epaaluyo.” 7Di kuceeŋoomi, “Aliikitenaau, noonei uru búrom eete kabajo? Fúmanjumaf fei noote ejuk nampi funakaf fan uru rootumi kabajoak fúriiŋumi?” 8Yensa nalaañenumi, “Jíkaanum, takum jimaŋ man an abuntuul. Mati kajuupoe pánkujawumul di kareesom, di aaney, ‘Oo ínje!’ ban ‘funak fúrindiiŋ!’ bare takum jifiumiil man jiriibeniil. 9Nampi jijammi koone bukan bukooku di futiik di kuceen, di koone bukan kuceen kuyitoyito kujuumoor di kurungaak kooliil, takum jíkoli. Mati waafaw uwe woote emond ubajo, bare lee yaŋ ebaney yati dúniyaay ériiŋe.” 10Narulenumi man aaniil, “Mof pammutiiken mupaalumo mof, jáyi panjitiiken jipaalujo jáyi. 11Pambaj káliliŋenoor kati yentaam káamak, ban bacaar báamak di járus yati úsumut wátipoore banoosani. Pambaj búyiik bákoolenie di kúmanjum káamak kaate kápurumul bukinab bajakaab. 12Bare bala’a mo’omu búrom mubajo bukanak pankusofuul, pánkusuutukenuul, pankusenuul kagamen di kukobak di siluupas dán bukanak kukuleimi. Pankuruu’uul bee di bújonlenab bati kúyi di kunifaan kati mofam mati muyuul kuriibaom. 13Mo’ome moo pammukammi ebajey buruŋab booluul man jiregiil malegenam mati ínje. 14Jibeben úyegetuul, takum kaanuul síwoonoor mampi jootumi kalaañen, 15mati ínje eete esenuul kurim kati malinlo man kulatooruul hani ákon letaŋoolen alatuul mba añoosuul! 16Hani kuwolauul, di kútumbeuul di kutiuul, di kukilooruul, di kupaaluul pankusofuul kusen kuceen di muyuul pankubujiil. 17Bukanak búrom pankulatuul mati muyuul kuriibaom. 18Bare hani kal kákon léekujim. 19Jijuum líŋ, mo’omu jootumi ebajey eroŋey elegeney. 20“Bare nampi jijukumi man kutiika kuŋoobene Yerusalem, ñaa di jimanj mati kunakak kati kakajenak kooliyo kulolof. 21Ñaa kammi di mofam mati Yúdea koote etey kuyofo di kúlankiinak. Kammi dóo di Yerusalem koote épur ban poop kammi di urambaaw takum kunoken bee dó. 22Mati doo eenomi kunak kati kúnag man wan kuciikumi di furimaf fati Atijamit úliroor. 23Di kunakak ko’oku, búyiikab bulako di kuseek kaakumi úrookaaw di kuseek kammi di karaafenak! Mati bukanak kammi di mofam ume, pankubaj bugaal báamak ban Atijamit pánayiisen féenaaf foola bukanak buke. 24Kulatooriil pankubuj bukaaku jákaati ñátum mulibaam mabaakaam, ban pankusof bukaaku kújeetumiil bee di mofam múbuto mati dúniyaay búrom. Kamanjutumi Atijamit pankukajen Yerusalem jaj bee nampi kunakak kooliil kúliroor.” 25“Pambaj kúmanjum di bala’ab, jileeŋaj, di bootab, ban yentaamey, di úyegetaw wati bukanak kati mofam mati dúniyaay búrom pánujiisoor, mati kasuuŋutak kati falaf di mati kagalaboorak kati lonkosey. 26Saalas sati bukanak pansijisi cúc manteer kutundo mati kawoonoorak kati waatumi bee kabajoak di dúniyaay. Wánkumaw wammi di fatiya pánuliliŋeni. 27Bukanak pankujuk Añiilau ati anau pánariiŋul di furola di kánkum káamak di mawuŋ mati Atijamit di móro. 28Nampi waafaw uwe búrom utooŋumi kabajoak, jiteben kúkaak lóog man jiluen fatiya, mati epakey yooluul elolof.” 29Yensa naregiimi kúregak uke: “Jijiker búpunduun mba búbaar buceen. 30Nampi bulakomi ereebey ceb, muyuul di kúkouul di jijuk ban di jimanj mati súm fujamaf fulofulolof. 31Moo poop, nampi jijukumi uru ran iregumi man ribajoe, di jimanj mati jáyiaj jati Atijamit jilofulolof. 32Ínje eem di ereguul malegenam, bukanak kati jaat leekucet uru búrom babajout. 33Fatiya di tentaam pánsijim, bare kurimom léekujimurer. 34“Jíkaanum, takum jikat úyegetuul man úlebi mati káfaafenak, di kákaliak, di síwoonooras sati eroŋey uye. Kaanutumojaat, funakaf fan Añiilau ati anau aatumi élaañuley, pánfuriiŋul kutunt di muyuul nan fakum. 35Mati funakaf panfumeep anoosani ammi di dúniyaay nan fakum. 36Bare takum jíwaayen nanoosani, jilaw mambi jibaj kánkumak kati epakey di waatumi kabajoak, man jijuum di bújonlenab bati Añiilau ati anau.” 37Balayoobalay Yensa nalakoelako kaliikiten dóo di fukobaf fáamakaf fati Atijamit, bare káliimookaliim ninsi nalaañumi bee di Furembooraf fati Uwoliiw tiamoorubo. 38Bújomaraay pím, bukanak búrom di kubilumi bee di oo di fukobaf fáamakaf fati Atijamit bee káyentenoolak.

will be added

X\