LUUK 20

1Funak fákon nan Yensa alakomi kaliikiten bukanak dóo di fukobaf fáamakaf di poop nalakomi káriiŋeniil furimaf fajakaaf, kúsimenaak kunifaanak kati Atijamit di kuliikitenaak kati sílingaas, di Kúyahuud kunifaan kuceen koo dó 2ban di kuceeŋoomi, “Régoli di fujuum fei noom di ekaan uru? Ai aseni fujuumaf ufe?” 3Nalaañeniimi, “Ínje poop paniceeŋuul kúceeŋ kákon pat, man jilaañenom. 4Man Yaaya átiigulenumi bukanak, ai asenoomi fujuum fukila mante Atijamit mba bukan?” 5Di kulakomi kamaloor titooriil di kommi, “Oonaajaat Atijamit asenoomi fo, panaceeŋolaal wau kaane úyinenutool. 6Bare oonaajaat bukan kusenoomi fo, bukanak pankuleebolaal sikooba, mati koo tíeniitien Yaaya oo aboña ati Atijamit.” 7Ñaa di kulaañenumi mati kumanjut ai asenoomi fujuum fukila. 8Yensa naaniimi, “Iyoo! Kama ínje letireguul ai asenaam fujuumaf ufe man ikaan uru.” 9Yensa najonlenumi di bukanak man aregiimi kúregak uke: “Bajeembaj ániine aceen asuwene ureseŋ di kafatool, ban nabilenuko di uñen wati kuwaña kuceen man kucookoor mambi kucaaboor muriaam, aban najawumi kajaaburuŋ di mof muceen simit sipinaay. 10Nan muriaam maalumi, naboñumi amiiceelool ákon bee di kuwañaak kabilenikomi bee éyabul bucaabool bati muriaam di kafatak. Bare kuwañaak kukila di kutekoomi, ban di kucesooroomi alaañ uñen útiikaar. 11Nalaañumi aboñ amiiceel aceen. Oo poop di kutekoomi kuban di kujeloomi, ban di kucesooroomi alaañ uñen útiikaar. 12Nalaañumi áboñul áfeegintenau, o’omu di kúbukenoomi ban di kuleebool téeŋey. 13Akilumi kafatak naanooromi, ‘Waa neete ekaan? Paniboñ añoolom ati búsusom. Oo tikere pánkuyentenool.’ 14Bare nan kuwañaak kabilenikomi kuŋandenulomi añoolool, di kulako kamaloor titoorey, man kommi, ‘Ume oo aatumi bee ekiley bulaañab. Ubujaalool dak, mambi ukilaal ko.’ 15Di kubetenoomi téeŋey yati kafatak ban di kubujoobomi dak. Waa ñaa akilumi kafatak panakaaniil? 16Panabil abuj kuwañaak kukila kabilenimi kafatak koola ban nasen kafatak bukan kuceen.” Nan kujammi mo’omu, di kommi, “Emitey ekaan Atijamit are’eten mo lói!” 17Bare Yensa najikeriimi káw nammi, “Waa ñaa, furimaf ufe fati Atijamit fufelumi: ‘Fukoobaaf fo’ofu fan kuteepaak kulateenumi foo fulaañumi fulako di égooleney yasofumi líŋ kukukak kati eluupey’ 18Anoosani ampi alomi di fukoobaaf fukila panfutujerool jarak. Foo fulojaat di an, panfunokosool nakas.” 19Nan kuliikitenaak kati sílingaas di kúsimenaak kunifaanak kati Atijamit di fukobaf fáamakaf kujammi kúregak uke, di kuñes bee esofool to mati kumammanj mati kúregak uke Yensa koo narege. Bare kúkolikoli mati bukanak. 20Ñaa kulakolako kakooñaamool, ban di kuboñumi bukan kakammi kúkoiil nan bukan kajoone. Di kuboñiimi bee esof Yensa to ñátum di eceeŋ di kuwok di malinlo mambi kusofool kusen anifaanau ati mofam afaŋumi man abaje kánkum. 21Di koonoomi, “Aliikitenaau, wúli numammanj mati wan uregeñaa di wan uliikiteneñaa malegen. Au újawumeriit di kawoonoorak kati an, bare di malegenam nuliikitenemi buruŋab bati Atijamit. 22Régoli, mante sílingaas soololaal sisenolaasen buruŋ bati esen basaafab jáyiaj jati Áyiau Áamakau ati Róoma mba sisenut?” 23Yensa najukumi malinlaam mooliil mati bújakaataab naaniimi, 24“Jíyiisom edenaari. Ai buulool di karees kei koom to?” Di koonoomi, “Kati Áyiau Áamakau.” 25Yensa naaniimi, “Kama joote kalaañen Áyiau Áamakau wan akilumi ban joote kalaañen bee di Atijamit wan akilumi.” 26Ñaa kuŋoolenut kubaj mampi kúsofumool di wan alakomi eregey fáculey yati bukanak. Di wáaloiimi mati kalaañenak koola, di kutuntenumi sii. 27Kusadusi kupinaay di kubilumi bati Yensa di kommi mati bajut káyitoulak di kacetumi. 28Di kuceeŋumi kúceeŋ kákon, di aaney, “Aliikitenaau, aboñaau Muusa aciike élingaay uye bee di wulaal mati ániine acetujaat, akatubo aseekool ban abajut añiil, atiool aate kálaañenul aseekau man koote ebaj añiil bee di ájimmi. 29Di bajumi kutiaay kooni futok di kugaba. Átiyaarau nayabumi aseek, ban nacet babajut añiil. 30Agabuntenau 31di áfeegintenau koo poop di kulaañen aseekau, ban koo búrom di kucetumi babajut añiil. Bukoo futokey di kugabaak moo kulaañenoomi, ban di kucetumi búromiil babajut añiil. 32Di múlamukaam, aseekau poop nabilumi acet. 33Régoli, nampi Atijamit áyitenoulomi bukanak di ecetey, aseekau ai aatumi ekaaney ataool? Mati kooni futokey di kugabaak poopiil kuyabeenooyab.” 34Yensa nalaañeniimi, “Bukanak kati iñeme kuyabooreyaboor. 35Bare kabajumi fúkaw man kúyitoul di kacetumi ban di kuroŋ di nanan nábileuumi, leekuyaboor, 36ban leekuceturer mati pankoono nan simaleeka. Bukoo kuñiil kati Atijamit, mati pánkuyitoul di kacetumi bee di eroŋey yunkuley. 37Bare mati kacetumi koote káyitoul hani Muusa náyiiseneenyiisen mo nan aciikumi mati jijofaaj. Nawonwonk Akiiyaau, ‘Atijamit an Iburehima, di Siyaaka, di Yankuba kumiiceelaetumi.’ 38Atijamit lee Atijamit ati kacetumi, bare ati karoŋumi ceb. Mati di oo hani kaceteenumi kurondoŋ.” 39Ban kuliikitena kupinaay kati sílingaas di kulaañenumi, “Aliikitenaau, nusankensanken jak!” 40Mati úyegetiil urumut elaañey kuceeŋ kúceeŋ kuceen inki. 41Yensa naceeŋiimi, “Buu bukanak pankuŋoolen kureg mati Apakenaau Áamakau panakaan búbajum bíine bati Dauda? 42Mati Dauda di fúko’ool narereg di búkaay yati Jábuura, ‘Atijamit Akiiyaolaal narereg Akiiyaom, Lako di báridom, 43bee nampi ikammi kulatoori fútobojumaaf fati úkamuni.’ 44Nan Dauda awonkeoomi Akiiyaool, kama ñaa buu naŋoolene akaan búbajumool bíine eeno?” 45Nan bukanak búrom kulakomi di káyentenoolak to, Yensa nammi kuriibaool, 46“Jíkaanum, kuliikitenaak kati sílingaas, kamaŋemi kakaano uloa wáamak man kujaatoor ban kumaŋemaŋ bukanak man kusaafiil di uñen ugaba di weelumaw. Kumaŋemaŋ mansi kulako fácul di kulakaak kafaŋumi man kujake man kuraj. Di poop kumaŋemaŋ kulako di kulakaak kafaŋumi man kúlebiene di wáaningaw. 47Bare kuguuñeguuñ waaf wati kuseek kati kújima, ban di kulaw baak Atijamit man kukaanalenoor nan bukan kajoone! Pánkuyabul kúnagak kafaŋumi man kúkalaae.”

will be added

X\