LUUK 18

1Funak fákon Yensa naregumi kuriibaool kúreg kákon kati káyiiseniil mati koote elaw nanoosani ban takum kulaañ bálamuk. 2Nammi, “Bajeembaj agamena aceen alakoe di ésuk eceen an ákoliut hani Atijamit ban poop akobut an. 3Di bajumi aseek ati ájima di ésukey ekila ansi áje’eul bee di oo nanoosani, man aane, ‘Kooŋenom di atiikoorom.’ 4Agamenaau namoosoomi piyo, bare di múlamukaam naanooromi, ‘Hani íkoliut Atijamit di poop ikobut an, 5bare mati aseekau o’omu ati ájima oomu bo kagaalenom, ínje neete ekooŋenool. Kaanutumojaat, panarulen abil man akaanom igono.’” 6Akiiyaau Yensa nammi, “Jíyenten wan agamenaau ajoonutumi aregumi. 7Lee Atijamit akooŋen kan amukenumi koola, káruurenoomi fukaf di bala’ab? Letawaaken eyiiŋiil galab? 8Ínje eem di ereguul, panakooŋeniil galab! Hani moo, Añiilau ati anau nampi alaañulomi, mante pánatookul tentaam kafiummi?” 9Yensa naregumi poop kúregak uke bee kafiumooromi kúkoiil mati koo kujonjoon ban di kuheelenumi bukaaku: 10“Kúniine kugaba di kuremboorumi kujawumi bee di fukobaf fáamakaf bee elaw. Ákon Afarisa aamu alaga basaaf. 11Afarisaau najuum man alakomi elawey di búyegetool, ‘Atijamit, ínje oomu di esali mati inaamut di bukan bukaaku: kákuutemi, kajoonutumi, kasangemi aseek mba ániine ati an. Ínje oomu di esali mati inaamut hani di alagaau ati basaafab ume! 12Di funoom fanoofani nikaanekaan balatab ñooni ñagaba, nípurenepuren jakaay di fubajom fanoosani.’ 13Bare alagaau basaafab najummi lói di Afarisaau ban oo akaañenut hani bee kaluen bukinab bajakaab. Bare nanagumi búsusool túc di kátaañi, man aane, ‘Wáay! Atijamit, baj kabonket di ínje ati majakutam!’” 14Yensa nammi, “Ínje eem di ereguul, alagaau ati basaafab o’omu Atijamit asenumi súm kabonket nan alaañumi bóot, bare lee Afarisaau. Mati anoosani atebenooromi Atijamit panawalenool, bare anoosani awalenooromi Atijamit panatebenool.” 15Funak fákon bukan kuceen di kújeetumul hani muñooliil bati Yensa mambi agoriil, bare kuriibaool nan kujukumi mo’omu di kumakiimi. 16Bare Yensa nawonkulomi kuñiilak bee di oo, man aane, “Jikatiil man kubil bee di ínje, ban takum jífireniil mo. Mati bukanak kajummi nan kuñiilak buke koo kati di jáyiaj jati Atijamit. 17Ínje eem di ereguul malegenam, mati ampi asofutumi jáyiaj jati Atijamit nan añiil, oo letanokender dó.” 18Arunga aceen naceeŋumi Yensa nammi “Aliikitenaau ajakaau, waa neete ekaan mambi ibaj eroŋey yati bándoorey?” 19Yensa naanoomi, “Wau kaane nuwonkom ajakaau? An alee bo ajake leejaat Atijamit cebool. 20Bare au numammanj sílingaas use: ‘Takum usang aseek mba ániine ati an, Takum ubuj an, Takum úkuut, Takum ulepoor, Lébien ampai di iñaayi.’” 21Ániinaau nalaañenoomi, “Níkaanunkaanum sílingaas so’osu búrom biñoo noo di mañiilenaam.” 22Nan Yensa ajamumomi naanoomi, “Babaj wákon wan ukate bálamuk. Noomen wan ukilumi búrom ban nucaab kabajutumi, ban nubil uriibenom. Moo panubaj fubaj dóo di bukinab bajakaab.” 23Bare nan ajammi mo’omu, nabotenooromi mati oo abaja áamak. 24Yensa najikeroomi nammi, “Moo táañie bee di bukanak kabajumi kanoken di jáyiaj jati Atijamit! 25Kanokenak kati eñonkomma di jíluaj jati écikuma kufanfaŋ man kuhiilie kanokenak kati abaja di jáyiaj jati Atijamit.” 26Kajammomi di kommi, “Kama ñaa ai aŋoolene apak?” 27Yensa nalaañeniimi, “Wan anau aŋoolenutumi akaan di funoonool, woo Atijamit naŋooleŋŋoolen akaan.” 28Peter nammi, “Jiker, wúli nukatulokat sísindo’oli ban nuriibeni.” 29Yensa naaniimi, “Malegen, ínje eem di ereguul, ampi akatumi bálamuk kalimbisool, mba aseekool, mba kútumbeool, mba kutiool, mba kuwolaool, mba kuñoolool, mati jáyiaj jati Atijamit. 30Di kéelak uke, panafaŋ man abaje wan akatubomi. Di poop kéelak kábileuumi, panabaj eroŋey yati bándoorey.” 31Yensa naŋarumi kúriiŋenaool uñeney di kugabaak naaniimi, “Jíyenten! Wulaal bee ejaw bee Yerusalem boo wan kuboñaak kati noo kuciikumi búrom mati Añiilau ati anau pánuliroor. 32Pankusofool kusen Kakaanutumi Kúyahuudak, pánkunarulool, pankujelool ban di kulacenool di káyiisen mati kulatoolat. 33Pankutekool ban di kubujool, bare di funakaf fúfeegintenaf pánayitoumul di kacetumi.” 34Bare kúlaulut hani waaf di wan Yensa aregumi. Wan alakomi káyiiseniilak uyofoi’iiyofo, ban kúlaulut di wan amaŋumi eregiiley. 35Nan Yensa alofenulomi ésukey yati Yeriko, di bajumi ániine ápuume alakoe di kápibenaak kati buruŋab elaw sadaa. 36Ániinaau ajammi karigoor kati jameeŋ yammi di ewuujey, naceeŋumi kuwuujaak wabajomi. 37Di koonoomi, “Yensa ati Nasaret aam di ewuuj.” 38Nacibulomi man aane, “Yensa, Añiilau ati Dauda, baj káboteni di ínje!” 39Kammi fáculey di kutooŋumi epankooley man koone atunten, bare oo nafaŋumi man acibuloe man aane, “Añiilau ati Dauda, baj káboteni di ínje!” 40Yensa najummi júd, ban namandooriimi man kújeetumulool. Nan ániinaau álofuloomi, Yensa naceeŋoomi, 41“Waa numaŋe man ikaani?” Naanoomi, “Arungaau, nimammaŋ man ijuk.” 42Yensa naanoomi, “Jiker panujuk! Kafiumak kooli kupakenipaken.” 43Yaŋ too galab naŋoolenumi ajuk fiit, ban nalakomi kariiben Yensa, di esaley di móro mati mákalaam mati Atijamit. Nan bukanak búrom kujukumi mo’omu, di kusalumi Atijamit.

will be added

X\