LUUK 2

1Di kunak kukila Áyiau Áamakau Augosut ati mofam mati Róoma nasen buruŋab bati epin bukanak kati mofam mukila búrom. 2Nan epiney yátiyaaraay yati bukanak ekaanimi, Kurenis oo alakomi anifaanau ati mofam mati Siria. 3Anoosani najajaw bee di ésukey yati kufannaaniŋool bee mati epiney yati bukanak. 4Esufa poop nápurumulomi Nasaret yati Galili, ajaw bee Betelehem yati Yúdea. Ésukey yáamakey ekila boo áyiau Dauda awolimi. Esufa najawumi bee bo mati oo di fiilaf fati áyiau Dauda nápurumulomi. 5Najawubomi man kuciik ureesaw wati oo di Mariyaama, an kujuumenool aatumi bee kayabo di Esufa, oo noo di búrooko. 6Nan kulakobomi, funakaf foola di fúriiŋumi. 7Naroŋumi jiñiil jíniine jítiyaaraj, naguubenoomi di kuleef aban, nafintenoomi di búruug, mati kubajut fumoor di eluupey yati dán kujaaburuŋ kuwannooremi. 8Funak fukila bajeembaj kumata bukaaku kalakoe di kapanak kukila di fukaraay, man kóomi di fújinaamaf fati ésukey fumat sisahaiil. 9Yaŋ too galab maleeka yati Akiiyaau di érajuliimi, ban mawuŋam mati Akiiyaau di muwuŋeniimi muŋoobeniimi. Di kúkolimi máamak, 10bare maleekaay di yooniimi, “Takum jíkoli! Ínje níŋaruluuŋar furim fajake fabile bee ekaan man bukanak búrom kumaayoorumi. 11Mati funakaf fati jaat, Apakenaau Áamakau, nawoliwol bee di muyuul di ésukey yati Dauda. Oo Apakenaau Áamakau. Oo eenomi Akiiyaau! 12Mo’ome moo jootumi émanjumey: panjitook jiñiil jaguubeni di kuleef ban di jifinteni di búruug.” 13Yaŋ too galab jameeŋ yati simaleeka, di erajulomi kápurumul bukinab bajakaab sinampoor di yaayu, man soom di esal Atijamit di sireg, 14“Kasalak kooku di Atijamit ati fatiya, di tentaam kásuumaayak koola kooku di bukanak, di kan Atijamit mooliil muyeoomi!” 15Nan simaleekaas sirajulomi di bukoo silaañ bee di bukinab bajakaab, kumataak di kulakomi karegoor, “Jija’aal bee di ésukey yati Betelehem man jijukaal waafaw wáwaaniaaw uwe wabajomi, wan Akiiyaau amanjenolaami.” 16Ñaa di kuwookoorumi eñesooley di móro, di kutookumi Mariyaama di Esufa, di jiñiilaj jan kufintenumi di búruugab. 17Nan kumataak kujukoomi, di kuregenumi furimaf di wan maleekaay eregiimi mati jiñiilaj uje. 18Kajammi wan kumataak kuregiimi mo’omu di wáaloiimi. 19Bare Mariyaama nayofumi uru búrom di búyegetool, man aam di kawoonoor ró. 20Kumataak di kulaañumi, di kulakomi di esaley mákalaam mati Atijamit. Di kusalool mati wan kujukumi di wan kujammi búrom nan man maleekaay eregeeniimi eeno. 21Nan bajumi funakaf futokey di fúfeegintenaf man kutampool fúriiŋumi, di kutampumi jiñiilaj, no’onu kuwonkujo Yensa, kareesak kan maleekaay esenumi bala’a iñaayool aŋar búrookaab. 22Funakaf fati katilulak di fúriiŋumi ekaaney Mariyaama man átien nan man sílingaas sati Muusa siceeŋumi, Esufa di Mariyaama di kújeetummi jiñiilaj bee Yerusalem man kúyiisenoomi di bújonlenab bati Akiiyaau. 23(nan man ciikimi eeno di sílingaas sati Akiiyaau, “Jiñiil jíniine jítiyaar joote eseni Akiiyaau man jimiiceelaetool.”) 24Di kújeetumulomi poop wan kootumi esen ásimenaau ati Atijamit bee ekaan kásimenak nan man sílingaas sati Akiiyaau siceeŋumi, “Joote esen ubundunda ugaba mba múlaabaan mugaba.” 25No’ona bajeembaj ániine an koonemi Simeon acinumi Yerusalem. Ániinaau akila an ajoone, ban akoba áamak, nalakomi káyenten di ekob piyo Atijamit nan aatumi bee kapakenak kati Isirael. Búyegetab Bátienaab di buwaloulomi bee di oo. 26Atijamit náyiisenooyiisen ñátum di Búyegetab Bátienaab mati letacet oo bajukut Apakenaau Áamakau. 27Balay bukila, Búyegetab Bátienaab di bújeetumoomi bee di fukobaf fáamakaf. Nan kuwolaak kújeetumulomi añoolool bee ekaan wan mukaanaam mati sílingaas sati Atijamit muceeŋumi, 28Simeon di kúkamboorubomi. Nayabumi añiilau man apeboomi di uñenool ban nasal Atijamit, di aaney, 29“Akiiyaau, ínje amiiceelau ooli, nuŋoolene ukatenom man icet di kásuumaay, nan man furimi fúligammi ubajobajo. 30Mati di kúcilom malegen nijujuk aatumi kapaken kati Isirael, 31an ujuumenumi man bukanak búrom kujukool. 32Oo eenomi mawuŋ, mawuŋam maate eraj wan Atijamit amaŋumi bee di Kakaanutumi Kúyahuudak búrom, di poop oo eenomi kasalak, kasalak bee di kati Isirael, wúli bukanak kooli.” 33Kuwolaak koola di wáaloiimi wan Simeon alakomi eregey moola. 34Simeon nalawumi Atijamit man aseniil kásuumaayak koola aban, nammi iñaayool Mariyaama, “Yénten, añiilau o’omu Atijamit amukenumi man akaan eloey di kayitoak kati bukan kajuupoe kati Isirael. Oo panakaan fúmanjum kápurumul di Atijamit mati fo bukan kajuupoe kutacoor moola. 35(ban man au, aseekau di fúkoi, jariey panekajen búyegeti nan an kuyahe jiliba di búsusool.) Bare síwoonoor sayofomi di úyeget wati bukan kajuupoe pansiraj.” 36Bajeembaj aboña anaare ati Atijamit an kareesool Anna. Oo añiilau ati Fanuel, ati di fiilaf fati Aser nápurumulo ban nafanlenfanlen. Di fajaŋaetool nayaboeenyabo man kulako di ataool wáriiŋe simit futok di sigaba. 37Nan mo’omu múpurutomi, nabilumi akaan aseek ati ájima bee nan abaje simit bukan kubakiir di sibakiir. Ápureriit fukobaf fáamakaf, bare narulenumi man amiiceelaetumi Atijamit, fuk di balay balatab di elawey. 38Anna náriiŋulotomi no’onu ban nalakomi esaley Atijamit mati añiilau umu. Nasankenumi bee mati oo bukanak búrom kalakomi ekobey an Atijamit aatumi kapakenak Yerusalem. 39Nan Esufa di Mariyaama kukammi mukaanaam umu búrom kuban nan man sílingaas sati Akiiyaau siceeŋumi, di kulaañumi bee di ésukiil yáamakey Nasaret yati Galili. 40Boo añiilau abaakumi ban nabilumi áliŋ di móro, nameeŋenimi di malinlo, mati kawulak kati Atijamit kooku di oo. 41Emitooemit kuwolaak kati Yensa kujaweenejaw bee Yerusalem bee emaat karuukenak kati káaningak kati Ewuujey yati Njalayiri. 42Nan Yensa abajumi simit uñen di sigaba, di kujawoor kumaat káaningak kukila nan man mukaanaam mati Kúyahuudak muregumi. 43Nan kunakak kati káaningak kubanumi, di kulakomi elaañey bóot bee Nasaret, bare ápuraau Yensa naremi bálamuk bo Yerusalem. Kuwolaool kumanjutumo, 44mati di kusofumi manteer oo oomu bo nábileul di bukan bukaaku, man kulakomi ejaay bala’ab búrom. Nan kúkaanumumi, di kutooŋumi eñesooley di kukilooriil, di poop kupaaliil di kuñesoomi. 45Nan kujukutoomi, di kulaañumi bee Yerusalem bee eñesooley. 46Nan bajumi kunak kúfeegiir di kutookoomi di fukobaf fáamakaf, man alakoe titoorey yati kuliikitenaak kati sílingaas sati Atijamit, man aam di káyentenak di bukoo ban naceeŋiil kúceeŋ. 47Kajamoomi búrom di wáaloiimi mati malinlaam di bálaulerab di balaañenerab boola. 48Nan kuwolaool kujukoomi, di wáaloiimi máamak, iñaayool naanoomi, “Há! Añoolom, wau kaane núkaanoli mo’omu? Baa ooli di ínje, wúli núkolikoli máamak man ulakoeñaa eñesiey.” 49Naceeŋiimi, “Wau kaane di jilako eñesom? Mante jimanjut ínje eete kalako di eluupey yati Ampaom?” 50Bare kúlaulut wan alakomi eregiiley. 51Yensa nabookomi di kuwolaool bee Nasaret, nakobumi bukoo. Iñaayool nakatumi waafaw uwe búrom di búyegetool. 52Yensa nabaakumi di malinlo di móro, ban mukaanaool músunsuum Atijamit di bukanak kamanjoomi búrom.

will be added

X\