LUUK 19

1Yensa nálamumumi di ésukey yati Yeriko. 2Di bajumi ániine an koonemi Jakeo. Oo arunga ati kulaga basaaf, ban nakankaan abaja. 3Nalakomi eñes bee ejuk ai eenomi Yensa, bare man átemimi ban aŋoolenut ajukool mati jameeŋey yati bukanak. 4Nateyumi ayab fácul man aremboorumi di búbaar mambi aŋoolen ajuk Yensa, mati oo aatumi kájawumak buruŋ bukila. 5Nan Yensa áriiŋulotomi, naluen man aanoomi, “Jakeo, wáloul galab! Mati eete kawannoor déeri au jaat.” 6Jakeo nawaloulomi yaŋ too galab man awalen Yensa jak di kámaayoorakuro. 7Bukanak búrom kajukumi mo’omu di kulakomi kákuumoor man koone, “Oo bee kawannoor di eluupey yati ati majakut.” 8Jakeo najuum ban nammi Akiiyaau Yensa, “Arungaau, úyentenom, panicaab fubajom kapan kákon bee di kabajutumi. Kaanjaat nigunguuñ aceen man iyab sígodiool, panilaañenool so ñooni ñabakiir.” 9Yensa nalaañenoomi, “Di funakaf fati jaat Atijamit napakempaken bukanak kati eluupey uye, mati ániinaau ume poop añiil ati fiilaf fati Iburehima. 10Mati Añiilau ati anau najawulojaw bee eñes ban napaken kájimmi.” 11Nan bukanak kulakomi di káyentenoorak di wan Yensa aregumi, narulenumi kúregak uke. Mati nalofeenlof Yerusalem, di kusofumi mati jáyiaj jati Atijamit joote kajuumeni iñeme. 12Yensa nammi, “Bajeembaj ániine aceen abaji di fiil fati kúyi alakomi ejaay bee di mofam máloie manti kuloopenool bompoŋab bati jáyiaj, abanjaat nalaañ bóot. 13Bala’a ajaw, nawonkumi kumiiceelool kooni uñeney, man aseniimi anoosani égodi emina, man aaniimi, ‘Jiŋaruso man jirokenuso bee nampi ilaañulomi.’ 14Bare bukanak kati mofam moola kalatoomi ban kuboñumi kuceen bálamukool mambi kúriiŋujaat tikureg Áyiau Áamakau, di aaney, ‘Wúli umaŋut ániinaau ume man alako áyiau óololi.’ 15Nan kukaanoomi áyi, nalaañulomi bóot. Yaŋ oo di ériiŋuley ceb, naboñ kúwonkulool kumiiceelak buke, kan asenumi sígodaas, mambi amanj waa eenomi anooani búrembenab boola. 16Amiiceelau átiyaarau nájeetumulosomi nammi, ‘Arungaau, eminaay yákoney yooli ewolenwolen siminaas uñen.’ 17Áyiau naanoomi, ‘Nukankaan jak máamak, au amiiceel afiumaay! Mati úriiŋumi kafium di waaf wayiinkun, ñaa au oote erung sísuk sáamak sooni uñen.’ 18Amiiceelau agabuntenau nabilumi nammi, ‘Arungaau, eminaay yákoney yooli ewolenwolen siminaas futok.’ 19Áyiau naanoomi, ‘Au oote erung sísuk sáamak sooni futok.’ 20Bare amiiceel aamu nabilumi nammi, ‘Arungaau, eminaay yooli yooye, yan ínje iyofumi jak di jiful. 21Níkoli’ikoli mati au an átaañie. Au nukankaan nan an aŋaremi wan ajeenutumi, ban naŋareŋar muri man alukutumi.’ 22Áyiau naanoomi, ‘Au amiiceel ájakaatiaau, pánigamenumumi kurimak kooli fúkouko. Au numammanj mati ínje an átaañie, ínje nikankaan nan an aŋaremi wan ajeenutumi, ban naŋareŋar muri man alukutumi. 23Wau kaane umaagenut eminaay yúmboom kamaagemi man kurok? Kaaneemmojaat, nan ilaañulomi eeteenumi ebajuyo di búrembenab booliyo.’ 24Nammi kajuumutomi, ‘Jíbotul eminaay di oo, ban jisenuyo abajumi siminaas uñen.’ 25(Bare di koonoomi, ‘Arungaau, nababaj uñen aban!’) 26Áyiau nalaañenumi, ‘Ínje eem di ereguul mati ampi abajumi, Atijamit panabenenool wuuj. Bare ampi abajutumi, Atijamit pánabotul hani wayiinkun wan abajumi. 27Bare kulatoorom buke, kamaŋutammi man irungiil, jíŋaruliil taate man jibujiil fáculom.’” 28Nan Yensa abanumi kasankenak uke, nalo fácul man kujaw kajaaburuŋ bee Yerusalem. 29Nan ajawumi alofenumi sísukas sati Betufage di Betani di Furembooraf fati Uwoliiw, naboñumi kugaba di kuriibaool tikulo fácul. 30Naaniimi, “Jijaw bee di ésukey yan jijonkooraañaa. Nampi jilakomi kanokenak di yo, panjitook jiroha jakoki, jan an aremboorerut. Jífeluujo man jíjeetumul bee taate. 31An aceeŋuujaat man aanuul, ‘wau kaane di joom di efelujo?’ Joote eregool, ‘Akiiyaau amaŋujo.’” 32Ñaa kan aboñumi di Kujawumi kutookujomi nan man aregiimi eeno. 33Nan kulakomi efeley yati jo, kakilujomi di kuceeŋiimi, “Wau kaane di joom di efel jirohaaj uje?” 34Di kulaañeniimi, “Akiiyaau amaŋujo.” 35Di kújeetumuujomi bee bati Yensa ban di kuleefumi uloaiil di bálamukab boolijo kuban man kupebenoomi aremboor. 36Nan aremboorujomi man alako ejaay di jo, bukanak di kufetumi uloaiil di buruŋab. 37Nan alakomi káwaloulak di Furembooraf fati Uwoliiw bee kalofenak Yerusalem, too tan buruŋab búwaaloorumi, jameeŋey yati kuriibaak búrom di etaatutomi kámaayoorakuro di esaley Atijamit máamak mati wajamurerutimi wan kujukumi kuban, 38di kommi, “Kásuumaayak kati Atijamit kooku di ampi ajawulomi, oo eenomi Áyiau, ampi ajawulomi di kareesak kati Akiiyaau! Kásuumaayak kooku di bukinab bajakaab ban kálebienak bee di Atijamit ammi fatiya!” 39Bare Kufarisa kuceen kammi di jameeŋey di koonoomi, “Aliikitenaau, mak kuriibai.” 40Nalaañeniimi, “Ínje eem di ereguul, buke kutuntenjaat, kukoobaak ko’oku pankucibulo.” 41Yensa najawumi alofumi ésukey yáamakey najukuyomi náruuren mati yo, 42di aaney, “Umanjeenjaat hani di funakaf fati jaat waŋoolenumi useni kásuumaayak! Bare iñeme uyofoiyofo, uŋoolenut ujukuwo. 43Kunak pánkuriiŋ kulatoori pánkujawul kuteep futeep faŋoobeni fík man kulooki bee nampi úŋoolenaati úpur man kúloummi kapanookapan. 44Kulatoori pankukajen jákaati, au di bukani búrom. Leekurineni to hani kukooba kugaba leekurembenoor, mati umanjut noonei nan Atijamit aatumi bee ebiley bee kapakeniak.” 45Yensa nanokenumi di fukobaf fáamakaf ban natooŋumi kacesoor kunoomenaak. 46Naaniimi, “Ciikiciik, ‘Eluupom panekaani fulaw.’ Bare muyuul jikankaan yo fulako fati kúkuu.” 47Nan púrutomi mo’omu, nalakomi kaliikitenak funakoofunak di fukobaf fáamakaf. Kúsimenaak kunifaanak kati Atijamit, di kuliikitenaak kati sílingaas, di Kúyahuudak kunifaanak kuceenak di kulakomi eñes buruŋ bampi kubujoomi. 48Bare kumanjut man koote ekaan, mati bukanak búrom kusosof furim fanoofani fan aregumi fúrindiiŋ úyegetiil.

will be added

X\